Hóbennan Sa Puntra . . .

Kiko Tin di Malu den Traha Afsprak pa Sali na Edat Yòn?

“Último tempu algun mucha hòmber na skol ta blo pidi mi pa sali ku nan òf pa frei nan.”​—⁠Becky, 11 aña di edat. *

“Mayoria mucha na nos skol tin nan pareha ku nan ta sali kuné. Pa bisa bèrdat, no ta nada straño pa mira nan ta sunchi den gang.”​—⁠Liana, alumno di vierde klas di skol sekundario.

HOPI hóben ta kuminsá traha afsprak pa sali ku mucha hòmber òf ku mucha muhé na edat hopi yòn. Medionan di komunikashon ta promové esaki komo algu normal, komo si fuera e ta un dibertishon inofensivo. Oneyda di 12 aña ta konta: “Kasi tur hende na skol tin nan frei.” Un mucha muhé ku yama Jenifer ta kòrda: “Mi ta kòrda muchanan den derde klas ku tabata frei otro.” E ta agregá: “Mi a kuminsá haña preshon di mi pareunan pa traha afsprak pa sali ku mucha hòmber ora mi tabatin 11 aña.”

Pues ta di komprendé ku si abo no tin un pareha pa sali kuné, kisas bo ta sinti ku bo ta bo so. Sí, podisé nan ta asta tenta bo i hasi bofon di bo pasobra bo no ta traha afsprak pa sali. Jenifer a sinti ku e tabata muchu yòn pa sali ku mucha hòmber, p’esei e tabata nenga nan ora nan pidié. Kon nan a reakshoná? Jenifer ta kòrda: “Nan a hasi chèrchi di mi i tabata hasi wega tokante esei.” Niun hende no gusta pa otro hende hasi bofon di nan. Pero bo mester kuminsá forma pareha pa sali djis pasobra otronan ta hasié? Kiko presis e trahamentu di afsprak pa sali ku un persona dje otro sekso ta enserá? I ki propósito e ta sirbi?

Ki Ora Bo Ta Papia di Traha Afsprak pa Sali?

Hopi hóben ta pretendé: ‘Nos no ta frei otro, nos ta gewoon amigu,’ maske nan ta pasa hopi tempu ku un persona dje otro sekso. Bo por yam’é kiko ku bo kier, sea afsprak pa sali, papia ku otro òf amigu di otro. Pero, ora un mucha hòmber i un mucha muhé ta duna otro atenshon eksklusivo i ta kuminsá pasa hopi tempu huntu den aktividatnan sosial, esei por lo general ta mas ku simpel amistat. I bo por ta papia ku un hende sin ta presente en persona. Kòmbersashonnan via chat room di Internet, na telefon, via karta òf e-mail tambe por ta formanan di tin afsprak ku otro.

E pregunta ta: Kiko tin di malu den pasa  tempu kasi eksklusivamente ku un persona dje otro sekso?

E Peligernan

Na Proverbionan 30:⁠19, Beibel ta papia di “e kaminda di un hòmber pa ku un mucha muhé.” E ekspreshon aki ta sugerí ku e relashon entre hòmber ku muhé tin tendensia di sigui un sierto patronchi. Ora tur dos ta maduro i ta tene nan mes n’e normanan moral ku Dios a duna, salimentu ku otro por hiba na amor i ku tempu na un matrimonio onorabel. Di tur manera, Dios a krea hòmber i muhé pa nan ser atraé na otro. Pero kiko si bo no tin e edat pa kasa? Dor di kuminsá sali ku un persona ora bo ta muchu yòn, bo ta hinkando bo mes den un situashon problemátiko.

