Pa Kuantu Tempu Mas Persekushon Religioso Lo Sigui na Georgia?

FOR DI E DUSHI WER KANT’I KOSTA di laman Pretu te na e serunan hopi friu di Caucasus, Georgia ta un pais ku un beyesa natural. Mondi será, riu ku koriente fuerte i vayenan bèrdè ta dòrna e region yen di seru aki ku ta keda un pida den Europa i un pida den Asia. Tbilisi, kapital di Georgia, ta un stat drùk kaminda bo ta haña un kombinashon di edifisionan moderno i monumentonan arkitektóniko di pasado. Pero Georgia su poseshon mas balioso ta su pueblo, konosí pa nan lasonan familiar fuerte i dushi hospitalidat.

Durante henter historia e pueblo di Georgia a sufri opreshon. Nan pais a ser invadí dor di romano, perso, bizantino, arabir, turko, mongol, ruso i otronan. Segun un konteo, nan a yega di destruí Tbilisi 29 biaha! * Apesar di tur esei, e habitantenan di Georgia a keda ku nan amor pa bida, arte, kanto i baile, i tambe ku nan reputashon di ta un sosiedat tolerante.

Pero lamentablemente, nos no por bisa esaki mas di tur hende di Georgia. Durante e último dos añanan, un grupo chikí di georgiano a daña e reputashon di nan pais dor di ataká sientos di nan ko-siudadanonan. Multitutnan di atakante furioso a bati hòmber, muhé i mucha inosente, i tambe hende di edat i personanan ku desabilidat. Usando klòp ku klabu na dje i bara di heru, e atakantenan a blousa nan víktimanan su kurpa, kòrta nan kara i habri nan kabes. Dikon nan ta bati siudadanonan inofensivo di Georgia asina ferosmente? Pasobra nan ta Testigu di Yehova, un komunidat kristian ku tabata na Georgia asta promé ku mayoria dje atakantenan ei a nase.

 Di Denunsia te na Atake

Ounke Georgia ta garantisá libertat religioso, ku frekuensia literatura di Testigunan di Yehova tabata ser konfiská. Na aprel 1999, funshonarionan di duana a deklará ku por saka e literatura solamente ku pèrmit di e patriarka, esta, e kabes di Iglesia Òrtodòks di Georgia. * E siguiente luna, a bolbe menshoná nòmber di Iglesia Òrtodòks, e biaha aki den Korte di Distrito di Isani-Samgori. Einan Guram Sharadze, parlamentario i lider dje movementu polítiko “Georgia Riba Tur!,” a entamá un kaso pa purba disolvé e entidatnan hurídiko ku Testigunan di Yehova ta usa. El a akusá e Testigunan di ta antinashonalista i peligroso. Ken tabata respaldá e akusashon di Sharadze? Huntu ku e demanda tabatin un karta di e sekretario di e Patriarka-Lider di Henter Georgia.

Dia 20 di mei 1999, Georgia a aseptá e Tratado Europeo pa Protekshon di Derecho Humano i Libertatnan Fundamental, i asina a komprometé su mes pa apoyá e stipulashonnan dje tratado. Artíkulo 10 ta stipulá: “Tur hende tin derecho riba libertat di ekspreshon. E derecho aki lo enserá libertat di tin nan opinion i di risibí i kompartí informashon i ideanan sin ku outoridat públiko ta interferí, sin importá frontera.” E derecho aki a pone ku oponentenan di e Testigunan a stòp ku nan intento pa prohibí literatura religioso? Di ningun manera!

Dia 21 di yüni 1999, Ofisina dje Patriarka di Henter Georgia a manda un karta p’e hefe di inspekshon di duana, den kua el a insistí ku “mester prohibí distribushon di literatura religioso stranhero.” Ademas, Giorgi Andriadze, bosero ofisial di Iglesia Òrtodòks di Georgia, a deklará ku Testigunan di Yehova ta peligroso i ku mester prohibí nan. Hende no a ignorá e denunsianan aki. Fanátikonan religioso, ku anteriormente a kima literatura di Testigunan di Yehova, awor tabatin konfiansa ku nan lo por ataká e Testigunan mes i keda sin haña kastigu. Djadumingu, 17 di òktober 1999, nan a ataká atrobe.

