Sosten i Kompashon for di Tur Skina

BOLUNTARIONAN a bini for di tur skina di Merka i tambe for di otro pais. Un dje boluntarionan ei tabata Tom (potrèt ariba) di 29 aña, un bombero di Ottawa, Kánada. El a bisa Spièrta!: “Mi a mira loke a pasa na televishon i mi kier a duna sosten moral na mi kompañeronan bombero na New York. Mi a bini ku outo djabièrnè, i djasabra mi a bai Ground Zero (e episentro dje desaster) pa ofresé mi yudansa. Nan a pone mi traha den e asina yamá brigada di hèmber, sakando piedra i fragmentonan ku hèmber.

Lentamente nos a sefta e ruina, skòp pa skòp, buskando kosnan ku lo por identifiká e bomberonan ku a muri. Mi a haña un hèrmènt di Halligan ku nan ta usa pa habri porta di lòk, i tambe un par di konekshon di un slan. Tabata un trabou duru i kuidadoso. A tuma dos ora pa 50 boluntario yena un solo dòmtrùk.

Djaluna, 17 di sèptèmber, nos a saka kurpa di algun bombero ku a kore drenta e edifisio e djamars anterior. Nunka lo mi lubidá e esena. Tur e trahadónan di reskate a stòp di traha, kita nan hèlm, i a para, komo muestra di rèspèt pa nos koleganan ku a muri.

Ora mi tabata pará ta mira e esena na Ground Zero mi a realisá di ripiente ku bida ta hopi frágil awe. Esei a pone mi reflekshoná riba mi bida, mi trabou i mi famia. Apesar dje riesgonan, mi trabou ta masha rekompensador, mi por yuda hende i asta skapa bida.”

Testigunan Ta Duna Yudansa Práktiko

E promé dos dianan dje desaster, rònt di 70 hende a buska refugio na e sede mundial di Testigunan di Yehova. Algun di nan ku a pèrdè nan kamber di hotèl i nan ekipahe, a haña un kaminda pa keda i otro paña. Tambe nan a haña kuminda. Pero kisas mas importante ainda, nan a haña sosten emoshonal serka ansianonan kristian eksperensiá.

Tambe Testigunan di Yehova a manda ekipo di emergensia i artíkulonan di nesesidat pa e gruponan di trahadó di reskate ku tabata traha n’e sitio ku nan a yama Ground Zero. Tambe nan a yuda e kuerpo di bombero ku transpòrt pa nan por a hiba bomberonan n’e área di reskate. Ricardo (na banda drechi ariba), un Testigu di Yehova di 39 aña ku ta rekohé sushi, a partisipá den e trabou di limpiesa huntu ku sentenáres di otronan. Nan tabata saka tonelada di ruina tur dia. Ricardo a konta Spièrta!: “Loke bo tabata mira a kousa masha hopi strès, foral p’e bomberonan ku tabata buska nan kamaradanan pèrdí. Mi a mira nan saka un bombero ku  tabata bibu. Un otro bombero a muri ora un kurpa a kai fo’i laira riba dje. Hopi bombero tabata yora. Ami mes no por a wanta mas i mi a yora. Riba e dia ei no tabatin hende ku mas kurashi ku nan.”

“Tempu i Suseso Imprevisto”

Míles di hende a muri den e desaster. Entre esakinan tin por lo ménos 14 Testigu, kendenan tabata n’e lugá di tragedia òf eibanda. Joyce Cummings, di 65 aña i originalmente di Trinidad, tabatin afsprak ku un dentista pegá ku World Trade Center. Desafortunadamente, e afsprak tabata rònt dje ora di desaster. Ta parse ku el a hala hopi huma aden i nan a hib’é purá hospital, pero dòkternan no por a skap’é. E tabata un dje hopi kasonan di hende ku a sufri e efekto di “tempu i suseso imprevisto.” (Eklesiástes 9:⁠11, NW ) Joyce tabata konosí komo un predikadó ku hopi selo.

