Relatonan di Fe for di un Prizon Histórico

Rond mundu tin boluntarionan Testigo di Jehova cu ta bishitá institutonan penal pa yuda prezunan cu sinceramente kier hala cerca Dios. Pa mas cu 20 aña nos a conducí cu éxito un programa educacional bíblico similar den e prizon federal di Atlanta, Georgia, Merca. Studia Bijbel cu hende den un ambiente di prizon ta un reto interesante. Como ministernan boluntario, nos a trata cu atracadó di banco, estafadó, asesino, dealer di droga, falsificadó i esnan cu a cometé delitunan sexual. Con nos ta yuda e hendenan ei?

 PROMÉ lo bo kier sa ki dia i di ki manera Testigonan di Jehova a drenta e prizon aki. Tabata dia 4 di juli 1918. Polis a escoltá un grupo di ocho minister cristian distinguí pa subi e 15 trapinan di granit dje prizon federal aki. Si a aplicá e custumber dje tempu ei, e hombernan su mannan lo tabata di bui na “cadena mará rond di barica,” i nan pianan tambe lo tabata di bui. E prezunan recien yegá tabata hombernan spiritualmente competente cu a hiba delantera den e Studiantenan Internacional di Bijbel, manera Testigonan di Jehova tabata conocí e tempu ei. E hombernan ei no por a pensa cu lo a dura ménos cu un aña pa establecé cu nan encarcelacion tabata un sentencia sumamente inhustu. Na mart 1919, e ocho ministernan Testigo a cana sali for di e mésun prizon ei, sin cadena i liber. Despues nan a ser exonerá ora cu autoridadnan a dicidí di hala nan acusacion aden. *

Durante nan encarcelacion na Atlanta, e hombernan cristian ei a duna les di studia Bijbel. Despues A. H. Macmillan, un dje ocho prezunan, a bisa cu na promé instante e subdirector di prizon tabata hostil pero cu al final el a sclama: “E lesnan cu boso ta duna [e prezunan] ta maraviyoso!”

Awe, mas cu 80 aña despues, les di Bijbel productivo ta sigui haci un impresion duradero riba personanan den e prizon ei. Na vários ocasion funcionarionan di prizon a selectá miembronan di nos tim pa duna nan reconocimentu special i plakat di mérito. E efectividad dje programa educacional dje Testigonan di Jehova a ser publicá tambe den Volunteer Today, un boletin nacional publicá dor dje Departamento di Husticia Mericano, Seccion Prizonnan Federal.

Un dje beneficionan dje programa di studia Bijbel cu prezunan ta un mehoracion remarcabel di nan comportacion. Como resultado algun a recobrá nan libertad mas trempan. Observadónan crítico kisas ta asumí cu convictonan ta studia Bijbel cu nos djis p’esei. Aunke esaki tabata cierto den algun caso, nos experencia a demostrá hopi bes lo contrario. Nos ta keda emocioná bes tras bes ora nos tende cu nos studiantenan ainda ta mantené bon conducta cristian hopi aña despues cu nan a sali for di prizon. Lo siguiente ta un par dje hopi experencianan cu nos a disfrutá di dje tras dje murayanan haltu dje facilidad histórico aki.

Prezunan Imigrante Ta Haña Speransa

Nos cu a predicá den e prizon di Atlanta na principio di añanan ’80 di siglo 20, a disfrutá dje privilegio di yuda hopi prezu imigrante. Algun dje transformacionnan tabata extraordinario.

