Dikon Nan A Bira Maestro?

“Mayoria maestro ta skohe nan karera dor ku e ta un profeshon ku ta yuda hende. [Dunamentu di lès ta un] kompromiso pa hasi un diferensia den bida di e mucha.”​—⁠Teachers, Schools, and Society.

MASKE algun maestro ta hasié parse fásil, dunamentu di lès por ta yen di opstákulo ku mester wòrdu vensí. Eseinan por ta, un klas muchu grandi, demasiado trabou di papel, burokrasia aplastante, alumnonan ku no ta koperá i mal pago. Pedro un maestro na Madrid a splika esei di e siguiente forma: “Ser un maestro no ta fásil. E ta eksigí hopi sakrifisio propio. Pero apesar di e difikultatnan, tòg mi ta konsiderá dunamentu di lès mas rekompensador ku un trabou den mundu di komersio.”

E desafio por ta hopi grandi na skolnan den statnan grandi di mayoria pais. Droga, krímen, moralidat permisivo i tin bes indiferensia di mayornan por afektá e ambiente i disiplina na skol masha hopi mes. Aktitut rebelde ta komun i koriente. Dikon anto asina tantu hende kualifiká ta skohe pa bira maestro?

Leemarys i Diana ta maestra na e stat di New York. Nan ta traha ku mucha di sinku te dies aña di edat. Ámbos maestra ta bilingwe (ingles i spañó) i ta trata prinsipalmente ku muchanan hispano. Nos pregunta tabata . . .

Kiko Ta Motivá un Maestro?

Leemarys a bisa: “Kiko ta motivá mi? Mi amor pa mucha. Mi sa ku pa algun mucha mi ta e úniko persona ku ta yuda nan den nan esfuerso.”

Diana a bisa: “Mi a yuda mi subrino di ocho aña, kende tabatin difikultat na skol, spesialmente ku lesamentu. Pa mi tabata un satisfakshon grandi pa mira e i otronan siña! P’esei mi a disidí ku lo mi kier duna lès, i mi a kita for di mi trabou na banko.”

Spièrta! a hasi e mesun pregunta na maestronan di diferente pais, ata aki un par di kontesta ku nos a haña.

Giuliano un italiano di 40 i piku aña, ta splika: “Mi a skohe e profeshon aki pasobra mi a keda fasiná kuné for di tempu ku mi tabata un alumno (na man drechi). Mi a konsider’é komo un profeshon ku ta duna hopi oportunidat pa inspirá otronan. E entusiasmo ku mi tabatin ora ku mi a kuminsá a yuda mi vense difikultatnan ku mi a pasa aden na prinsipio di mi karera.”

 Nick di New South Wales, Oustralia, a bisa: “No tabatin masha oportunidat pa trabou riba mi tereno di investigashon di kímika, ma tabatin yen di oportunidat riba e tereno di edukashon. Desde e tempu ei mi a ripará ku mi gusta duna lès, i parse ku e alumnonan tambe ta gusta e manera ku mi ta duna lès.”

Hopi bes e ehèmpel di mayornan tambe tabata un faktor prinsipal ku a pone algun skohe pa bira maestro. William, di Kenya, a kontestá nos pregunta: “Esun ku mas tantu a duna mi e deseo pa duna lès ta mi tata, kende a bira maestro na aña 1952. Un faktor ku a pone mi keda ku e profeshon aki ta e echo ku mi sa ku mi ta formando mente di mucha yòn.”

Rosemary kende tambe ta di Kenia, a bisa nos: “Semper mi tabatin deseo di yuda hende ménos privilegiá. Pues mi tabatin ku skohe entre bira verplegster òf maestra. E oferta pa duna lès a presentá promé. E echo ku mi tambe ta mama a oumentá mi amor pa e profeshon.”