Dikon? Pasobra si bo ta pasa hopi tempu huntu ku un persona dje otro sekso, ta natural ku bo sintimentunan lo lanta. Promé ku bo realisá, bo ta kuminsá anhelá pa wak e persona ei. Ora boso no ta huntu, bo ta haña bo ta pensa riba e persona. Pero hopi bes ta resultá ku e sintimentunan ta bini di un solo banda, i un di boso ta keda ku kurason kibrá. I asta si e sintimentunan ta bini di tur dos banda, tòg boso ta haña boso ku frustrashon i kurason kibrá ora un di boso no ta sufisiente maduro òf no tin e edat pa kasa. Bon mirá, na kiko un relashon asina por hiba? Un proverbio bíbliko ta bisa: “Un hòmber por tuma kandela den su bus sin kima su paña?”​—⁠Proverbionan 6:⁠27.

Tuma e kaso dje hobensita Nina. E ta konta: “Mi a topa un mucha hòmber riba Internet. Nos tabata papia den un chat room pa oranan largu tur dia. Mi a pega na dje emoshonalmente, i mi bida tabata drei rònt di dje. E relashon no a dura mashá. Ora nos a kibra ku otro mi a bira hopi deprimí. Anto el a bèl mi i a bisa mi ku e ta bai mata su kurpa pasobra nos a kibra ku otro. Esei a hasi mi mas deprimí ainda.” Mirando atras, Nina ta konkluí: “Esei no tabata bale la pena! E relashon a terminá dos aña pasá, i ainda mi ta sufri di depreshon.” Nina simplemente tabata muchu yòn p’e ta emoshonalmente enbolbí ku un persona.

Ta interesante ku ora Beibel ta papia di “e kaminda di un hòmber pa ku un mucha muhé,” e ta referí kisas na relashon seksual. Den e mundu djawe, traha afsprak pa sali regularmente ku un hende hopi bes ta un paso ku ta hiba na relashon seksual. Kisas e ta kuminsá sin mal intenshon, ku djis tenementu di man. Despues ta sigui un abraso leve i un sunchi na kara. No ta meskos ku ora dos adulto hóben, ku a hasi un kompromiso serio ku otro, ta ekspresá nan kariño asina. Pero ora dos hende ta muchu yòn pa kasa, tal komportashon solamente lo stimulá deseo seksual innesesariamente. Muestranan di “kariño” por bira mas i mas inapropiado òf impuru. Nan por asta hiba na un òf otro forma di inmoralidat seksual, esta, fornikashon. *

E frutanan di inmoralidat seksual ta amargo. Tin hende ta haña malesa transmití seksualmente  dor di esei. Otronan ta pèrdè nan rèspèt propio i ta perhudiká nan konsenshi. Vários mucha muhé yòn ta sali na estado. Nada straño anto ku Beibel ta duna e mandamentu aki: “Hui for di inmoralidat”! (1 Korintionan 6:​13, 18; 1 Tesalonisensenan 4:⁠3) Evitá di traha afsprak pa sali ku un solo persona ora bo ta muchu yòn lo yuda bo obedesé e mandamentu aki.

Ki Ora Bo Por Traha Afsprak pa Sali

Esaki no kier men ku nunka bo no por sali ku un hende dje otro sekso. Pero si bo ta un tiner, probablemente bo ta den loke Beibel ta yama “flor di [bo] hubentut.” (1 Korintionan 7:36) Ta awor bo ta kuminsá desaroyá pa bira e hòmber òf muhé ku finalmente lo bo ta. Durante e periodo aki, bo ta kuminsá madurá físikamente, emoshonalmente i seksualmente. Bo sintimentunan⁠—⁠inkluso bo deseonan seksual⁠—⁠por ta mas fuerte ku nunka. Sin embargo, e sintimentunan ei por ta inkliná na kambia masha lihé tambe. Pa e motibu aki, romansenan di tiner no sa dura masha largu. Un mucha muhé tiner ta kòrda: “Tempu mi tabata forma pareha pa sali, por lo general tabata un siman ku un hende i ya pa e otro siman nos a kibra.”