No Ta Kastigá Akshon di Multitut Violento

E djadumingu ei, un 120 Testigu di Yehova na Tbilisi⁠—⁠hende hòmber, muhé i mucha⁠—⁠a asistí na un reunion religioso. Di ripiente, Vasili Mkalavishvili, un pastor òrtodòks ku a pèrdè su puesto, huntu ku 200 di su siguidónan a basha drenta den e lugá di reunion. * Nan a rondoná e Testigunan i a keda bati nan ku klòp i ku krus di heru. Kuater atakante a gara un Testigu na su brasa i garganta. Nan a manda su kabes abou i a kuminsá feita su kabes miéntras ku e multitut tabata para gosa di su humiashon. Ora ku e multitut frenétiko por fin a bai, 16 Testigu mester a haña tratamentu na hospital. Un hòmber tabatin tres repchi kibrá. Un otro Testigu, un señora di 40 aña ku yama Phati, a konta despues: “Nan a kuminsá grita mi, i un di nan a dal mi ku tur su forsa. El a dal mi den mi kabes, den mi wowonan. Mi a purba tapa mi kara ku mi mannan. Sanger tabata kore na mi dedenan.” Ora ku e hòmber kruel aki a kaba di batié, Phati no por a mira ku su wowo robes. Te awe Phati su wowo a keda malu debí n’e gòlpinan.

E atake skandaloso aki, ku nan a pasa na televishon, a pone Presidente Eduard Shevardnadze ekspresá su mes. E siguiente dia, el a deklará:  “Mi ta kondená e suseso aki i ta kere ku instansianan hudisial mester lanta un kaso kriminal.” Siendo ku e grabashon riba vidio a identifiká e lider dje multitut violento i e otro atakantenan, lo tabata fásil pa sentensiá nan. Sin embargo, despues di dos aña, ainda ningun dje atakantenan no a ser sentensiá.

Mas Kurashi dor di Falta di Kastigu

Outoridatnan⁠—⁠gubernamental i religioso⁠—⁠no a tuma ningun akshon. Pues no ta un sorpresa ku esei a laga e atakantenan komprendé ku nan lo a tolerá violensia. Enkurashá p’e echo ku nan no a haña kastigu, e atakantenan a intensifiká nan proseder destruktivo di hòrta, bati i skòp Testigunan di Yehova den kasnan privá, riba kaya i na lugánan di adorashon. Entre òktober 1999 i ougùstùs 2001, tabatin mas ku 80 atake dokumentá kontra Testigunan di Yehova, afektando mas ku 1.000 víktima. Pero tòg dia 9 di febrüari 2001, un fiskal na Tbilisi a bisa reporteronan ku e investigashon kontra Vasili Mkalavishvili “ainda ta andando.” Lamentablemente, te ku awor ku nos ta skirbiendo e artíkulo aki, outoridatnan di Georgia ainda ta pèrmití hende ku ta oponé Testigunan di Yehova sigui ku nan krímennan motivá dor di odio.​—⁠Wak e kuadro “Akshon di Multitut Violento Ta Sigui.”

Ki papel polis ta hunga den esaki? Informenan di notisia i grabashonnan riba vidio ta revelá ku polis no solamente ta pèrmití e atakenan kontra Testigunan di Yehova, sino tambe ta partisipá den nan! Por ehèmpel, dia 8 di sèptèmber 2000, den e stat Zugdidi, un grupo di agente polisial a usa klòp pa para un kongreso pasífiko di 700 Testigu di Yehova. Hende ku a mira loke a pasa, a informá ku agentenan  polisial enmaskará “a laga atras un racha di destrukshon,” i a bati mas ku 50 Testigu. E doño dje sitio di kongreso a kòrda e teror riba kara dje muchanan segun ku polis tabata tira proyektilnan antitanke sin bala riba nan kabes. El a bisa: “E bista ei a kibra bo kurason.” Polis a invadí e lugá i kim’é plat-plat. Sin embargo, te ku awe nan no a haña kastigu.

