For di Nos Lektornan

Welonan Mi a kaba di lesa e artíkulo “Hóbennan Sa Puntra . . . Kon Mi Por Bira Mas Será ku Mi Welonan?” (8 di yüni 2001) Pa hopi tempu mi mayornan a animá mi pa mi sera amistat ku mi welonan, pero komo ku semper tabatin un rivalidat entre mi mayornan i mi welonan part’i mama, mi a sinti semper ku mi no mester papia ku nan. E artíkulo aki a yuda mi realisá ku ta Yehova kier pa mi tin amistat ku nan. En bes di skohe parti pa un òf e otro, lo mi skohe parti pa Yehova so.

C.L.M., Merka

E artíkulonan tokante welonan tabata tremendo! Mi a keda masha kontentu ku boso a menshoná pa skirbi karta. Asta algun di nos ku ta ‘mas yòn’⁠—⁠mi tin 36 aña⁠—⁠ta warda tur karta òf karchi ku hende manda pa nos. Ta hopi dushi pa haña algu otro fuera di resibu pa paga i pòst di propaganda!

M. Q., Merka

Mi kier yama boso danki pa e artíkulonan tokante welonan den e edishonnan di 8 di mei i 8 di yüni 2001. Ounke mi wela ta biba leu for di mi, mi tin un amistat yen di amor kuné. Ta presis manera boso a deskribí den e artíkulonan. Mi wela ta un Testigu di Yehova, i el a duna mi hopi konosementu spiritual. Tin biaha nos ta prepará huntu p’e reunionnan kristian. Mi amor pa Yehova ta krese kada bes ku mi mira ku kuantu smak mi wela ta sirbié. E artíkulonan aki ta yuda mi mantené e amistat spesial aki. Masha masha danki!

G. M., Yugoslavia

Mi tin un pregunta. Mi tawela ta hopi malu, i mi wela kasi no tin plaka. Kon mi por bira mas será ku nan si mi no por bai sali ku nan?

T. O., Merka

“Spièrta!” ta kontestá: Si bo welonan ta biba serka, podisé bo por bai bishitá nan òf papia ku nan na telefon de bes en kuando. I dor ku nan ta den e situashon ei, podisé bo por asta hasi algun rospondi pa nan. Manera e artíkulo a bisa, skirbi karta por ta un otro manera pa sera mas ku bo welonan. En todo kaso, bo welonan sin duda lo apresiá kualkier kontakto ku bo por tin ku nan.

Bon Salú Mi a haña masha hopi konsuelo i animashon mes for dje seri “Bon Salú pa Tur Hende Ta Posibel?” (8 di yüni 2001) Mi ta sufri di un problema sikiátriko, i den pasado mi a pensa riba suisidio. Tur dia mi ta puntra mi mes: ‘Kon mi ta bai pasa dor dje dia aki?’ E revista aki a kòrda mi riba Yehova su promesa na Revelashon 21:4 ku ta bisa ku lo e ‘seka tur lágrima di nos wowo.’

C. T., Hapon

Masha danki pa boso artíkulonan ekselente. Siendo un dòkter naturista, mi ta anhelá e dia ora ku lo no tin malesa mas. E ora ei lo mi por sosegá di mi trabou komo dòkter i kuminsá traha den kunuku, lokual ta mi di dos trabou faborito!

B. C., Merka

Katedralnan Mi a disfrutá dje artíkulo “Katedralnan—Monumento na Onor di Dios òf Hende?” (8 di yüni 2001) Pero no ta asina ku Testigunan di Yehova tambe ta traha Salon di Reino i Salon di Asamblea basta grandi?

R. B., Merka

“Spièrta!” ta kontestá: Nos a kritiká e trahamentu di katedralnan no djis pasobra nan ta grandi, sino pasobra e motivashon pa traha nan hopi bes tabata loke un historiadó a yama e “orguyo arogante” di lidernan religioso. Tambe e finansiamentu dje edifisionan inmenso aki hopi bes tabata un peso masha grandi pa e parokianonan. Na kontraste, Salonnan di Reino i Salonnan di Asamblea ta edifisionan moderá ku no ta ser trahá pa elogiá hende. Mas bien, nan ta sirbi komo lugá di adorashon. E salonnan aki ta ser finansiá dor di kontribushonnan boluntario i nan no ta pone un karga finansiero irasonabel riba ningun hende.