Raoul * tabata na principio un prezu hopi peligroso. E cu un amigu tabata criminalnan profesional, i nan tabata encarcelá pa asesinato. Nan tabata masha violento, segun e ancianonan cu a yuda nan. Raoul tabatin enemigu mortal. Un homber a hura cu e ta mata Raoul, i Raoul a hura cu e ta haci mescos cuné. Raoul a spanta mashá ora nan a transferí su enemigu mortal n’e prizon di Atlanta. A parce cu tabata solamente un cuestion di tempu promé cu e dos enemigunan bieu aki topa otro sea den curá, den cafetaria of den e celnan. Sin embargo, despues di studia Bijbel cu Testigonan di Jehova, Raoul a haci cambionan drástico den su manera di pensa, su comportacion i su aparencia. Ora cu por fin e dos hombernan a pasa banda di otro den curá di prizon, Raoul su enemigu mortal ni sikiera a reconoc’é! E confrontacion sangriente cu a parce inevitabel, nunca a tuma lugá.

 Ora cu Raoul a dicidí di simbolisá su dedicacion na Dios mediante bautismo, nan mester a busca un baki di awa apropiado pa haci esei. E pastor di prizon a ofrecé pa yuda i a percurá un caha di morto pretu como baki di bautismo. Nan a yena e caha di morto te na rand cu awa, pero Raoul tabata mas grandi cu e caha. Pues dos anciano mester a traha huntu pa haci sigur cu Raoul ta bai completamente bou di awa, manera Bijbel ta exigí. (Lucas 3:21, nota na pia di página) Awe Raoul ta un homber liber i ta sigui sirbi como un minister cristian celoso.

Un decreto na 1987 pa deportá hopi prezu imigrante a hiba na un lantamentu destructivo i violento den e prizon, i esei a alcansá noticia internacional. Nan a coge hende como rehen. Sin embargo, loke masha poco hende sa ta e relatonan di prezunan imigrante cu yen di curashi a pone nan bida na peliger dor di nenga di participá den e lantamentu explosivo i violento. Nan tabata studiante di nos grupo di les di Bijbel. E hombernan aki, cu un tempu tabata cla pa bringa te na morto, a keda neutral, i no a tuma parti den e violencia i vandalismo. Esta un bon testimonio dje poder di Bijbel pa transformá asta criminalnan feros den hende cristian cu stima pas!—Hebreonan 4:12.

Hañando Pordon

Un otro experencia memorabel ta esun di James. E tabata un Testigo di Jehova pero a laga su mes bira spiritualmente swak. Despues el a cai den tentacion i a cometé fraude na banco. El a ser expulsá for dje congregacion cristian i encarcelá den e prizon di Atlanta. Despues el a conta nos: “Esei tabata e tempu mas miserabel den mi bida.”

 Bida den prizon tabata duru. James ta corda cu el “a sufri sin fin di soledad i desesperacion.” Sin embargo, su encarcelacion den un cel pertá di prizon a pon’é haci un examinacion propio serio. El a describí esei asin’akí: “Loke a duel mi mas tantu den prizon no tabata e incomodidad personal sino e manera cu mi a desapuntá mi Tata celestial.” Despues di vários luna, un dje prezunan cu tabata studia Bijbel cu e boluntarionan Testigo a acercá James i a invit’é pa asistí n’e lesnan di Bijbel. James, yen di bergwensa, a nenga na promé instante. Pero e yoncuman a persistí, i cu tempu James a asistí na un reunion di diadomingo.

El a sintié profundamente conmoví ora el a mira e interes amoroso cu e Testigonan cu tabata dirigí e les a mustra den e studiantenan. Despues tabatin un otro cos cu a impresion’é. Debí na experencianan anterior, James a asumí cu tur boluntario religioso a ricibí un bon salario pa nan trabou cu e prezunan. Pero pa su sorpresa el a haña sa cu e Testigonan no tabata entregá factura ni a ricibí pago cash pa nan servicio.—Mateo 10:8.

James a cuminsá spera ansiosamente p’e dianan di reunion. El a nota cu e rumannan cu a conducí e reunionnan ei tabata bondadoso i animante. Tabatin un anciano en particular cu a impresion’é. Segun James: “Mi tabata conta e dianan p’e ruman su siguiente bishita, pasobra el a duna bida n’e berdad dje Palabra di Dios; su actitud tabata contagioso. E ruman ei a inculcá den mi e necesidad di lesa Bijbel i analis’é pa asina mi por capta e berdadero sentido dje mensahe. Sí, pa hacié mi propio mensahe i mas importante ainda, pa desaroyá e mente di Cristo.”