Komo ku e insidente baho aki no ta un eksepshon (wak e kuadro “Partisipashon di Polis”), dia 7 di mei 2001, Nashonnan Uní su Komité Kontra Tortura korektamente a ekspresá su preokupashon pa “aktonan kontinuo di tortura i otro aktonan di trato òf kastigu kruel, inhumano òf degradante na Georgia kometé dor di personal dje aparato hudisial; e fayo kontinuo di no ta perkurá tur biaha pa investigashonnan inmediato, imparsial i kompleto den kantidat di alegashon di tortura.” * Sí, ni un di e mas ku 400 kehonan ku Testigunan di Yehova a entregá na polis no a hiba na sentensia dje personanan ku ta konosí ku nan a kometé e krímennan! P’esei Georgia su Ombudsman, esta, su Defensor Públiko ku ta ser eligí dor di parlamento, a remarká: “Derecho humano ta ser violá dor di nèt e personanan ku, dor di nan trabou, tin e obligashon di protehá e derechonan ei. Den nan bista, derecho humano no ta nada mas ku un pida papel.”

Desishon di Korte Supremo Ta Krea Konfushon

Komo si fuera e atakenan ilegal di multitutnan violento i di polis no tabata basta, Korte Supremo di Georgia resientemente a dikta un fayo ku a  krea konfushon en kuanto e derechonan di Testigunan di Yehova.

Laga nos konsiderá algun informashon relevante pa bo por komprendé e situashon. E polítiko Guram Sharadze a entamá un kaso pa purba disolvé e entidatnan hurídiko di Testigunan di Yehova. Dia 29 di febrüari 2000, korte a deskartá su kaso. Sin embargo, Sharadze a apelá i gana. Testigunan di Yehova, na nan turno, a apelá na Korte Supremo. Dia 22 di febrüari 2001, Korte Supremo a disidí den kontra di e Testigunan, básikamente riba puntonan tékniko. Korte Supremo a rasoná ku e Konstitushon ta spesifiká ku religionnan mester ta registrá bou di lei públiko di akuerdo ku un sierto lei ku ainda no ta eksistí i ku ta detayá e registrashon di asosiashonnan religioso. Korte a konkluí ku komo ku e lei aki no t’ei ainda, no tin ningun otro forma alternativo pa Testigunan di Yehova registrá. Sin embargo, tin 15 otro asosiashon ku ta apoyá aktividat religioso ku sí ta legalmente registrá na Georgia.

 Den un entrevista na televishon, Minister di Hustisia di Georgia, Mikheil Saakashvili, su reakshon riba e desishon di Korte Supremo tabata: “Desde un punto di bista legal, e desishon ta hopi dudoso. Mi no ta kere ku e ta e página mas eksitoso den historia di Korte Supremo.” Zurab Adeishvili, presidente interino dje komité legal parlamentario di Georgia, a bisa e Servisio di Notisia Keston ku e tabata “masha preokupá” ku e desishon pasobra “esaki ta enkurashá forsanan ekstremista den nos Iglesia [Òrtodòks di Georgia] pa suprimí minorianan religioso.” Lamentablemente, Adeishvili su preokupashon a resultá hustifiká. Un par di dia despues dje desishon di korte, violensia kontra Testigunan di Yehova a reanudá. Durante aña 2001, Testigunan di Yehova a ser ataká dor di multitutnan violento, polis i pastornan òrtodòks riba 27 di febrüari, 5 di mart, 6 di mart, 27 di mart, 1 di aprel, 7 di aprel, 29 di aprel, 30 di aprel, 7 di mei, 20 di mei, 8 di yüni, 17 di yüni, 11 di yüli, 12 di ougùstùs, 28 di sèptèmber i 30 di sèptèmber. I e lista ta sigui ketu bai.

