Matrimonio Mester Ta un Union Permanente

BASÁ riba e final di hopi pelíkula, matrimonio ta un meta deseabel. Hopi bes, e hòmber i e muhé al final ta haña otro, ta kasa i biba “felis pa semper.” Den pelíkula, esei por lo general ta fin dje historia.

Pero den bida real, kasamentu no ta fin dje historia, sino mas bien e komienso di un bida nobo huntu. I ta di spera ku manera Eklesiástes 7:8 ta bisa, “fin di un asuntu ta mihó ku su prinsipio.”

Un Union Permanente

Un kristian tin mester di sano huisio i e abilidat pa mira mas aleu. Pa un matrimonio por dura i ser un union satisfasiente, e mester tin un base sólido. Si no ta asina, e tenshon despues di kasamentu lo por ta hopi mas grandi ku e tenshon promé kuné. Un kristian no por drenta matrimonio ku e pensamentu: ‘Si e kos aki no resultá, mi por divorsiá.’ Mester konsiderá matrimonio komo un union permanente.

Hesus a mustra bon kla ku matrimonio mester ta permanente ora el a kontestá un pregunta ku nan a hasié tokante si ta korekto pa divorsiá. El a deklará: “Boso no a lesa ku [Dios] ku a krea hende for di prinsipio ‘a traha nan hòmber i muhé,’ i a bisa: ‘Pa e motibu aki un hòmber lo bandoná su tata i mama i lo uni ku su esposa; i nan dos lo bira ún karni’? Asina anto nan no ta dos mas, sino ún karni. P’esei loke Dios a uni, no laga ningun hende separá.”​—⁠Mateo 19:​4-6.

Despues dje Dia di Kasamentu

Hende a yega di bisa korektamente ku den bida di un kristian, e úniko kos mas importante ku su matrimonio ta su dedikashon na Dios. Dedikashon ta mara bo pa semper na e Kreador, i boutismo ta demostrá esei públikamente. Matrimonio ta e deklarashon públiko di ku pa semper lo bo keda fiel na e persona. No ta niun tiki bon pa dediká bo mes na Dios òf drenta den un union matrimonial si bo tin dudanan serio. P’esei, esnan ku tin pensá di kasa tin ku analisá kuidadosamente e kreensianan, metanan, aktitutnan i karakter di nan prospektivo kasá.

Ora e pareha ta hasiendo e preparashonnan pa e kasamentu, bondat, konsiderashon i e  spiritu di koperashon ta kualidatnan importante. Despues, pa e matrimonio por ta eksitoso e kualidatnan ei ta bira asta mas importante. E pareha resien kasá ta tur enamorá, pero despues di kasamentu nan tin ku kòrda tur dia, ku amor “no ta buska su propio interes.” Si konsistentemente nan demostrá amor aña tras aña, “amor nunka no ta faya.” (1 Korintionan 13:​5, 8) Teniendo amor duradero pa otro, lo ta mas fásil pa demostrá Dios su fruta di spiritu, esta, kualidatnan manera: pasenshi, kariño, bondat, suavedat i dominio propio. E kualidatnan aki ta nesesario pa un matrimonio eksitoso.​—⁠Galationan 5:​22, 23.

E parti difísil ta pa sigui demostrá e kualidatnan ei despues dje dia di kasamentu. Sin embargo, e klave pa bo tin éksito den desplegá e bon kualidatnan ei ta esaki: Stima e persona ku bo a kasa kuné, i sea dispuesto pa hasi sakrifisio.

Hesus a bisa ku e mandamentu mas grandi pa hende ta pa stima Yehova, i el a bisa ku e di  dos mas grandi ta: “Stima bo próhimo manera bo mes.” (Mateo 22:39) Un persona kasá su próhimo mas pegá ta su kasá, pasobra nada na mundu por uni dos persona manera matrimonio.

Sin embargo, union físiko so riba su mes no ta garantisá armonia emoshonal. Union di dos kurpa no ta resultá semper den union di pensamentu. Pa e union seksual por duna e máksimo satisfakshon, mester tin un di dos union: union emoshonal i di intenshon. Den mayoria kaso, hasi sakrifisio ta e preis ku un hende tin ku paga pa hasi e matrimonio un éksito. Ken mester hasi sakrifisio? E esposo? E esposa?

Kon pa Demostrá Amor i Onor

E Palabra di Dios ta manda: “Duna preferensia na otro den onor.” (Romanonan 12:10) Si ta posibel, hasi e sakrifisio promé ku bo kasá pidi bo. Bo mes sa ku si bo haña algu despues di hopi pidimentu, ya kaba el a pèrdè un parti di su balor. Mas bien, kada partner den un matrimonio mester kultivá e kustumber di tuma e inisiativa pa demostrá onor na otro.

Por ehèmpel, Beibel ta manda esposonan: “Biba ku boso esposanan ku komprenshon, manera ku un vas mas delikado, komo ku e ta hende muhé; i dun’é onor . . . pa boso orashonnan no wòrdu strobá.” (1 Pedro 3:⁠7) Si un esposo no ta duna su esposa onor, esei lo afektá asta su orashonnan na Dios. Pero kiko duna onor na bo esposa ta nifiká? Esei ta nifiká tene kuenta semper kuné, skucha su opinion, mayoria bes lagu’é skohe promé den vários asuntu. I e esposa por onra su kasá den mesun manera, dor di hasi esfuerso pa ta un yudante koperativo.​—⁠Génesis 21:12; Proverbionan 31:​10-31.

