Sostené dor di Konfiansa den Dios

SEGUN E RELATO DI RACHEL SACKSIONI-LEVEE

ORA KU UN BEWAKER A KEDA DAL MI DEN MI KARA PASOBRA MI A NENGA DI TRAHA PIESA PA AVIONNAN DI GUERA NAZI, UN OTRO BEWAKER DI KUNÉ: “BO POR BIEN STÒP. E ‘BIBELFORSCHERNAN’ EI TA LAGA BO BATI NAN MATA PA NAN DIOS.”

ESAKI a sosodé na desèmber 1944 na Beendorff, un kampo di trabou fòrsá pa hende muhé pegá ku e minanan di salu den nort di Alemania. Laga mi splika ki mishi mi einan i kon mi a logra sobrebibí e último lunanan di Segundo Guera Mundial.

Mi a nase na 1908 den un famia hudiu na Amsterdam, Hulanda, i mi ta e di dos di tres yu muhé. Mi tata su ofishi tabata di sleip djamanta, meskos ku hopi otro hudiu na Amsterdam promé ku Segundo Guera Mundial. El a muri ora mi tabatin 12 aña, i despues Opa a bin biba serka nos. Opa tabata un hudiu deboto, i el a sòru pa nos ser kriá segun e tradishonnan hudiu.

Siguiendo den e pasonan di mi tata, mi a siña e ofishi di kòrta djamanta, i na 1930 mi a kasa ku un kolega. Nos a haña dos yu: Silvain, un mucha hòmber bibitu i aventurero, i Carry, un dushi yu muhé i bon mucha. Desafortunadamente nos matrimonio no a dura largu. Na 1938, djis despues di a divorsiá, mi a kasa ku Louis Sacksioni, ku tambe su ofishi tabata di sleip djamanta. Na febrüari 1940, nos yu muhé Johanna a nase.

Ounke Louis tabata hudiu, e no a praktiká su religion. Pues nos a stòp di selebrá e fiestanan hudiu ku komo mucha mi a haña asina fasinante. Mi tabata sinti hopi falta di esei, pero den mi kurason mi a sigui kere den Dios.

Un Kambio di Religion

Na prinsipio di 1940, e aña ku alemannan a kuminsá invadí i okupá Hulanda, un señora a yama na nos porta i a papia ku mi tokante Beibel. Mi no a komprendé muchu di loke el a papia, pero mi tabata aseptá literatura ki ora ku el a pasa. Sin embargo, mi no tabata lesa e literatura ku el a laga pasobra mi no kier tabatin nada di hasi ku Hesus. Mi a lanta siña ku Hesus tabata un hudiu apóstata, esta, ku el a bandoná e fe hudiu.

Anto un dia un hòmber a bini na mi porta. Mi a hasié vários pregunta manera: “Dikon Dios no a krea otro hende despues ku Adam ku Eva a peka? Dikon tin asina tantu miseria? Dikon hende ta odia otro i ta bai guera?” E hòmber a sigurá mi ku si  mi tin pasenshi, lo e kontestá mi preguntanan for di Beibel. Asina nos a hasi areglo pa tene un studio di Beibel na kas.

Ma ainda mi tabata kontra e idea di ku Hesus ta e Mesías. Sin embargo, despues di a hasi orashon tokante e asuntu, mi a kuminsá lesa e profesianan tokante e Mesías den Beibel, mirando nan desde un otro punto di bista. (Salmo 22:​7, 8, 18; Isaías 53:​1-⁠12) Yehova a yuda mi mira ku e profesianan ei a kumpli den Hesus. Mi kasá no tabata interesá den loke mi tabata siña, pero e no a stroba mi di bira un Testigu di Yehova.

Ounke Ta na Skondí, Mi Ta Sigui Prediká

E tempu dje okupashon aleman na Hulanda tabata un tempu peligroso pa mi. Mi tabatin dos kos den mi kontra: Mi ta hudiu, i e alemannan tabata manda tur hudiu kampo di konsentrashon; i tambe mi ta un Testigu di Yehova, un organisashon religioso ku e nazinan a purba kaba kuné. Sin embargo, mi a keda aktivo i tabata dediká un promedio di 60 ora pa luna proklamando mi speransa kristian nobo.​—⁠Mateo 24:⁠14.