Meimei dje ola nobo aki di persekushon, Korte Supremo a dal e paso inusual di klarifiká su desishon públikamente, deklarando: “Desafortunadamente, e públiko a malinterpretá e anulashon ku Korte Supremo a hasi dje registrashon di Union di Testigunan di Yehova . . . Ora a anulá e registrashon di korte dje akusadonan komo un entidat hurídiko di lei privá, korte no a kita ni restringí direktamente ni indirektamente nan derecho riba libertat di pensamentu, konsenshi i religion. No a restringí nan libertat di kambia nan kreensia, sea nan so òf huntu ku otronan, sea públikamente òf den privá. . . . E desishon di Korte no a restringí e akusadonan su derecho di risibí i distribuí nan ideanan i informashon. E no a prohibí nan derecho di tene reunionnan pasífiko.”

Míles di Georgiano Ta Kondená e Persekushon

Ounke ta parse ku e deklarashon aki di Korte Supremo no tabatin masha efekto riba e personanan ku tabata kometé e violensia, ta alentador  pa ripará ku míles di siudadano di Georgia ya kaba a kondená e persekushon ku ta tumando lugá. Kuminsando dia 8 di yanüari 2001, Testigunan di Yehova a laga un petishon sirkulá pa pidi protekshon kontra atake di multitutnan violento i pa hiba dilanti korte esnan ku a partisipá den atakenan violento kontra siudadanonan di Georgia. Den dos siman, 133.375 siudadano adulto for di tur region di Georgia a firma e petishon. E gran mayoria di esnan ku a firma probablemente ta miembro di Iglesia Òrtodòks di Georgia, ya ku tin solamente 15.000 Testigu di Yehova na Georgia. Pero dia 22 di yanüari 2001, e petishon a disparsé. Kiko a sosodé?

Riba e dia ei, den ofisina dje Defensor Públiko di Georgia, Nana Devdariani, tabatin un konferensia di prensa pa presentá e petishon ofisialmente. Di ripiente, durante e konferensia, Vasili Mkalavishvili i dies otro hende a basha drenta den e ofisina pa gara e 14 mapnan di kua e petishon a konsistí. Un representante di e Instituto pa Pas i Demokrasia di Caucasus a purba protehá e petishon, pero e invasornan a ataká e señora. Miéntras ku Mkalavishvili tabata grita insulto, su siguidónan a ranka 12 di e 14 mapnan for di e organisadónan i a kore bai ku nan. Un diplomátiko stranhero ku tabata testigu dje insidente a sklama: “Esaki ta simplemente inkreibel!” Afortunadamente, dia 6 di febrüari e Testigunan a haña e petishon bek den nan poder, i dia 13 di febrüari 2001, nan a present’é na e presidente di Georgia.

‘Lo Hiba Tur Akto di Hostigamentu Dilanti Korte’

Testigunan di Yehova na Georgia i rònt mundu ta konfia ku e presidente di Georgia lo tuma akshon relashoná ku e petishon aki. Den pasado Presidente Shevardnadze a kondená repetidamente e persekushon di Testigunan di Yehova. Por ehèmpel, dia 18 di òktober 1999, e presidente a deskribí e atakenan kontra Testigunan di Yehova komo ‘masakrenan organisá’ “intolerabel.” Dia 20 di òktober 2000, Presidente Shevardnadze a skirbi den un karta na un miembro dje Kuerpo Gobernante di Testigunan di Yehova: “Nos lo hasi nos bèst pa eradiká violensia.” El a agregá: “Laga mi sigurá bo ku outoridatnan di Georgia lo keda fiel na nan kompromiso di protehá derechonan humano i libertat di konsenshi.” Anto un biaha mas dia 2 di novèmber 2000, den un karta na e Komishon di Siguridat i Koperashon na Europa, Presidente Shevardnadze a deklará: “E asuntu aki [di e status di minorianan religioso na Georgia] ta un preokupashon serio di nos pueblo i di gobièrnu.” El a sigurá e komishon: “Lo hiba tur akto di hostigamentu i violensia físiko dilanti korte, i esnan kulpabel di e aktonan aki tin ku rindi kuenta na hustisia.”