Calvin Dawson (wak e kuadro) tabata traha na un kompania di bolsa di balor na piso 84 dje toren zùit. E tabata den su ofisina i tabatin un bon bista riba e toren nort djis despues ku avion a dal den dje. Su doño di trabou, ku no tabata den ofisina, a bèl na telefon pa haña sa kiko a pasa. E ta konta: “Calvin tabata purba konta mi kiko el a mira. E di: ‘Hende ta bulando for di bentana!’ Mi di kuné p’e sali for di einan i saka tur hende fo’i ofisina.” Calvin no a logra sali na tempu. Su doño di trabou ta sigui bisa: “Calvin tabata un hòmber maravioso i nos tur tabata apresi’é, asta algun di nos ku no tabata spiritual. Nos a atmirá kon religioso i komprensivo e tabata.”

Un otro víktima Testigu tabata James Amato (página 10, banda drechi abou), tata di kuater yu i komandante den e kuerpo di bombero di New York. Hende ku konos’é a bisa ku e tabatin asina tantu kurashi ku “e ta subi drenta un edifisio na kandela maske hende ta kore bai.” Despues di su morto, James a ser promové n’e rango di hefe di batayon.

 Un otro Testigu bombero, ku shete aña di eksperensia, tabata George DiPasquale. E tabata kasá ku Melissa i tabatin un yu muher di dos aña, Georgia Rose. E tabata un ansiano den un kongregashon di Testigunan di Yehova na Staten Island i tabata na piso 10 di toren zùit ora e toren a basha abou. E tambe a pèrdè su bida miéntras ku e tabata purba salba otro hende.

Esakinan ta solamente dos dje sentenáres di bombero, polis i trahadónan di reskate ku a pèrdè nan bida miéntras nan ku kurashi tabata purba skapa hende. Nos no por kaba di enfatisá e balentia dje hòmbernan aki. E alkalde di New York City, Rudolph Giuliani, despues a bisa un grupo di bombero ku a risibí promoshon: “E echo ku boso tabata dispuesto pa sigui padilanti ku kurashi bou dje sirkunstansianan di mas difísil ta un inspirashon pa nos tur. . . . I no tin . . . mihó ehèmpel di kurashi ku e Kuerpo di Bombero di New York City.”

Un Sirbishi di Konsuelo

Durante e dianan despues dje tragedia, rònt di 900.000 Testigu di Yehova na Merka a hasi un esfuerso uní rònt e nashon pa ofresé konsuelo na esnan ku tabata pena. Amor pa próhimo a impulsá nan pa konsolá esnan na luto. (Mateo 22:39) Den nan trabou di predikashon nan a purba indiká e úniko berdadero speransa pa humanidat angustiá.​—⁠2 Pedro 3:⁠13.

E Testigunan a demostrá kompashon ora nan a aserká hende en general. Nan intenshon tabata pa ofresé konsuelo for dje Skritura i imitá e ehèmpel refreskante di Kristu, kende a bisa: “Bin serka mi tur ku ta kansá i kargá, i lo mi duna boso sosiegu. Tuma mi yugo riba boso, i siña di mi, pasobra mi ta mansu i humilde di kurason; i boso lo haña sosiegu pa boso alma. Pasobra mi yugo ta suave i mi karga ta lihé.”​—⁠Mateo 11:​28-30.

Outoridatnan a permití gruponan di ansiano Testigu di Yehova di kongregashonnan lokal di Manhattan drenta den e área di Ground Zero pa papia i konsolá e trahadónan di reskate. E reakshon tabata hopi bon. E ansianonan aki a komentá lo siguiente: “Awa a yena wowo di algun dje hòmbernan aki ora nos a lesa tekstonan bíbliko ku nan.” Tabatin trahadó di reskate ta sosegá riba un boto na un waf. “E hòmbernan tabata mustra totalmente abatí, kabes abou, simplemente inkapas pa kaba di realisá loke nan a mira. Nos a sinta huntu ku nan i a lesa tekstonan for di Beibel. Nan a gradisí nos mashá ku nos a bini, i nan a bisa ku realmente nan tabatin mester dje konsuelo aki.”

