Perfume den Transkurso di Historia

DJE KORESPONSAL DI SPIÈRTA! NA MÈKSIKO

Perfume tin un historia hopi bieu. Ekspertonan ta kere ku hende a kuminsá traha perfume dor di kima hars i leim di palu komo sensia den seremonianan religioso. P’esei e palabra “perfume” ta bini dje palabra latin per fumum, ku ta nifiká “mediante huma.” Un dje promé registronan di perfume ta bini di Egipto. Ora nan a habri e graf di Fárao Tutankamon, nan a haña mas ku 3.000 bòter di perfume ku ainda tabatin un poko di nan fragansia despues di mas ku 30 siglo!

Mil sinkushen aña promé ku Era Komun, “e perfumenan mas selekto” a ser inkluí den e fórmula ku Dios a duna pa traha e zeta santu ku saserdote israelita a usa pa ungi hende. (Éksodo 30:​23-33, NW ) E hebreonan a usa ungwentonan perfumá komo kosmétika i remedi, i tambe pa prepará morto pa entiero; esaki sin duda a sirbi komo desinfektante i deodorante. Por ehèmpel, sierto muhénan a hiba speserei i zetanan perfumá na Hesus su tumba pa hunta su kurpa kuné. (Lukas 23:56; 24:⁠1) Den un kas israelita, nan a konsiderá hunta pia di un huéspet ku zeta perfumá, komo un muestra di hospitalidat.​—⁠Lukas 7:​37-46.

Segun informe, den promé siglo Roma tabata usa alrededor di 2.800 ton di olíbano i 550 ton di mirra pa aña. Nan a hiba e ingredientenan aromátiko ei komo regalo pa e mucha Hesus. (Mateo 2:​1, 11) Segun historia, na aña 54 Era Komun, e emperador romano Nero a gasta e ekivalente di 180.000 florin pa duna un aroma dushi na un fiesta. Pipanan skondí den e komedornan di su palasio tabata spùit e huéspetnan ku un nubia fini di awa perfumá. Di siglo 7 Era Komun padilanti chinesnan a kuminsá usa perfume. Tambe nan a kuminsá usa sakunan chikí ku pòtpurí òf puiru perfumá. Durante Edat Medio, e kultura islámiko a usa perfume, foral e fragansia di rosa.

Durante siglo 18 e industria di perfume a bira asina bon establesí na Fransia ku nan a yama e korte real di Louis XV, e korte perfumá. Hende tabata pone fragansia no riba kueru so, sino tambe riba paña, hanskun, wairu i mueble.

Kolonia, inventá den siglo 18, tabata ser usá den awa pa baña, tambe nan a meskl’é ku biña, kom’é riba klòmpi di suku komo kos pa laba boka, i a us’é komo remedi den klestek i kòmprès. Den siglo 19, hende a desaroyá fragansianan sintétiko. Asina, pa promé bes nan a kuminsá bende perfumenan ku no por a usa pa remedi. Awe perfumeria ta un negoshi di míles di miónes di dòler. *

[Nota]

[Plachi na página 31]

Egipto, bòter di perfume for dje tumba di Tutankamon, siglo 14 P.E.K.

[Rekonosementu]

Werner Forman/Egyptian Museum, Cairo, Egypt/Art Resource, NY

[Plachi na página 31]

Gresia, siglo 5 E.K.

[Rekonosementu]

Musée du Louvre, Paris

[Plachi na página 31]

Fransia, siglo 18 E.K.

[Rekonosementu]

Avec lʹaimable autorisation du Musée de la Parfumerie Fragonard, Paris

[Plachi na página 31]

Bòter di perfume moderno