Un anochi na desèmber 1942, mi kasá no a bini kas for di trabou. Despues a resultá ku nan a arest’é na trabou huntu ku su koleganan. Nunka mas mi no a mir’é. Mi rumannan Testigu a konsehá mi pa ami ku mi yunan bai skonde. Mi a logra keda serka un ruman muhé kristian na otro banda di Amsterdam. Komo ku tabata muchu peligroso pa nos kuater keda huntu n’e mesun adrès, mi mester a laga mi yunan serka otro hende.

Hopi bes mi a skapa na wowo di angua. Un anochi un Testigu tabata hiba mi na un otro lugá di skonde riba su baiskel. Sin embargo, e lus di su baiskel no tabata traha, i dos polis hulandes a para nos. Nan a lusa mi kara ku nan flèshlait i a mira ku mi ta hudiu. Afortunadamente, nan a djis bisa: “Sigui bai purá, pero na pia.”

Arestá i Enkarselá

Un mainta na mei 1944 ora mi tabata na punta di kuminsá den e ministerio, nan a arestá mi. No pasobra mi ta un Testigu, sino pasobra mi ta hudiu. Nan a hiba mi un prizòn na Amsterdam, kaminda mi a keda dies dia. Despues nan a transportá mi ku trein, huntu ku otro hudiu, pa e kampo temporal na Westerbork den nortost di Hulanda. Djei, nan tabata hiba hudiunan Alemania.

Na Westerbork mi a topa mi sua ku su yu hòmber, nan tambe a ser arestá. Mi tabata e úniko Testigu entre e hudiunan, i konstant mi tabata resa pidi Yehova sostené mi. Dos dia despues, ami ku mi sua i su yu tabata den un trein di transportá baka, kla pa bai sea Auschwitz òf Sobibor, kamponan di morto na Polonia. Di ripiente nan a yama mi nòmber i a pone mi den un otro trein, un trein normal di pasahero.

Na bordo dje trein ei tabatin eks-koleganan ku a traha den e negoshi di djamanta. Nan a transportá rònt di shen hende ku a traha ku djamanta pa Bergen-Belsen den nort di Alemania. Despues mi a haña sa ku ta mi ofishi a salba mi, pasobra e hudiunan ku nan a manda Auschwitz òf Sobibor por lo general tabata bai derechitu p’e kambernan di gas. Esei ta loke a pasa ku mi kasá, dos di mi yunan i sobrá famianan. Ounke e tempu ei mi no tabata sa kiko a pasa ku nan.

Na Bergen-Belsen, nan a  akomodá nos ku tabata kòrtadó di djamanta den un barak spesial. Pa spar nos mannan pa por hasi nos trabou delikado, nan no a eksigí pa nos hasi otro trabou. Ami tabata e úniko Testigu den nos grupo, i ku kurashi mi a papia ku e otro hudiunan tokante mi religion nobo. Sin embargo, nan a konsiderá mi un apóstata, meskos ku hende a konsiderá apòstel Pablo den promé siglo.

Mi no tabatin Beibel, i a anhelá di haña alimento spiritual. Un dòkter hudiu den e kampamentu sí tabatin un Beibel i el a duna mi e Beibel a kambio di un par di snechi di pan i un tiki manteka. Mi a keda shete luna huntu ku e ‘grupo di djamanta’ na Bergen-Belsen. Nan a trata nos relativamente bon, lokual a pone e otro prezunan hudiu haña rabia riba nos. Pero al final a resultá ku nan no a haña djamanta pa nos traha riba dje. P’esei dia 5 di desèmber 1944, nan a transportá rònt di 70 di nos ku tabata muhénan hudiu pa un kampo di trabou fòrsá na Beendorff.

Mi Ta Nenga di Traha Arma

Den e minanan pegá ku e kampo, un 400 meter bou di tera, nan a pone prezunan traha piesa pa avionnan di guera. Ora mi a nenga di hasi e trabou aki, mi a risibí gòlpi pisá. (Isaías 2:⁠4) E bewaker a rous mi i bisa mi mira pa mi ta prepará pa traha e siguiente dia.

E siguiente mainta mi no a bai pa ora nan tabata kontrolá lista di presensia, i a keda den barak. Mi tabatin sigur ku nan lo a tira mi mata, p’esei mi a resa pidi Yehova p’e rekompensá mi pa mi fe. Mi a keda ripití den mi mes e salmo bíbliko: “Den Dios mi a pone mi konfiansa; lo mi no tin miedu. Kiko hende por hasi mi?”​—⁠Salmo 56:⁠11.

