Hóbennan Sa Puntra . . .

Ki Malu Tin den Mete ku Kosnan Sobrenatural?

TINERNAN ta realmente interesá den kosnan sobrenatural? Un grupo di investigadó a purba haña sa esei dor di tene un enkuesta entre 115 alumno di vijfde klas bai ariba. E enkuesta a revelá e siguiente estadístika: Mas ku mitar di esnan entrevistá (54 porshento) a bisa ku nan ta interesá den kosnan sobrenatural, miéntras ku un kuart (26 porshento) a bisa ku nan ta “hopi interesá.”

Investigadónan pa e Universidat di Alaska na Anchorage ta skirbi: “Den último añanan tabatin un kantidat di artíkulo den korant i revistanan tokante e supuesto oumento drástiko den aktividat di kulto satániko.” Ekspertonan ta bisa ku tin tiki evidensia konkreto pa apoyá e idea ku satanismo ta reina entre hóbennan. Pero tòg no tin duda ku hopi hóben ta interesá den aspektonan di satanismo i kosnan sobrenatural, ounke e interes ei por ta superfisial.

P’esei algun hóben kisas ta puntra: ‘Ki malu tin den mete ku kosnan sobrenatural?’ Pa haña un kontesta, laga nos konsiderá promé algun manera ku hóbennan ta kuminsá mete ku kosnan sobrenatural.

E Atrakshon pa Kosnan Sobrenatural

Un artíkulo den U.S.News & World Report ta bisa ku “mucha i tinernan awe tin akseso i kontakto ku un kantidat grandi di imágennan i informashon konfuso⁠—⁠i hopi bes perturbador⁠—⁠ku un 20 aña pasá, lo tabata inimaginabel.” Kuriosidat ta pone hopi hóben lesa buki i revista, wak vidio òf sùrf Web site riba Internet ku ta presentá material di kosnan sobrenatural.

Segun BBC News Online, “algun hende ta pensa” ku programanan popular di televishon ku ta presentá bruheria i akshonnan di vampiro “ta stimulá un interes den bruheria serka mucha.” Tambe tin algun músika ‘heavy-metal’ ku ta presentá temanan violento òf tokante demoño. Kolumnista Tom Harpur a skirbi den e korant The Sunday Star di Toronto: “Mi tin ku usa e palabranan mas kategóriko pa atvertí boso di loke ta pasando [den músika]. . . . Nunka mi a yega di mira algu asina degradá. E kantikanan ta opseshoná ku lokura, hende poseí, demoño, dramamentu di sanger, maldishon, tur tipo di violensia, inkluso violashon seksual, maltrato di bo mes kurpa, asesinato i suisidio. Morto i destrukshon, profesianan di kalamidat, rechaso di tur loke ta bon i aseptashon di tur loke ta repugnante i malbado⁠—⁠esakinan ta e temanan.”

Skucha tal tipo di músika realmente ta hiba na komportashon destruktivo? Evidentemente  tabata asina den por lo ménos un kaso: Esun di un hóben di 14 aña na Merka ku a hinka su mama mata i kaba a mata su mes. E murayanan di su kamber tabata tur na poster di músikonan di rock heavy-metal. Despues su tata a supliká: “Bisa mayornan vigilá ki tipo di músika nan yunan ta skucha.” E tata a bisa ku e siman promé ku su yu hòmber a mata e mama, e tabata blo kanta un kantika di rock “tokante sanger i mata bo mama.”

Tambe tin weganan di protagonisá personahe, i algun di nan ta pèrmití e partisipantenan hunga e papel di hasidó di bruha i otro personahenan ku podernan sobrenatural. Hopi dje weganan aki ta kontené violensia demoniako. *

Sin embargo, Mediascope, un organisashon ku ta hasi investigashon, ta informá: “Estudionan ta mustra ku ora hóbennan ta preferá músika heavy-metal esei por ta un indikashon importante di nan isolashon for di sosiedat, uso di droga i alkohòl, trastorno sikiátriko, riesgo di suisidio . . . òf komportashon di tuma riesgo durante adolesensia. Pero no ta músika ta e kousa dje komportashonnan aki. Ekspertonan ta asumí ku tinernan ku ya ta luchando ku e problemanan ei kisas ta ser atraí na músika heavy metal, pasobra e letranan ta ekspresá nan propio preokupashonnan.”

Podisé no ta tur investigadó ta di akuerdo ku tin peliger den skucha músika satániko. Pero si un hende ta konstant bezig ku vidio, músika òf weganan ku ta enfatisá violensia i destrukshon propio, esei no ta venená su mente? Sin embargo, tin un peliger asta mas serio pa kristiannan ku ta mete ku kosnan sobrenatural.

Dios Su Punto di Bista di Kosnan Sobrenatural

Na 1 Korintionan 10:⁠20, apòstel Pablo ta spièrta kristiannan: “Mi no kier pa boso tin komunion ku demoño.” Ken e demoñonan ta, i dikon ta asina peligroso pa mete ku nan? Simpel bisá, demoño ta eks-angel ku a skohe pa sigui Satanas e Diabel. E nòmber Satanas ta nifiká “Resistidó” i Diabel ta nifiká “Kalumniadó.” Segun Beibel, e eks-yu di Dios aki ku tabata un  angel a hasi su mes un resistidó i un kalumniadó dor di skohe pa rebeldiá kontra Dios. Ku tempu, el a tenta otro angelnan pa djòin e den su proseder rebelioso. Asina e aliadonan aki di Satanas a bira demoño.​—⁠Génesis 3:​1-15; 6:​1-4; Hudas 6.