 James tabatin dificultad pa kere cu Dios por a pordoná su erornan. Kico a yud’é? “Dios su pordon a ser reflehá den e trato cu nos a ricibí di hombernan fiel cu a desplegá sacrificio propio. * Un cos tabata masha cla: Apesar dje picánan teribel cu mi a cometé, e ruman nunca no a duna mi e mas mínimo impresion cu Dios lo no por a pordoná mi. Jehova nunca a bandoná mi. El a mira mi repentimentu sincero i con mi a repudiá mi accionnan bobo i fraudulento; i el a bendicioná mi ricamente.” Sí, James a ser restorá den e congregacion cristian. For di dies aña pasá cu el a sali for di prizon el a keda activo i celoso. Su casá i su yunan ta masha contentu cu awor e ta un sirbidó ministerial i recientemente a duna su promé discurso público.

Hañando e Caminda

Nos a topa Johnny na principio di añanan ’90. Su famia tabatin contacto cu Testigonan di Jehova, pero niun di nan tabata spiritualmente fuerte durante Johnny su añanan di formacion, ora cu e tabatin mester di guia moral i spiritual. Johnny poco-poco a cuminsá hiba un bida di crímen. El a ser sentenciá pa sinta castigu den e campo di prizon federal pegá cu e prizon di Atlanta. Durante cu e tabata den e campo el a tende di nos lesnan di Bijbel i a dicidí di asistí.

Na promé instante, apénas Johnny por a lesa. Sin embargo, e tabata asina ansioso pa haña mas conocimentu tocante Jehova i Jesucristo cu e tabata decididu pa siña lesa bon. (Juan 17:3) Nos lesnan di studio hopi bes a yuda prezunan cu esaki, foral pa loke ta lesa i comprendé, i lesamentu público. Johnny a traha asina duru pa su lesnan cu e otro studiantenan a cuminsá respet’é i admir’é como un ehempel dje manera cu un studiante di Bijbel serio mester ta.

Hopi luna despues nan a transferí Johnny pa e prizon federal na Talladega, Alabama, pa asistí na un dje prizon su programanan educativo tocante droga. Asina cu el a yega einan el a cuminsá participá den e reunionnan cristian di Testigonan di Jehova cu a ser tené ei. El a keda participá activamente te ora cu el a sali liber. I ora e dia felis ei a yega, Johnny no a perde tempu pa tuma contacto cu e Testigonan den e pueblito cu e tabata biba. Nan a ricibié calurosamente i el a sigui studia i haci progreso spiritual.

Johnny su entusiasmo i amor pa berdad bíblico a animá su mama tambe pa participá mas tantu den e actividadnan di congregacion. Johnny ta dun’é hopi apoyo i yudansa práctico. Recientemente Johnny a bautisá como símbolo di su dedicacion na Jehova Dios, i ta sigui participá activamente den e ministerio cristian.

Un Cosecha Abundante

Durante e último dos décadanan, Testigonan di Jehova a yuda mas cu 40 prezu na e prizon federal di Atlanta bira ministernan bautisá; mas cu 90 otro prezu tambe a beneficiá dje lesnan bíblico semanal. Otro prezunan a bautisá despues cu nan a sali for di prizon of despues di a muda pa otro prizon.

Nos cu ta bishitá e prizon histórico aki siman aden siman afó pa yuda prezunan cu di berdad a repentí, ta gradicidu di por sirbi den e ministerio cristian único aki. (Echonan 3:19; 2 Corintionan 7:8-13) Den e ambiente severo di schietpost, bewaker, portanan eléctrico i prikkeldraad, un goso i admiracion ta yena nos curason ora nos mira criminalnan federal cambia nan bida i bira ciudadano onesto i fiel adoradó di Dios.—1 Corintionan 6:9-11.—Contribuí.

