Speransa pa Hende cu Artrítis

“ARTRÍTIS no ta un causa principal di morto manera malesa di curason of cancer,” segun dr. Fatima Mili, “pero e tin un gran impacto riba e calidad di bida.” Artrítis por afectá tur aspecto di un hende su bida. Kico precis ta algun dje problemanan cu hende cu ta sufri di artrítis ta confrontá? Ta posibel trata cu nan i superá nan?

Katia * di 28 aña, di Italia, ta bisa: “Henter mi bida a cambia for di tempu cu mi tabatin 20 aña, ora cu dokter a constatá cu mi tin artrítis. Dolor a pone cu mi mester a kita for di trabou i stop cu mi carera den e ministerio di tempu completo.” Dolor ta un problema cerca tur hende cu artrítis. Alan di 63 aña, di Inglatera, ta bisa: “Semper bo tin dolor na un of otro parti di bo curpa, maske e dolor kisas ta moderá.” Cansancio ta un otro reto. Segun Sarah di 21 aña: “Asta si bo por wanta e dolor i e hinchamentu, e cansancio ta insoportabel.”

 Dolor Emocional

Setsuko di 61 aña, di Hapon, ta bisa cu lucha tur dia cu dolor persistente tambe por “agotá bo emocionalmente i mentalmente.” Djis purba coge un potlot of hisa telefon por ta un tarea difícil! Kazumi di 47 aña, ta lamentá: “Asta cosnan comun i coriente cu un mucha por haci, a bira imposibel pa mi.” Janice di 60 aña, cu no por para hopi mas, ta bisa: “E echo cu mi no por haci loke mi tabatin custumber di haci, ta desanimante.”

E limitacionnan ei por laga e persona sintié frustrá i cu e no ta sirbi. Gaku di 27 aña, ta un Testigo di Jehova i e ta bisa: “Dor cu mi no por participá plenamente den e trabou di evangelisá ni cumpli cu asignacionnan di congregacion, mi ta sinti cu mi no ta bal nada como persona.” Francesca, kende ta lucha cu artrítis for di tempu cu e tin dos aña, ta bisa cu e ta ser “halá mas i mas hundu den un remolino di desesperacion.” Tal desesperacion por tin mal efecto spiritual. Joyce, un Testigo di Sur África, ta admití cu el a cuminsá stop di bai reunionnan cristian. “Gewoon mi no tabata por a mira hende,” el a splica.

Tambe hende cu artrítis kisas ta wori hopi pa futuro. Nan tin miedu di no por move mas i di tin cu dependé di otro hende, miedu di keda sin tin un hende pa cuida nan, miedu di cai kibra wesu, miedu di no por percurá pa nan famia. Yoko di 52 aña, ta admití: “Ora mi tabata mira con mi skarnirnan ta bira tur trocí i desfigurá, mi a cuminsá haña miedu cu esei lo bira pió.”

Miembronan di famia tambe por ta sufri di dolor emocional, ya cu tur dia nan ta confrontá e sufrimentu di nan ser kerí. Tin pareha ta asta haña hopi tension den nan matrimonio. Un señora di Inglatera cu yama Denise, a bisa: “Despues di 15 aña casá, mi esposo a laga sa: ‘Mi no por soportá bo artrítis  mas!’ Anto el a bai laga ami i nos yu muher di 5 aña.”

Pues artrítis ta un tremendo reto tantu pa esnan cu ta sufri di dje como pa nan famia. No obstante, hopi di nan tin éxito den trata cuné! Laga nos wak con algun ta haci esei.

Respetá Bo Limitacionnan

Si bo tin artrítis ta esencial pa bo haña suficiente sosiegu; esaki ta minimisá cansancio. Pero esaki no kier men cu bo mester bai sinta den un huki. Timothy ta splica: “Bo tin cu keda activo pa asina bo no laga artrítis controlá bo mentalmente. Pasobra si esei sosodé, lo bo djis keda sintá den un huki ta sufri di dolor.” William Ginsburg, un specialista di reumatismo di Mayo Clinic, a comentá: “Tin un diferencia masha sutil entre haci di mas i haci di ménos. Tin biaha mester corda hende pa bai poco-poco i tene cuenta cu nan malesa.”

Kisas esaki ta nificá cambia e manera cu bo ta mira bo limitacionnan. Daphne di Sur África, ta conta: “Mi mester tabata realístico i reconocé cu mi abilidad di haci cierto cosnan no a disparcé; simplemente mi mester haci nan na un paso mas poco-poco. En bes di ansha i frustra, mi mester djis haci un tiki un tiki.”

Ta un bon idea tambe pa cera conocí cu vários artefacto cu tin pa yuda bo, i tal bes papia tocante nan cu bo dokter of fisioterapista. Keiko ta conta: “Nos a instalá un lift special pa subi trapi. Mi polsnan tabata haci dolor ora di drei man rondó di porta, pues nos a cambia nan. Awor mi por habri tur porta dor di pusha nan cu mi cabes. Riba tur kranchi di awa na cas nos a instalá palanca cu bo ta pusha pa habrié of cer’é, ya asina mi por a haci maske ta algun trabou di cas.” Gail, cu tambe tin artrítis, ta bisa: “Mi yabinan di cas i di auto ta pegá na un hèndel largu, i asina ta mas fácil pa mi drei nan. Mi peña i skeiru di cabei ta pegá na un man largu i mi por ahustá nan na diferente ángulo ora di usa nan.”