Nan a bin buska mi den e barak i a saka mi afó. Ta e ora ei un dje bewakernan a keda dal mi i puntra mi: “Ta ken no ta pèrmití bo traha?” I kada biaha mi tabata kontestá ku ta Dios. Ta e ora ei un otro bewaker a bis’é: “Bo por bien stòp. E Bibelforschernan * ei ta laga bo bati nan mata pa nan Dios.” Su palabranan a animá mi sinfin.

Siendo ku limpiamentu di tualèt a sirbi komo straf i tabata e trabou di mas fis ku mi por a imaginá, mi a ofresé pa hasi esei. Mi a keda kontentu ku nan a manda mi hasi esei pasobra e tabata un trabou ku mi por a hasi ku mi konsenshi trankil. Un mainta e komandante dje kampamentu, un hòmber ku tur hende tabatin miedu di dje, a pasa. El a para mi dilanti i a bisa: “Ta bo ta e hudiu ku no kier traha?”

“Bo por mira ku mi ta trahando,” mi a kontestá.

“Pero lo bo no traha pa kontribuí ku e guera, no ta asina?”

“No,” mi a kontestá. “Dios no kier esei.”

“Pero no ta mata bo ta mata hende, tòg?”

Mi a splik’é ku si mi yuda traha arma, lo mi ta violando mi konsenshi kristian.

El a kita mi basora i a bisa: “Mi por mata bo ku esaki, no ta asina?”

“Esei ta sigur,” mi a kontestá, “pero un basora no ta trahá pa esei. Un skopèt sí.”

Nos a papia tokante e echo ku Hesus tabata  un hudiu i tambe ku maske mi ta hudiu, mi a bira Testigu di Yehova. Ora el a kana bai, e otro prezunan a bini serka mi, sorprendí ku mi tabatin e kurashi di papia asina trankil ku e komandante dje kampamentu. Mi a bisa nan ku no tabata asuntu di tin kurashi, sino ku mi por a hasié pasobra mi Dios a duna mi e forsa pa hasi esei.

Kon Mi A Sobrebibí Fin dje Guera

Dia 10 di aprel 1945, segun ku e forsanan aliá tabata aserká Beendorff, nos mester a keda pará kasi henter dia den kurá pa kontrolá lista di presensia. Despues di esei nan a pèrta nos, 150 hende muhé, den treinnan di transportá baka, sin kuminda ni awa. E treinnan a sali pa un destinashon deskonosí, i pa vários dia nos a keda kore bai-bini entre e zonanan di kombate. Algun prezu a choka otro mata pa asina traha mas lugá den e wagònnan, i komo resultado, hopi dje muhénan a haña ‘inzinking.’ Loke a yuda mi soportá e situashon tabata mi konfiansa den Yehova su kuido.

Riba un dia nos trein a para serka di un kampamentu di hende hòmber, i nan a pèrmití nos sali pafó. Nan a duna un par di nos hèmber pa bai kohe awa n’e kampamentu. Ora mi a yega n’e kranchi mi a kalma mi set promé, kaba mi a yena e hèmber. Ora mi a bai bèk, e muhénan a ataká mi manera bestia salbahe. Nan a basha tur e awa den e hèmber abou. E miembronan élite di Hitler su bewakernan (SS) a djis para hari. Diesun dia despues, nos a bin terminá na Eidelstedt, un kampo den bisindario di Hamburg. Rònt di mitar di nos grupo a muri a konsekuensia dje severidat dje biahe.

Un dia na Eidelstedt, mi tabata lesa Beibel pa un par di hende muhé. Di ripiente, e komandante dje kampo tabata pará na bentana. Nos a spanta mashá pasobra Beibel tabata un buki prohibí den e kampo. E komandante a kana drenta, kita e Beibel, i a bisa: “Kier men esaki ta Beibel, ha?” Mi a sinti un gran alivio ora el a duna mi e bèk, i a bisa: “Si un dje muhénan muri, e ora ei abo tin ku lesa algu for di dje na bos haltu.”