Opservadónan preokupá na Europa i otro partinan di mundu ta spera ku pronto e palabranan firme di Presidente Shevardnadze lo bira realidat. Miéntras tantu, Testigunan di Yehova rònt mundu ta sigui pidi den orashon pa nan kompañeronan kreyente na Georgia segun ku e Testigunan balente ei ta sigui sirbi Yehova apesar di persekushon amargo.​—⁠Salmo 109:​3, 4; Proverbionan 15:⁠29.

[Nota]

[Komentario na página 24]

“Lo hiba tur akto di hostigamentu i violensia físiko dilanti korte, i esnan kulpabel di e aktonan aki tin ku rindi kuenta na hustisia.”—Presidente di Georgia, Eduard Shevardnadze, 2 di novèmber 2000

[Komentario na página 24]

“Nos ta spera ku lo resolvé e asuntu aki [di violensia kontra minorianan religioso], i ku tur grupo religioso na Georgia lo gosa di libertat kompleto di ekspresá nan kreensianan religioso.”—David Soumbadze, alto-konsehero dje Embahada di Georgia na Washington, D.C., Merka, 3 di yüli 2001

[Kuadro/Plachi na página 20]

AKSHON DI MULTITUT VIOLENTO TA SIGUI

E echo ku outoridatnan di Georgia no ta sentensiá e atakantenan di Testigunan di Yehova a pone e Testigunan haña mas persekushon.

Por ehèmpel, dia 22 di yanüari 2001, den e region Svanetis Ubani di Tbilisi, e eks-pastor òrtodòks Vasili Mkalavishvili i su multitut violento a invadí un reunion religioso di 70 Testigu. E atakantenan a dal i skòp e Testigunan i a bati nan ku krus di palu i di heru. Un atakante a dal un krus grandi di palu riba kabes di un Testigu ku asina un forsa, ku e krus a kibra. Nan a lastra algun Testigu hiba den un kuarto skur kaminda vários atakante a bati nan. Nan a obligá Testigunan di edat kore pasa entre rei di atakante ku tabata dal nan ku moketa i ku krus segun ku nan tabata pasa. Dos hòmber adulto a kore tras di un mucha hòmber di 14 aña, kaba a dal e mucha indefenso ku moketa i skòp. Un atakante di 30 aña a kore tras di un mucha hòmber di 12 aña i a dal e ku asina un Beibel georgiano grandi riba su kabes. Entre tantu un Testigu a sali kore for dje kas pa bai yama polis, pero nan a gar’é. E multitut a keda bati su kara te ora ku su boka a yena ku sanger i el a kuminsá saka. Finalmente, e multitut kruel a plama. Te ainda e atakantenan no a haña kastigu.

Un biaha mas, dia 30 di aprel 2001, e siguidónan di Mkalavishvili a interumpí un reunion religioso dje mesun kongregashon di Testigunan di Yehova. E atakantenan a lastra e Testigunan bai kuné pafó i a bati nan ku palu ku klabu na dje. E klabunan a habri brasa drechi, man robes, pia robes i banda di kara robes di un Testigu ku yama Tamaz. Ademas, Tamaz mester a haña sinku kosé pa sera un kòrta grandi riba su kabes. Tambe e multitut a plùnder e kas kaminda tabata tene e reunion, i a bati e mueblenan, ekipo eléktriko i tur bentana kibra. Kaba nan a kima literatura publiká dor di Testigunan di Yehova den un kandela grandi. Dia 7 di yüni 2001, e organisashon Vigilansia di Derechonan Humano ofisialmente a pidi informashon serka Minister di Asuntunan Interno di Georgia, Kakha Targamadze, i di e Prokuradó General di Georgia, Gia Mepharishvili, tokante e pasonan ku a ser tumá pa hiba dilanti korte esnan kulpabel dje atakenan resiente aki i di otro atake. Te asina leu, no a hiba ningun dje atakantenan dilanti.

