Diabel—Un Malbado Ku Ta Eksistí?

DEN hopi sírkulo religioso, hende a kuminsá mira Diabel básikamente komo un relikia superstisioso, un invento di hende. So Dionigi Tettamanzi, arsobispu di Genoa⁠—⁠un di Italia su kardinalnan di mas importante⁠—⁠a lanta un konmoshon ku su karta pastoral di 40 página, ku a mustra kon pa lucha kontra Diabel. E ta menshoná “10 mandamentu.”

E Promé: “No lubidá ku diabel ta eksistí,” pasobra su “promé mentira” ta pa “hasi nos kere ku e no ta eksistí.”

Di Dos: “No lubidá ku diabel ta un tentadó. . . . No pensa ku bo ta imün òf ku bo no ta vulnerabel.”

Di Tres: “No lubidá ku diabel ta masha inteligente i astuto. E ta sigui sedusí hende, manera el a hasi ku e promé hòmber.”

Di Kuater: “Sea vigilante: tantu ku wowo i kurason. Sea fuerte: den spiritu i birtut.”

Di Sinku: “Kere firmemente den e viktoria di Kristu riba e tentadó” pasobra esaki “lo hasi bo sinti bo sigur i trankil asta dilanti e atake mas violento ku lo por bin riba bo.”

Di Seis: “Kòrda ku Kristu ta hasi bo partisipá den su viktoria.”

Di Shete: “Sigui skucha e Palabra di Dios.”

Di Ocho: “Sea humilde i dispuesto pa aseptá humiashon.”

Di Nuebe: “Semper hasi orashon, anto sin kansa,” pa asina bo por vense tentashon.

Di Dies: “Stima Señor bo Dios i adorá e so.”

Ki efekto e karta ofisial aki dirigí na e kleronan tabatin? E Sentro di Estudionan Teológiko di Milan no a gusta su konseho. E Sentro a argumentá ku tal “informashon teológiko ta parse pensamentu di Edat Medio.” Segun un bosero, “kulpa diabel pa tur kos por yuda apsolvé hende di nan [propio] responsabilidat.”

Maske Beibel no ta apsolvé hende di e responsabilidat pa nan akshonnan, e ta identifiká Satanas e Diabel masha kla komo “e dios di e mundu aki,” esun ku a tenta Hesus. Tambe Beibel ta revelá e poder di Satanas i su intenshon di “siega mente di esnan ku no ta kere.”​—⁠2 Korintionan 4:4; Mateo 4:​1-11.

Sí, manera apòstel Pedro a skirbi, Satanas ta “un leon ku ta gruña, buskando ken e por devorá.” (1 Pedro 5:⁠8) No ta nada straño anto ku apòstel Huan a rekordá esnan kreyente: “Henter mundu ta bou di kòntròl di e malbado.” (1 Huan 5:19) Nos ta sabi si nos tene kuenta ku e spièrtamentunan bíbliko aki.