Reenkuentro ku Otro Testigu

Nos liberashon a tuma lugá 14 dia despues, i Krus Kòrá a hiba nos na un skol pegá ku Malmö, Suesia. Ei, nan a tene nos den karentena pa un tempu. Mi a pidi un dje personanan ku tabata kuida nos si e por a laga Testigunan di Yehova sa ku mi tabata den e sentro di refugiado. Un par di dia despues, nan a yama mi nòmber. Ora mi a bisa e señora ku mi  ta un Testigu, el a kuminsá yora. E tambe tabata un Testigu! Despues ku el a kalma, el a bisa mi ku e Testigunan na Suesia semper a resa pa nan rumannan kristian ku tabata den e kamponan di konsentrashon nazi.

Dje dia e padilanti, tur dia un ruman muhé tabata bini ku kòfi i kos dushi. Despues ku mi a bandoná e sentro di refugiado, nan a transferí mi na un lugá serka di Göteborg. Einan un atardi e Testigunan a organisá un reunion tur afó pa mi. Maske mi no por a komprendé nan, tabata konmovedor di por ta rondoná un biaha mas pa mi rumannan.

Miéntras mi tabata na Göteborg, mi a risibí un karta di un Testigu na Amsterdam ku a informá mi ku mi yunan Silvain i Carry i tur mi famianan a ser arestá i ku nunka mas nan no a regresá. Ta mi yu muhé Johanna i mi ruman muhé mas chikí so a sobrebibí. Poko tempu pasá mi a mira nòmber di mi yu hòmber i mi yu muhé den un registro di hudiunan ku nan a mata ku gas na Auschwitz i Sobibor.

Aktividat Despues di Guera

Mi a regresá Amsterdam i a uni atrobe ku Johanna, ku pa e tempu ei tabatin sinku aña, i mesora mi a kuminsá sali den e ministerio atrobe. Tabatin biaha ku mi a topa miembronan di NSB, e Movementu Hulandes di Sosialismo Nashonal, e partido polítiko ku a kolaborá ku e alemannan. Ta e hendenan aki a yuda masakrá kasi henter mi famia. Mi mester a superá mi rabia pa mi por a kompartí e bon nobo tokante e Reino di Dios ku nan. Mi a keda kòrda mi mes ku ta Yehova ta esun ku ta mira kurason i ku na final di kuenta ta é ta esun ku ta husga, no ami. I mi a ser bendishoná mashá pa esei!

Mi a kuminsá un studio di Beibel ku un señora kende su kasá tabata den prizòn pasobra el a kolaborá ku e nazinan. Ora mi tabata subi trapi pa bai nan kas, mi sa tende e bisiñanan bisa: “Wak! E hudiu ei ta bishitando e hendenan di NSB atrobe.” Pero apesar di oposishon severo di su kasá enkarselá, ku tabata masha kontra hudiu, e señora aki huntu ku su tres yu muhénan a bira Testigu di Yehova.

Mi a keda hopi kontentu ora ku despues mi yu muhé Johanna a dediká su bida na Yehova. Ami kuné a muda bai sirbi kaminda tabatin mas mester di proklamadó di Reino. Nos a disfrutá di hopi bendishon spiritual. Awor mi ta biba den un pueblito den parti zùit di Hulanda, i ei mi ta partisipá den e predikashon mas tantu ku mi por huntu ku e kongregashon. Ora mi wak bèk, e úniko kos ku mi por bisa ta ku nunka mi a sinti ku Yehova a bandoná mi. Semper mi a sinti ku Yehova i su Yu stimá, Hesus, ta ku mi, asta durante e periodo di mas duru.

Durante e guera, mi a pèrdè mi kasá, dos di mi yunan i gran parti di mi famia. Sin embargo, mi speransa ta ku lo mi mira nan tur atrobe djis akí den Dios su mundu nobo. Ora mi ta mi so i mi ta kòrda riba loke mi a pasa aden, mi ta reflekshoná ku goso i gratitut riba e palabranan dje salmista: “E Angel di SEÑOR ta kampa rònt di esnan ku ta tem’É, i ta reskatá nan.”​—⁠Salmo 34:⁠7.

[Nota]

[Plachi na página 21]

Hudiunan ta ser hibá Alemania for dje kampo di Westerbork

[Rekonosementu]

Herinneringscentrum kamp Westerbork

[Plachi na página 22]

Ami ku mi yunan Carry i Silvain; tur dos a muri den e Holokousto

[Plachi na página 23]

Tempu mi tabata den karentena na Suesia

[Plachi na página 23]

Mi karchi temporal di identifikashon pa mi por a repatriá

[Plachi na página 24]

Ami ku mi yu muhé Johanna awe