Berthold di Düren, Alemania, tabatin un motibu diferente pa duna lès: “Mi esposa a konvensé mi ku lo mi por bira un bon maestro.” I a resultá ku e tabatin rason. Tambe Berthold a bisa: “E profeshon ku mi tin awor ta duna mi hopi goso. A ménos ku un maestro ta konvensí di e balor di edukashon anto banda di esaki e ta interesá den mucha yòn, ta imposibel pa e por ta un bon maestro ku ta eksitoso, motivá i satisfecho.”

Un maestro hapones ku yama Masahiro, di e stat di Nakatsu, a bisa: “Loke a motivá mi pa bira un maestro tabata e echo ku mi tabatin un maravioso maestro den mi promé aña di skol sekundario. E tabata siña nos ku berdadero dedikashon. I e motibu prinsipal pakiko mi a sigui den mi profeshon ta ku mi ta stima mucha.”

Yoshiya, ku awor tin 54 aña di edat i ku tambe ta di Hapon, tabatin un trabou bon pagá den un fábrika pero el a sinti ku e tabata katibu di e trabou i di e ruta di trabou. “Un dia mi so tabata pensa: ‘Pa kuanto tempu lo mi sigui ku e estilo di bida aki?’ Mi a disidí ku mi ta buska un trabou ku tin mas di hasi ku hende en bes di ku kos. Duna lès ta algu úniko. Bo ta traha ku mucha yòn. E ta algu humano.”

Valentina di St. Petersburg, Rusia, tambe ta gusta e aspekto ei di e profeshon di maestro. El a bisa: “E karera ku mi a skohe ta pa duna lès. Mi a traha na skol básiko komo maestra pa 37 aña. Mi gusta traha ku mucha, spesialmente ku mucha mas chikitu. Mi stima mi trabou, i ta p’esei mi no a baha ku penshon ainda.”

 Outor William Ayers, ku ta un maestro tambe, a skirbi: “Hende ta sinti nan yamá pa duna lès pasobra nan stima mucha i hóbennan, òf nan gusta di ta ku nan, mira kon nan ta desaroyá i krese i bira kapas, kompetente i poderoso den mundu. . . . Hende ta duna lès . . . komo un regalo di nan pa otro hende. Mi ta duna lès ku e speransa di hasi mundu un mihó lugá pa biba.”

Sí, apesar di difikultat i kontratempu, míles di hòmber i muhé dediká ta ser atraí na e profeshon di duna lès. Kiko ta algun di e problemanan mas grandi ku nan ta enfrentá? E siguiente artíkulo lo kontestá e pregunta aki.

[Kuadro na página 6]

Sugerensianan pa Komunikashon Entre Maestro i Mayor

✔ Siña konosé e mayornan. Esaki no ta pèrdèmentu di tempu. E ta un invershon di tempu ku ta benefisioso tantu pa e maestro komo e mayornan. Esaki ta bo oportunidat pa forma un relashon ku esnan ku lo por bira bo mihó kolaboradónan.

✔ Papia na e nivel di e mayornan, no rebahá nan. Evitá di usa idioma di maestro.

✔ Ora di papia tokante e muchanan, resaltá e aspektonan positivo. Duna elogio ta mas efektivo ku kritiká. Splika kiko e mayornan por hasi pa yuda nan yu bai bon.

✔ Laga e mayornan ekspresá nan mes, anto skucha bon.

✔ Purba komprendé e ambiente ku e mucha ta biba aden. Si ta posibel, bai su kas.

✔ Traha afsprak pa e siguiente bishita. Keda den kontakto ta importante. Esei ta mustra ku bo tin berdadero interes.​—⁠Basá Riba Teaching in America.

[Plachi na página 6]

‘Mi tata tambe tabata maestro.’​—WILLIAM, KENIA

[Plachi na página 7]

“Mi gusta traha ku mucha.”​—VALENTINA, RUSIA

[Plachi na página 7]

“Duna lès ta algu úniko. Bo ta traha ku mucha yòn.”​—YOSHIYA, HAPON