Hopi bes e hendenan ku e Testigunan a papia kuné despues dje tragedia tabata kier algu di lesa, i nan a parti míles di foyeto grátis. Algun dje foyetonan aki tabata Ora un Persona Stimá Muri, Hamas Lo Yega di Tin un Mundu Sin Guera? i Dios Realmente Ta Interesá den Nos? Tambe nan a duna atenshon spesial na e seri di artíkulo di portada di dos edishon di Spièrta!: “E Kara Nobo di Terorismo” (na spañó, 22 di mei 2001) i “Kon pa Superá e Trastorno di Strès Post-troumátiko” (na spañó, 22 di ougùstùs 2001). Den hopi kaso e Testigunan a splika e speransa bíbliko di un resurekshon. (Huan 5:​28, 29; Echonan 24:15) Probablemente miónes di hende a ser alkansá ku e mensahe konsolador aki.

Esaki Mester Pone Nos Reflekshoná

Tragedianan manera esun aki na New York City mester pone nos tur reflekshoná riba kiko nos ta hasiendo ku nos bida. Nos ta bibando solamente pa metanan egoista, òf nos ta purba kontribuí n’e felisidat di otro hende? Profeta Mikéas a puntra: “Kiko SEÑOR ta eksigí di bo, si no ta pa hasi hustisia, pa stima miserikòrdia, i pa kana humildemente ku bo Dios?” (Mikéas 6:⁠8) Humildat mester impulsá nos pa akudí n’e Palabra di Dios pa haña e berdadero speransa p’e mortonan i pa haña sa kiko Dios lo hasi pronto pa reestablesé kondishonnan di Paradeis riba e tera aki. Si bo kier sa mas tokante Beibel su promesanan, nos ta enkurashá bo pa tuma kontakto ku Testigunan di Yehova den bo bisindario.​—⁠Isaías 65:​17, 21-25; Revelashon 21:​1-4.

[Kuadro/Plachinan na página 11]

E ORASHON DI TATIANA

Lena, biuda di Calvin Dawson, a konta Spièrta! dje orashon ku su yu muher di shete aña a hasi un par di dia despues ku el a haña sa ku su tata lo no bini kas for di trabou. Lena a kaba di hasi orashon, i Tatiana a pidi: “Mami, mi por hasi un orashon?” E mama a bai di akuerdo. Tatiana a resa: “Yehova, nos Tata den shelu, nos kier yama bo danki pa e kuminda aki i pa e dia di bida aki. I nos kier pidi bo pa bo spiritu ta huntu ku ami ku Mami pa asina nos por ta fuerte. I nos kier pidi bo pa bo spiritu kompañá Papi, pa asina e por ta fuerte ora e bini bèk. Ora e bini bèk, lagu’é ta bon, fuerte i felis i salú, i nos lo mir’é atrobe. Den nòmber di Hesus . . . i, i no lubidá di hasi Mami fuerte. Amèn.”

Komo ku Lena no tabata sigur ku Tatiana a komprendé kiko ta kiko, el a bis’é: “Tiana, esei tabata bunita. Pero Dushi, bo sa sí ku Papi no ta bini bèk, no?” Mesora, Tatiana su kara a mustra ku el a keda di shòk. E di: “E no ta bini bèk?” Su mama di: “No. M’a kere ku mi a bisa bo esei. M’a kere ku bo a komprendé ku Papi no ta bai bini bèk.” Tatiana di: “Pero semper Mami a bisa mi ku lo e bini bèk den e mundu nobo!” Realisando porfin kiko su yu muhé tabata kier men, Lena a bisa: “Despensa mi, Tatiana. M’a komprendé bo robes. M’a kere bo tabata kier men ku Papi lo bini kas bèk mañan.” Lena a remarká: “Mi a sinti mi bon ku e mundu nobo ta asina real p’e.”