E Palabra di Dios ta bisa: “Esposonan . . . mester stima nan esposa manera nan mes kurpa. Esun ku ta stima su esposa ta stima su mes; pasobra nunka ni un hende no a odia su mes karni, ma ta aliment’é i ta kuid’é, meskos ku Kristu tambe ta hasi ku e iglesia.” Kuantu Kristu a stima su siguidónan? E tabata dispuesto na muri pa nan. Tambe Beibel ta bisa: “Laga kada un di boso [esposonan] stima su esposa manera su mes.” (Efesionan 5:​28-33) I e Palabra di Dios ta bisa esposanan “pa stima nan esposo, . . . siendo sumiso na nan mes esposo, pa e palabra di Dios no wòrdu desonrá.”​—⁠Tito 2:​4, 5.

Tolerá Eror

Siendo ku tur hende ta nase imperfekto, nan lo kometé eror. (Romanonan 3:23; 5:12; 1 Huan 1:​8-10) Pero en bes di hasi un pieu bira un baka, tuma na pechu e konseho bíbliko: “Riba tur kos, keda ferviente den boso amor pa otro, pasobra amor ta kubri un multitut di piká.” (1 Pedro 4:⁠8) E mihó manera pa atendé erornan chikí ta dor di pasa nan por haltu, no keda pensa riba nan. I esei por konta tambe pa erornan mas serio. Kolosensenan 3:​12-14 ta deklará: “Bisti un kurason di kompashon, kariño, humildat, mansedumbre i pasenshi. I boso soportá otro i pordoná otro, si un di boso tin un keho kontra un otro; meskos ku Señor a pordoná boso, asina boso tambe mester hasi. I ademas di tur e kosnan aki bisti amor, kual ta e laso perfekto di unidat.”

Kuantu bes nos mester pordoná e eror i fayonan komun i koriente di nos kasá? Pedro a puntra Hesus: “‘Señor, kuantu bes mi ruman lo peka kontra mi, i ami mester pordon’é? Te shete bes?’ Hesus a kontest’é: ‘Mi ta bisa bo, no te shete bes, sino te setenta bes shete.’” (Mateo 18:​21, 22) Ya ku aki Hesus tabata papia di hende pafó dje union matrimonial, kuantu mas parehanan kasá mester pordoná otro!

Ounke e areglo matrimonial a ser ataká den último añanan, matrimonio lo sigui eksistí den futuro pasobra ta Dios a instituyé i tur kos ku e dekretá ta “masha bon.” (Génesis 1:31) Matrimonio lo no bai fo’i moda. I e por ta eksitoso, foral entre esnan ku ta respetá i apoyá Dios su mandamentunan. Pero e reto ta esaki: E dos personanan lo kumpli ku e promesa ku nan a hasi riba e dia di kasamentu, esta, di stima i kuida otro? Esei sigur por ta un reto i kisas bo tin ku lucha pa sali viktorioso. Pero e resultadonan lo ta bale la pena!

[Kuadro na página 10]

DIVORSIO I SEPARASHON

Dios, Esun ku a originá matrimonio, a diseñ’é pa ta un union permanente. Pero tin motibu bíbliko pa un persona divorsiá di su kasá, i tin ku ta pèrmitié bolbe kasa? Hesus a trata e asuntu ei ora el a deklará: “Mi ta bisa boso, ken ku divorsiá su esposa, si no ta pa motibu di inmoralidat seksual, i kasa ku otro muhé, ta kometé adulterio.” (Mateo 19:⁠9) Infieldat seksual di un kasá ta e úniko base pa un divorsio ku lo pèrmití e kasá inosente bolbe kasa.

Fuera di esei, ounke e palabranan di Beibel na 1 Korintionan 7:​10-16 ta animá kasánan pa keda huntu, nan ta pèrmití separashon. Tin hende ku despues di a hasi hopi esfuerso pa konserbá nan matrimonio, ta sinti ku nan no tin otro opshon sino di separá. Kiko por ta base bíbliko aseptabel pa dal e paso ei?

Un base ta si un persona deliberadamente ta keda sin mantené e famia. Ora un esposo kasa, e ta asumí e responsabilidat di perkurá pa su esposa i yunan. Un hòmber ku deliberadamente no ta perkurá pa e nesesidatnan material di bida “a nenga e fe i ta pió ku un inkrédulo.” (1 Timoteo 5:⁠8) Pues, ta posibel separá for di dje.

Un otro motibu ta abusu físiko ekstremo. Pues anto, si un hòmber ta abusá físikamente di su kasá, e víktima por separá. (Galationan 5:​19-21; Tito 1:⁠7) “Esun ku ta gusta violensia [Dios] su alma ta odia.”​—⁠Salmo 11:⁠5.

Un otro base pa separashon ta ora un persona kreyente su spiritualidat (su relashon ku Dios) ta kompletamente na peliger. Ora e oposishon di un kasá, podisé inkluso restrikshon físiko, ta hasi ku ta imposibel pa e kreyente praktiká adorashon berdadero i ta pone su spiritualidat na peliger, algun kreyente e ora ei a haña ku ta nesesario separá. *​—⁠Mateo 22:37; Echonan 5:​27-32.

Sin embargo, si un persona divorsiá bou di tal sirkunstansia, lo e no ta liber pa bolbe kasa. Segun Beibel, e úniko base legítimo pa divorsio ku ta pèrmití un persona bolbe kasa ta adulterio òf “inmoralidat seksual.”​—⁠Mateo 5:32.

[Nota]

[Plachi na página 9]

Mester konsiderá matrimonio komo un areglo permanente

[Plachi na página 10]

Hesus a bisa ku nos mester pordoná “setenta bes shete”