“E Dia Mas Felis di Nos Bida”

KASAMENTU ta un okashon di goso. Hopi pareha ta bisa: “Esei tabata e dia mas felis di nos bida.” Pero tambe e por ta un dje dianan mas pisá. E brùit i brùidehòm i nan famia kisas ta sinti un strès i kansansio intenso. Esaki ta debí na tur e desishon i preparashonnan ku mester hasi, i tambe debí na tur e hendenan ku e brùit i brùidehòm lo topa riba e dia ei.

E dia di kasamentu ta marka komienso di un bida nobo pa e pareha. Pero no ta nan bida so ta kambia. Komo ku e matrimonio di un yu muhé, un yu hòmber, un ruman muhé òf un ruman hòmber hopi bes ta nifiká ku un ser kerí ta bai forma su mes hogar, e famia hopi bes tin sintimentunan miksto.

Kustumbernan relashoná ku kasamentu ta diferente den kada pais, i no ta posibel pa trata nan tur. E artíkulonan aki lo konsentrá riba loke a bira tradishonal den paisnan oksidental i otro paisnan similar. Na e lugánan ei, kasa por ta un asuntu masha karu. Tin hende ta gasta kasi un fortuna na kosnan relashoná ku e dia di kasamentu, entre otro, na hür un sala òf restorant pa tene resèpsi i pa laga sirbi kuminda. Segun kálkulo, na Italia un kasamentu normal ta kosta riba 18.000 florin. Na Hapon, meskos ku otro kaminda, e montante ei por ta mas haltu. Generalmente, no ta e brùit ku e brùidehòm ta paga pa tur esei. Ta nan mayornan.

Kasamentu ta un negoshi lukrativo pa hopi kompania. Nan ta promové e konsepto di un kasamentu “perfekto,” kaminda no falta nada. Nan ta duna di komprendé ku al fin i al kabo, “esaki ta e dia mas felis di bo bida!” Pues anto, nan ta ofresé un kantidat di produkto i servisio “esensial” pa hasi bo gran dia, un dia “perfekto.” Bo por haña invitashonnan di un karakter individual, bo shimis di brùit “ideal,” shimis pa ‘bruidsmeisje’ i smoking òf bachi dèfteg pa hende hòmber ku ta sirbi kasamentu. Anto tambe tin flor, limusin, kisas un restorant kaminda lo sirbi un bankete, un sakadó di potrèt, un banda, i otro kosnan mas. E lista di tur loke un brùit i brùidehòm lo por deseá, i tambe e lista di gastu ku ta kompañ’é, por pone hopi tata tembla.

Den vários komunidat hende ta duna hopi importansia na kumpli ku tradishon. Tin henter un seri di akshon i gesto fiho ku mester tuma lugá, i nan ta ferwagt dje brùit i brùidehòm ku nan lo kumpli ku nan. Sí, tin hopi kos di kòrda, pero no tin hopi tempu pa organisá tur esei.

Esaki ta un prospekto emoshonante òf desanimante? Sea kual sea bo kontesta, ora bo ta pensa riba tur loke un kasamentu ta enserá esei ta lanta vários pregunta. Kiko kasa ta nifiká awendia? Di bèrdat bo mester di tur e kosnan aki pa bo por kasa “na drechi”? Kon bo por vense e vários difikultatnan práktiko i emoshonal?

Apesar di tur e strès, hopi hende a planea e detayenan di nan kasamentu eksitosamente i a disfrutá dje okashon. Tal bes nan eksperensia por yuda otronan prepará pa enfrentá e mesun evento. Tambe tin prinsipionan bíbliko ku por yuda ora di planea kasamentu ya asina e dia lo resultá di ta plasentero, felis i edifikante pa tur hende.