Apoyo di Famia Ta “un Fuente di Fortalesa”

Carla di Brazil, ta bisa: “E apoyo di mi casá tabata crucial. E echo cu e tabata bai dokter huntu cu mi, a duna mi curashi. Huntu nos a descubrí con e malesa ta afectá mi curpa, kico ta e síntomanan, i ki tratamentu ta necesario. Mi a sinti mi mihó pasobra e por a comprendé kico mi tabata pasando aden.” Sí, esposo of esposanan cu ta aceptá e limitacionnan di nan casá i cu ta dispuesto na siña tocante e malesa, por ta un enorme fuente di fortalesa i apoyo.

Por ehempel, Bette a bai traha den limpiesa ora e artrítis di su casá a limitá e casá di traha den construccion. Kazumi su esposo no solamente a cuid’é, sino tambe a haci e trabounan di cas cu Kazumi no por a haci. Ademas, e esposo a siña e muchanan con nan por yuda. Segun Kazumi: “Mi esposo tabata un fuente di fortalesa. Sin su yudansa mi condicion lo tabata hopi mas pió.”

Un señora cu yama Carol, di Australia, ta duna e advertencia aki: “Tene cuidou pa bo no yena bo programa cu muchu actividad. Fácilmente mi ta cuminsá sinti cu mi no ta sirbi si mi no por mantené e mésun paso cu mi famia.” Ora e famia ta duna apoyo cu comprension i consideracion, esei por ta un fuente di fortalesa pa hende cu ta sufri di artrítis.

Yudansa Spiritual

Katia ta bisa: “Ora un persona ta sufri di un malesa manera esaki, e ta convencí cu  niun hende no sa kico e ta pasando aden. P’esei ta importante p’e acudí na Jehova Dios, ya cu e sí di berdad ta comprendé nos condicion físico i emocional. (Salmo 31:7) Un bon relacion cu Jehova a duna mi e pas mental pa biba trankil cu mi malesa.” Ta na su lugá anto cu Bijbel ta yama Jehova “e Dios di tur consuelo, cu ta consolá nos den tur nos tribulacion.”—2 Corintionan 1:3, 4.

Pues oracion por ta un poderoso fuente di consuelo pa un hende cu ta sufri di dolor persistente. Kazumi ta conta: “Durante anochinan largu cu mi no por a drumi di dolor, mi a deshogá mi curason na Jehova cu awa na wowo, pidiend’e forsa pa wanta e dolor, i sabiduria pa enfrentá tur mi dificultadnan. Definitivamente Jehova a contestá mi.” Francesca tambe a experenciá e apoyo amoroso di Dios. E ta bisa: “Mi a mira con e palabranan di Filipensenan 4:13 a cumpli: ‘Pa tur cos mi tin e forsa den birtud di esun cu ta duna mi poder.’”

Hopi bes Jehova Dios ta percurá apoyo via e congregacion cristian. Por ehempel, Gail ta conta dje yudansa cu el a ricibí di su rumannan spiritual den e congregacion local di Testigonan di Jehova. “Nan amor a yuda mi pa mi no bira deprimí.” Keiko tambe a bisa algu similar ora a puntr’é: “Tin algu den bo bida cu bo ta haña ta dushi?” El a contestá: “Sí, tur e amor i comprension cu mi ta haña di tur hende den congregacion!”

Den congregacion di Testigonan di Jehova, e superintendentenan ta hiba delantera den duna apoyo. Segun Setsuko: “Ora cu e ancianonan ta scucha un persona cu ta lucha cu malesa i ta dun’é consuelo, esei tin un efecto asina grandi cu mi no por ni describié.” Sin embargo, Daniel cu tambe ta sufri di artrítis, ta corda nos cu “nos rumannan spiritual por yuda solamente si nos laga nan hacié.” P’esei ta importante pa hende cu artrítis keda den contacto cu compañeronan cristian, i haci nan best pa asistí na reunionnan di congregacion. (Hebreonan 10:24, 25) Ei, nan por ricibí e animacion spiritual necesario pa perseverá.

Sufrimentu Lo Caba

Hende cu ta sufri di artrítis ta gradicidu na dokternan pa e adelanto cu nan a haci te cu awor. Sin embargo, asta e mihó tratamentunan no ta ègt cura artrítis. Na final di cuenta, hende cu artrítis por haña nan mayor consuelo dor di aceptá Dios su promesa di un mundu nobo. * (Isaías 33:24; Revelacion 21:3, 4) Den e mundu nobo ei ‘e coho lo bula mescos cu biná.’ (Isaías 35:6) Artrítis i tur otro malesa cu ta afligí humanidad lo disparcé pa semper! P’esei Peter, cu ta sufri di artrítis di wes’i lomba, ta bisa: “Mi por mira un lus na fin dje tunel scur cu mi ta aden actualmente.” Un señora cristian cu yama Giuliana tambe ta bisa: “Mi ta considerá cada dia cu pasa como un bataya ganá, un dia ménos pa perseverá promé cu e fin bini!” Sí, e tempu cu lo bini un fin no solamente na artrítis sino tambe na tur sufrimentu, ta cerca!

[Nota]

[Plachinan na página 10]

Tin hopi artefacto cu ta yuda hende cu artrítis hiba un bida productivo

[Plachi na página 12]

Na reunionnan cristian hende por haña apoyo amoroso