Un Hóben Orguyoso di Su Religion

TEMPU Andrew tabatin 13 aña, e mester a traha un proyekto di skol riba e tópiko herensia kultural. E ta konta: “Na promé instante mi a pensa di skirbi tokante mi tawela, pero despues mi a pensa: ‘Hé, warda un ratu! Mi ta un Testigu di Yehova. Esaki ta un bon chèns pa mi papia tokante mi religion!’

Mi a duna mi proyekto e tema ‘Para Firme,’ i mi a traha un poster grandi ku a mustra e persekushon feros ku Testigunan di Yehova a konfrontá na Alemania na man dje nazinan. Mi tabatin vários artíkulo komo yudansa visual, entre otro, un duplikado di un unifòrm ku un triángulo püs i vários potrèt i karta di famia Kusserow. * Pa parti pa bishitante, mi tabatin kopia dje karta ku Testigunan di Yehova a manda p’e gobièrnu aleman. Un karta den kua e Testigunan, den un forma polítikamente neutral pero tòg firme, a kondená e aktonan inhustu kometé kontra Testigunan di Yehova. Banda di mi stènt mi a laga e video Testigunan di Yehova Ta Para Firme Kontra Atake Nazi pasa kontinuamente. Tambe mi a pone vários Beibel, foyeto i tratado komo ekshibishon.

Promé tur studiante i maestro di skol por a bin mira nos proyektonan den e sala di deporte. E siguiente anochi famia i amigunan tabata invitá. Hopi hende a hasi mi pregunta, komo ku nan no tabata sa mes ku Testigunan di Yehova a ser persiguí dor di nazi.”

Andrew ta atmití ku e mester a tuma un kurashi pa papia tokante su religion. El a bisa: “Mi tabata sa ku algun hende lo a tenta mi, pero lo mi a sinti mi mas malu si mi no a hasié. Mi proyekto tabata trata di hende ku a sakrifiká nan bida pa motibu di nan fe den Yehova, pues mi a pensa den mi mes ku lo mínimo ku mi por a hasi ta wanta un tiki krítika.”

Na final di kuenta, Andrew a keda kontentu ku el a probechá dje chèns aki pa duna testimonio. El a bisa: “Mi tabatin hopi kòmbersashon tokante e motibu dikon nos no ta bai guera, i mi a laga Beibel, buki i tratado serka hende interesá.” Anto el a agregá: “Mi no por kòrda un otro okashon ku mi tabata mas orguyoso di ta un Testigu di Yehova.”

[Nota]