[Kuadro na página 21]

PARTISIPASHON DI POLIS

Dia 16 di sèptèmber 2000, polis dje stat Marneuli a pone barikada pa stroba 19 bùs ku Testigu di Yehova aden di yega na e sitio di un kongreso. Na un dje barikadanan, atakantenan a tira piedra riba e bùsnan ku e Testigunan aden, i a dal un pasahero den kabes. Nan a lastra vários Testigu saka for dje bùsnan i a bati nan, i otro pasaheronan a ser atraká. Na mesun tempu, polis a laga vários bùs ku siguidónan di Mkalavishvili aden pasa libremente, kendenan tabata desididu na destruí e sitio di kongreso. E multitut violento a kima un ton i mei di literatura religioso. Polis ku tabata presente a yuda bati e Testigunan.

E agensia di notisia Caucasus Press a informá ku Ministerio di Asuntunan Interno lo investigá e atake aki i tuma “medidanan apropiado.” Investigadónan tin base sólido pa akusá esnan ku a kometé e aktonan aki. Konstitushon di Georgia, Artíkulo 25, ta garantisá e derecho di tur hende di tene un asamblea públiko. Sin embargo, ni un dje atakantenan no a ser hibá dilanti korte. Sinku luna despues dje atake aki, Agensia di Notisia Keston a informá ku un abogado di Guram Sharadze, lider dje movementu polítiko “Georgia Riba Tur!,” a atmití ku Sharadze a influensiá outoridatnan di Marneuli i Zugdidi pa no laga tene e dos kongresonan di Testigunan di Yehova.

[Kuadro na página 21]

KONSTITUSHON DI GEORGIA TA GARANTISÁ PROTEKSHON

Konstitushon di Georgia di 24 di ougùstùs 1995, ta garantisá libertat di religion i protekshon kontra atakenan brutal, manera e siguiente sitanan for di dje ta mustra:

Artíkulo 17—(1) No mag violá un persona su onor i dignidat. (2) No ta pèrmití tortura, trato òf kastigu inhumano, brutal òf degradante.

Artíkulo 19—(1) Tur persona tin derecho riba libertat di ekspreshon, pensamentu, konsenshi, religion i kreensia. (2) Ta prohibí pa persiguí un persona pa motibu di su pensamentunan, kreensianan òf religion.

Artíkulo 24—(1) Tur persona tin derecho di risibí i distribuí informashon libremente, ekspresá i distribuí su opinion oralmente, por eskrito òf den kualkier otro forma.

Artíkulo 25—(1) Tur persona, ku eksepshon di miembronan di forsanan armá, polis i servisionan di siguridat, tin derecho di tene un asamblea públiko sin arma sea paden di un lugá òf pafó den aire liber, sin tin ku pidi pèrmit di antemano.

[Kuadro na página 22]

MUNDU TA OPSERVANDO

Kon komunidat internashonal ta konsiderá e echo ku Georgia no ta stòp e persekushon di Testigunan di Yehova?

Gobièrnu di Merka i Gran Bretania a deklará konhuntamente: “Un reunion di Testigunan di Yehova a ser interumpí na mal òrdu, nan a maltratá un kantidat di hende violentamente i a stroba otronan di drenta den e reunion. E Embahadanan di Merka i Gran Bretania ta hopi molestiá pa esaki i pa otro kasonan resien kaminda ta stroba hende di ehersé nan derecho di libertat religioso na Georgia . . . Nos ta hasi un yamada riba Gobièrnu di Georgia p’e investigá e insidentenan aki i pa ta alerto pa hasi sigur ku hende ta respetá derecho religioso di tur persona.”

Presidente dje Delegashon di Union Europeo-Komité di Koperashon Parlamentario di Georgia, Ursula Schleicher, a deklará: “Na nòmber dje delegashon di Parlamento Europeo mi kier ekspresá mi konsternashon relashoná ku e insidente mas resien den un seri di atake violento kontra reportero, aktivista di derecho humano i Testigunan di Yehova . . . Mi ta konsiderá e tipo di aktonan aki un atake skandaloso kontra e derechonan humano fundamental na kua Georgia a komprometé su mes ora e tambe a firma e Tratado Europeo pa Protekshon di Derecho Humano i Libertatnan Fundamental.”