Hesus a yama Satanas “e prens di e mundu aki.” (Huan 12:31) Satanas i su demoñonan tin “gran furia” pasobra nan destrukshon ta serka. (Revelashon 12:​9-12) No ta un sorpresa anto ku hende ku a mete ku demoño a ripará ku nan ta kruel i malisioso. Un señora na Sürnam ku a lanta den un famia ku a praktiká spiritismo a mira personalmente kon e demoñonan “ta gosa di torturá nan víktimanan ku ta resistí.” * P’esei, ta sumamente peligroso pa mete di kualkier manera ku e kriaturanan spiritual kruel aki!

P’e motibu aki, Dios a manda su pueblo di antigwedat, e israelitanan, pa evitá tur kos ku tin di haber ku práktikanan sobrenatural. Deuteronomio 18:​10-12 ta spièrta: “Ken ku hasi e kosnan aki ta un abominashon na SEÑOR.” Kristiannan tambe a haña e spièrtamentu ku Dios lo destruí “hasidónan di bruha.” (Revelashon 21:⁠8) Dios ta kondená asta metementu den kosnan sobrenatural. “No mishi ku loke ta impuru,” Beibel ta manda.​—⁠2 Korintionan 6:⁠17.

Kon pa Stòp ku Kosnan Sobrenatural

Bo a kometé e eror di mete ku kosnan sobrenatural? Konsiderá anto loke a tuma lugá den promé siglo na e stat Efeso. Hopi hende einan “tabata praktiká magia.” Pero algun di nan a ser konmoví dor dje obranan poderoso ku apòstel Pablo a hasi ku yudansa di spiritu santu. Ku ki resultado? “Hopi di esnan ku tabata praktiká magia a trese nan bukinan huntu i a kima nan dilanti di tur; i nan a kalkulá nan balor i esaki tabata sinkuenta mil pida plata. Asina e palabra di Señor tabata krese poderosamente i tabata prevalesé.”​—⁠Echonan 19:​11-20.

Kiko esaki ta bisa nos? Ku si un persona kier skapa dje gara di demoño, e tin ku destruí tur kos relashoná ku adorashon satániko! Esaki ta inkluí tur buki, revista, poster, buki di ‘comics,’ vidio, amuleto (artíkulonan ku hende ta bisti pa “protekshon”) i informashon relashoná ku demoño ku e persona a ‘download’ for di Internet. (Deuteronomio 7:​25, 26) Tira afó tur kos ku hende kisas ta usa pa wak destino, manera bola di kristal òf wega di Ouiya. Deshasí tambe di músika òf vidio ku ta presentá temanan satániko.

Pa un persona tira tur e kosnan ei afó e mester di kurashi i e mester ta desididu. Pero e benefisionan por ta grandi. Un señora kristian ku yama Jean * a kumpra un wega di kòmpiuter ku na promé instante a parse inosente. Pero segun ku e tabata pasa dor di e vários nivelnan dje wega, el a deskubrí ku algun aspekto dje wega tabatin di haber ku spiritismo. No a tarda hopi ku el a kuminsá haña nachtmerrie violento! Jean ta konta: “Mi a lanta meianochi i destruí e CDnan dje wega.” Ku ki resultado? “For dje dia ei mi no tabatin mas problema.”

Si bo mustra ku bo ta ègt desididu pa stòp, lo bo logr’é. Kòrda kon desididu Hesus tabata ora Diabel a purba tenta Hesus pa ador’é. “Hesus a kontest’é: ‘Bai for di akinan, Satanas! Pasobra ta pará skirbí: “Adorá SEÑOR bo Dios, i sirbi e so.” ’ E ora ei Diabel a lagu’é.”​—⁠Mateo 4:​8-11.

No Lucha Bo So Kontra e Demoñonan

Apòstel Pablo ta kòrda nos ku tur kristian ta “lucha . . . kontra e forsanan spiritual di maldat den e lugánan selestial.” (Efesionan 6:12) Pero no purba lucha bo so kontra Satanas i su demoñonan. Buska yudansa serka bo mayornan temeroso di Dios i ansianonan den e kongregashon kristian lokal. Kisas bo ta sinti bèrgwensa di konfesá ku bo a mete ku kosnan sobrenatural, pero si bo konfesá, esei por yuda bo haña e apoyo ku bo tin asina tantu mester di dje.​—⁠Santiago 5:​14, 15.

Kòrda tambe ku Beibel ta bisa: “Resistí Diabel i e lo hui for di boso. Hala serka Dios i e lo hala serka boso.” (Santiago 4:​7, 8) Sí, bo tin e apoyo di Yehova Dios! Lo e yuda bo libra for dje trampa di kosnan sobrenatural.

[Nota]

[Plachi na página 26]

Deshasí di tur opheto relashoná ku adorashon satániko

[Plachi na página 26]

Tene kuidou ku Web site ku ta promové spiritismo