[Nota]

[Kuadro/Plachi na página 20, 21]

“Boso A Hospedá Algun di Mi Mihó Amigunan”

NA APRIL 1983, Frederick W. Franz, kende e tempu ei tabata miembro dje Cuerpo Gobernante di Testigonan di Jehova, a bishitá e prizon federal mericano na Atlanta. E tabata masha ansioso pa bishitá e prizon aki en particular. Ora el a drenta e edificio, el bisa masha duru na e bewaker sintá n’e mesa den lobi: “Mi kier pa bo sa cu boso a hospedá algun di mi mihó amigunan aki den!” E bewaker a keda wak masha straño. Di kico Franz tabata papia?

Wel 64 aña promé, Joseph F. Rutherford cu shete colaboradó a ser sentenciá falsamente pa conspiracion. Despues Rutherford i Franz a bira hopi bon amigu i colega. E dia di su bishita tabata mas cu 40 aña despues di Rutherford su morto. I Franz—cu e tempu ei tabatin rond di 90 aña—a keda masha contentu di por a bishitá e lugá caminda su amigu tabata cerá asina hopi tempu pasá. Sin duda el a pensa riba e trabou cu Rutherford i su colaboradónan a haci paden dje murayanan ei. Ki clase di trabou?

Djis despues cu Rutherford i su colaboradónan a yega, e subdirector di prizon a bisa nan: “Nos ta bai duna boso algun cos di haci. Pues, kico boso por haci?”

A. H. Macmillan, un dje ochonan, a contestá: “Meneer, nunca mi no a haci nada otro den mi bida sino predicá. Bo tin algu asina aki den?”

“No shon! Ta p’esei mes boso ta aki den, i mi ta bisa boso for di awor cu no ta bai tin niun predicacion aki den.”

Vários siman a pasa. Riba diadomingo tur prezu mester a asistí na sirbishi den kapel, i ken cu tabata kier por a keda pa zondagschool despues di esei. E ocho hombernan a dicidí di forma nan propio grupo di studia Bijbel, i beurt pa beurt nan cada un a conducí. Mas despues Rutherford a splica: “Algun hende kaweta a cuminsá bini, i despues mas a bini.” Poco despues e grupo chikitu di 8 a crece bira 90!

Con e prezunan a reaccioná riba e lesnan di Bijbel? Un prezu a bisa: “Mi tin 72 aña, i mi mester a cai cerá pa mi por a tende e berdad. P’e motibu aki mi ta contentu cu nan a manda mi prizon federal.” Un otro a comentá: “Mi dia di sali ta cerca di yega; ta duel mi cu mi tin cu bai . . . Boso por bisa mi unda mi por haña hende manera boso ora mi sali?”

E anochi promé cu nan a libra e ocho hombernan, nan a ricibí un carta conmovedor di un yoncuman cu a asistí na nan lesnan. El a skirbi: “Mi kier pa boso sa cu boso a duna mi e deseo pa bira un mihó hende, un hende digno, si esei ta posibel for di un cadaver sushi i batí dor di mundu manera mi. . . . Mi ta débil, hopi débil, niun hende no sa esei mihó cu mi, pero lo mi purba i lo mi lucha cu mi mes si ta necesario, pa producí pleno fruta for dje simia aki cu boso a planta, ya asina mi por yuda no mi mes so, sino tambe esnan rond di mi. Tur esaki kisas ta zona straño, biniendo for di un hende manera mi, pero di fondo di mi curason mi ta men cada palabra.”

Awe, mas cu 80 aña despues, ainda Testigonan di Jehova ta planta simia di berdad bíblico den e prizon federal di Atlanta, i tambe den hopi otro prizon.—1 Corintionan 3:6, 7.