Relashoná ku e atakenan kontra Testigunan di Yehova, e Komishon Merikano di Siguridat i Koperashon na Europa a skirbi Presidente Shevardnadze: “E último susesonan ta realmente alarmante i ta surgi e miedu ku e situashon na Georgia ta saliendo for di man. Si no hasi nada, esnan ku ta eksigí violensia kontra minorianan religioso lo ser enkurashá pa sigui ku nan aktonan destruktivo. Nos ta spera ku abo, komo hefe di estado, lo pone un ehèmpel pa e públiko i pa e funshonarionan di Georgia i transmití dos mensahe firme i bon kla: sin importá kiko un hende ta pensa di otro religion, no ta pèrmití uso di ningun forma di violensia kontra miembro dje religionnan ei; i personanan ku partisipá den tal violensia⁠—⁠foral polis ku sea ta fasilitá e akshonnan bergonsoso aki òf de echo ta partisipá den nan⁠—⁠lo tin ku rindi kuenta dilanti korte te n’e pleno grado di lei.” Shete miembro di Kongreso Merikano a firma e karta aki.

Christopher H. Smith, ko-presidente dje Komishon di Siguridat i Koperashon na Europa i miembro di Kongreso Merikano, a deklará: “Dikon Georgia no ta sostené libertat religioso i derechonan humano manera nan a bisa ku nan lo hasi? . . . Kimamentu di literatura ta kompletamente kontra dje Akuerdo di Helsinki i ta pone algun di nos den e Komishon kòrda riba kimamentu di buki ku a tuma lugá den añanan di nazi.”

Direktor Ehekutivo interino dje organisashon Vigilansia di Derechonan Humano Divishon di Europa i Asia Sentral, a skirbi: “Vigilansia di Derechonan Humano ta profundamente preokupá p’e posibilidat ku lo bai tin mas violensia, en bista dje registro ku e gobièrnu di Georgia tin di no hiba dilanti korte personanan ku anteriormente a kometé atake violento kontra minorianan religioso. Nos ta urgi boso pa hasi un yamada inmediato pa terminá ku e atakenan i pa hiba dilanti hustisia esnan responsabel pa nan.”

Mundu ta opservando. Georgia lo kumpli ku su kompromisonan internashonal? Georgia su reputashon ta den wega.

[Kuadro na página 23]

UN APELASHON NA KORTE EUROPEO

Dia 29 di yüni 2001, Testigunan di Yehova a entregá un petishon ofisial na Korte Europeo di Derechonan Humano den kua nan ta reklamá e forma kontinuo ku Georgia su instansianan hudisial ta keda sin tuma akshon. Un par di dia despues, dia 2 di yüli 2001, Korte Europeo a respondé. E sekretario di Korte a skirbi ku Presidente di Kámara di Hustisia tabata di opinion ku ‘mester duna e kaso aki prioridat.’

[Mapa na página 18]

(Pa e teksto den su formato kompleto, wak e publikashon)

RUSIA

GEORGIA

LAMAN PRETU

TURKIA

[Plachi na página 18]

13 DI MEI 2001 - Famia Shamoyan a pèrdè nan kas ora ku un persona malisiosamente a pegu’é na kandela

[Plachi na página 18]

17 DI YÜNI 2001 - Giorgi Baghishvili a ser ataká violentamente na un reunion di Testigunan di Yehova

[Plachi na página 19]

11 DI YÜLI 2001 - Nan a dal David Salaridze ku klòp riba su kabes i a batié riba su lomba i na su repchinan na un reunion di Testigunan di Yehova

[Plachi na página 23]

28 DI YÜNI 2000 - Personanan malisioso a kima i destruí depósito di literatura di Testigunan di Yehova na Tbilisi

[Plachi na página 23]

16 DI OUGÙSTÙS 2000 - Den sala di korte na Gldani-Nadzaladevi, un simpatisante di Vasili Mkalavishvili a ataká Warren Shewfelt, un Testigu kanades

[Rekonosementu pa Potrèt na página 24]

AP Photo/Shakh Aivazov