E Punto di Bista Bíbliko

Ken Ta Miguel e Arkangel?

SEGUN Beibel, tin miónes di angel ta biba den e region spiritual. (Daniel 7:​9, 10; Revelashon 5:11) E Skritura, for di kuminsamentu te fin, ta referí sientos di biaha na angelnan ku a keda fiel na Dios. Sin embargo, ta dos dje kriaturanan spiritual aki so ta ser menshoná pa nòmber. Unu ta angel Gabriel, kende personalmente a entregá mensahe for di Dios na tres diferente persona durante un periodo di mas o ménos 600 aña. (Daniel 9:​20-22; Lukas 1:​8-19, 26-28) E otro angel menshoná pa nòmber den Beibel ta Miguel.

Ta opvio ku Miguel ta un angel prominente. Por ehèmpel, e buki di Daniel ta konta ku Miguel a bringa pa e pueblo di Yehova kontra demoñonan malbado. (Daniel 10:13; 12:⁠1) Den Hudas su karta inspirá, Miguel ta konfrontá Satanas den un disputa tokante e kurpa di Moises. (Hudas 9) E buki di Revelashon ta mustra ku Miguel ta bringa kontra Satanas i su demoñonan i ta saka nan for di shelu. (Revelashon 12:​7-9) Beibel no ta deskribí ningun otro angel ku tin un poder i outoridat asina grandi riba Dios su enemigunan. No ta un sorpresa anto ku Beibel apropiadamente ta referí na Miguel komo “e arkangel.” E prefiho “ark” ta nifiká “hefe,” òf “prinsipal.”

E Kontroversia Tokante e Identidat di Miguel

Religionnan di kristiandat, i tambe hudaismo i islam, tin ideanan kontradiktorio riba e tema di angel. Algun splikashon ta vago. Por ehèmpel, The Anchor Bible Dictionary ta bisa: “Kisas tin un solo angel superior i/òf un grupo chikí di arkangel (generalmente kuater òf shete).” Segun The Imperial Bible-Dictionary, Miguel ta e “nòmber di un ser sobrehumano, i relashoná kuné tabatin en general dos opinion kontrali, sea e ta e Señor Hesukristu, e Yu di Dios, òf e ta un di e asina yamá shete arkangelnan.”

Segun tradishon hudiu e shete arkangelnan aki ta Gabriel, Jeremiel, Miguel, Raguel, Rafael, Sariel i Uriel. Di otro banda, islam ta  kere den kuater arkangel, esta, Jibril, Mikal, Izrail i Israfil. Katolisismo tambe ta kere den kuater arkangel: Miguel, Gabriel, Rafael i Uriel. Kiko Beibel ta bisa? Tin vários arkangel?

E Kontesta di Beibel

Fuera di Miguel, Beibel no ta menshoná ningun otro arkangel, ni e Skritura no ta usa e palabra “arkangel” na plural. Beibel ta deskribí Miguel komo e arkangel, i e uso dje artíkulo definí “e” na Hudas 9 ta impliká ku ta Miguel so ta karga e título ei. Pues ta rasonabel pa konkluí ku Yehova Dios a delegá na un di su kriaturanan selestial, na unu so, pleno outoridat riba tur otro angel.

Apart di e Kreador mes, ta un solo persona fiel Beibel ta menshoná ku tin angel bou di su kòntròl, i esei ta, Hesukristu. (Mateo 13:41; 16:27; 24:31) Apòstel Pablo a hasi menshon spesífiko di “e Señor Hesus” i “su angelnan poderoso.” (2 Tesalonisensenan 1:⁠7) I Pedro a deskribí Hesus resusitá bisando: “Kende ta na man drechi di Dios, despues di a subi na shelu, despues ku angelnan i outoridatnan i podernan a wòrdu sometí na dje.”​—⁠1 Pedro 3:⁠22.

Ounke no tin ningun deklarashon den Beibel ku kategórikamente ta identifiká Hesus komo Miguel e arkangel, tin un teksto bíbliko ku ta konektá Hesus ku e puesto di arkangel. Den su karta na e tesalonisensenan, apòstel Pablo a profetisá: “Señor mes lo baha for di shelu ku un gritu [di duna òrdu, NW], ku bos di arkangel i ku tròmpèt di Dios; i e mortonan den Kristu lo lanta promé.” (1 Tesalonisensenan 4:16) E teksto aki ta deskribí ku Hesus a asumí su outoridat komo e Rei Mesiániko di Dios. Sin embargo, e ta papia ku “bos di arkangel.” Ripará tambe ku e tin poder pa lanta morto.

Tempu Hesus tabata riba tera komo hende, el a resusitá vários hende. Hasiendo esei, el a usa su bos pa duna òrdu. Por ehèmpel, ora el a resusitá e yu hòmber morto di un biuda dje stat di Nain, e di: “Hóben, mi ta bisa bo: Lanta!” (Lukas 7:​14, 15) Despues, djis promé ku el a resusitá su amigu Lázaro, Hesus “a yama na bos haltu: ‘Lázaro, bin pafó!’” (Huan 11:43) Pero na e okashonnan aki, Hesus su bos tabata di un hende perfekto.

Despues di su mes resurekshon, Hesus a ser lantá na “un puesto superior” den shelu komo un kriatura spiritual. (Filipensenan 2:⁠9, NW) Ya ku e no ta hende mas, e tin e bos di un arkangel. P’esei ora e tròmpèt di Dios a toka e yamada pa “e mortonan den Kristu” ser lantá pa bai shelu, Hesus a ekspresá “un gritu di duna òrdu,” e biaha aki “ku bos di arkangel.” Ta rasonabel pa konkluí ku ta un arkangel so lo por duna òrdu “ku bos di arkangel.”

Ta bèrdat ku tin otro kriaturanan angelikal di rango haltu, manera serafin i kerubin. (Génesis 3:24; Isaías 6:⁠2) Sin embargo, e Skritura ta señalá Hesukristu resusitá komo e hefe di tur angel: Miguel e arkangel.