Ta bisto anto ku no ta sabí pa traha afsprak pa sali ku un solo persona durante ‘flor di hubentut.’ Ta mihó bo warda te ora bo konosé bo mes bon, ku bo sa loke bo gusta i loke bo no gusta, i ki metanan bo kier purba alkansá. Tambe bo mester tin e edat pa karga e responsabilidatnan di matrimonio. Por ehèmpel, Yehova ta ferwagt di un esposo ku e ta perkurá pa su famia físikamente, materialmente i spiritualmente. Si bo ta un mucha hòmber tiner, bo ta prepará pa haña un trabou, kuida un kasá i kisas yunan? Bo ta den posishon pa yuda nan mantené nan spiritualidat? I kiko si bo ta un mucha muhé yòn? Un esposa mester stima i respetá su kasá; e tin ku apoyá e desishonnan ku su kasá tuma. Bo ta realmente prepará pa hasi esei riba término largu? Ademas, bo ta kla pa dirigí un kas dia aden dia afó, pa prepará kuminda i kuida yu?​—⁠Efesionan 5:​22-25, 28-31; 1 Timoteo 5:⁠8.

Pa ilustrá esei: Den paisnan oksidental, hóbennan ta soña ku un dia nan tin mag di kore e outo di famia. Pero kiko un hóben tin ku hasi promé ku e tin mag di hasi esei? Den mayoria pais bo tin ku tuma lès i pasa eksamen promé ku bo haña bo reibeweis pa kore outo. Di kon? Pasobra korementu di outo ta un responsabilidat serio. Ora bo ta tras di stür, bo bida i bida di otro hende ta den bo man. Wèl, matrimonio tambe ta un responsabilidat hopi serio! Komo tiner, kisas simplemente bo no ta kla pa esei ainda. Den tal kaso, lo ta sabí pa bo resistí e tentashon pa traha afsprak pa sali ku un solo persona, ya ku esei ta un paso den direkshon di haña un kasá. Simpel bisá: Si bo no ta kla pa kasa, bo no mester traha afsprak pa sali.

Pa bo por tuma un desishon sabí relashoná ku esaki, bo mester tin loke Beibel ta yama “konosementu i disernimentu.” (Proverbionan 1:⁠4) Podisé ta un bon idea anto pa probechá dje konosementu i eksperensia di un hende mas grandi. Por lo general, mayornan kristian ta den e mihó posishon pa yuda bo evaluá si bo ta kla pa matrimonio. I kisas tambe lo bo por haña algun konseho serka miembronan maduro dje kongregashon kristian. Si bo mayornan no kier pa bo traha afsprak pa sali, bo ta hasi bon di koperá ku nan. Nan kier yuda bo “tene maldat for di bo kurpa.”​—⁠Eklesiástes 11:⁠10.

Si nan ta haña ku bo no ta kla pa traha afsprak pa sali, kisas nan ta rekomendá bo pa en bes di limitá bo atenshon na un solo persona, bo amplia bo sírkulo di amigu. Asosiando ku hende soltero i kasá, bieu i yòn, por yuda bo haña un personalidat mas balansá i duna bo un bista mas realístiko di bida i di matrimonio.

No ta fásil pa warda ku trahamentu di afsprak pa sali te ora ku bo ta kla pa esei. Pero si bo warda, ta bale la pena. Dor di usa “e flor di [bo] hubentut” pa krese bira un adulto maduro i responsabel, lo bo spar bo mes di bòsh’i problema. Lo bo duna bo mes tempu pa desaroyá i bira e klase di persona ku por trata ku e preshon i responsabilidatnan di matrimonio. Tambe lo bo duna bo mes tempu pa krese bira un persona spiritual. Dje manera ei, ora ku finalmente bo ta kla pa traha afsprak pa sali, e chèns ta grandi ku otro hende lo mira ku bo ta un persona ku ta bale la pena pa nan siña konosé mihó.

[Nota]

[Plachi na página 26]

Muestranan di kariño hopi bes ta hiba na problema