E Satisfakshon i Goso di Duna Lès

“Kiko ta yuda mi sigui? Maske dunamentu di lès por ta un kos difísil i agotador, ora mi mira ku e muchanan ta yen di gana di siña i mi mira nan progreso esei ta motivá mi pa sigui.”​—⁠Leemarys, un maestro di e stat di New York.

APESAR di tur desafio, kontratempu i desepshon, miónes di maestro rònt mundu ta perseverá den e profeshon ku nan a skohe. Kiko ta motivá míles di studiante anto pa hasi esfuerso pa kualifiká pa bira maestro siendo ku nan sa ku nan lo no haña e debido rekonosementu? Kiko ta yuda nan sigui?

Inna un maestra ruso, a splika: “E ta un eksperensia maravioso pa mira bo eks-alumnonan komo adulto, pa tende nan ekspresá ku loke nan a siña for di bo, ta bale la pena. Ta masha animante pa tende nan bisa ku nan tin rekuerdonan agradabel di e añanan ku nan a pasa ku bo.”

Giuliano un maestro sitá den e artíkulo anterior, a bisa: “Un di e satisfakshonnan mas grandi ta ora bo ripará ku bo a logra stimulá e interes di e alumnonan den un tópiko. Por ehèmpel, despues ku mi a kaba di splika un parti di historia, algun alumno a bisa: ‘No stòp. Konta nos mas! ’ E palabranan spontáneo aki por drecha bo mainta na skol pasobra bo ta ripará ku bo a lanta den e hóbennan emoshonnan ku ta nobo pa nan. Bo ta sinti bo asina felis di mira nan kara ora nan wowonan bria pasobra nan a komprendé un tópiko.”

Elena un maestra na Italia, a bisa: “Mi ta kere ku bo ta haña mas satisfakshon den kosnan chikitu di tur dia, den e logronan chikitu di e alumnonan, ku den resultadonan importante ku masha poko ta sosodé.”

Connie un oustraliano di 30 i piku aña, a bisa: “Ta masha rekompensador ora un alumno ku kende bo tabatin relashon di maestro i alumno ta tuma tempu pa skirbi bo un karta pa ekspresá apresio pa e esfuerso ku bo a hasi.”

Oscar di Mendoza, Argentina, ta sinti e mesun kos: “Ora mi topa mi alumnonan riba kaya òf na un otro kaminda i nan ta mustra apresio pa loke mi a siña nan, mi ta sinti ku mi esfuersonan a bale la pena.” Angel di Madrid, Spaña, a bisa: “Mi a dediká parti di mi bida na e profeshon maravioso pero difísil aki. I pa mi, e satisfakshon mas grandi ta pa mira hóbennan kende mi a duna lès bira hòmber i muhénan ku ta pará riba nan pia, en parti debí na mi esfuerso.”

Leemarys sitá na prinsipio, a bisa: “Di bèrdat mi ta sinti ku maestronan ta hendenan spesial. Tambe nos ta un poko loko pa tuma un responsabilidat  asina grandi. Pero si bo por tin un bon efekto⁠—⁠sea ta riba dies mucha òf djis riba un so⁠—⁠bo a hasi bo trabou, i no tin un sintimentu mas dushi ku esei. Bo ta hasi bo trabou ku goso.”

Bo A Yega di Gradisí Bo Maestronan?

Komo alumno òf mayor bo a yega di gradisí bo maestro pa su tempu, esfuerso i interes? Òf bo a asta yega di manda un karchi òf karta di gradisimentu? Arthur di Nairobi, Kenya, a hasi un remarke ku ta na su lugá: “Maestronan tambe ta progresá si nan haña enkomendashon. Gobièrnu, mayornan i alumnonan mester apresiá maestronan masha hopi mes pa nan servisionan.”

Outor i maestra LouAnne Johnson a skirbi: “Pa kada karta negativo ku mi ta haña tokante un maestro, mi ta risibí shen positivo, loke ta konfirmá lokual mi ta kere, esta, ku tin hopi mas bon maestro ku tin mal maestro.” Ta interesante ku awendia hopi hende ta kontratá un detektive pa “yuda lokalisá un eks-maestro. Hende kier haña nan maestronan pa gradisí nan.”

Maestronan ta pone un fundeshi importante pa e edukashon di un hende. Asta e mihó profesornan ku ta traha na e universidatnan mas prestigioso, debe nan maestronan ku a tuma tempu i a hasi esfuerso pa stimulá i kultivá nan deseo pa edukashon, konosementu i komprendementu. Arthur, na Nairobi, ta bisa: “Tur ofisial haltu den e sektor públiko i privá a haña lès di un maestro na un dado momentu den nan bida.”

Nos mester ta masha gradisidu na e hòmber i muhénan aki ku a stimulá nos kuriosidat, kendenan a impulsá nos mente i kurason, kendenan a mustra nos kon pa satisfasé nos set pa konosementu i komprendementu!

Kuantu mas gradisidu nos mester ta na e Gran Edukador, Yehova Dios, kende a inspirá e palabranan na Proverbionan 2:​1-6: “Mi yu, si bo kier risibí mi palabranan i warda mi mandamentunan den bo, hasi bo orea atento na sabiduria, i inkliná bo kurason na komprendementu; pasobra si bo sklama pa disernimentu, halsa bo bos pa komprendementu, si bo busk’é manera plata, i rondi’é manera tesoro skondí, e ora ei lo bo diserní e temor di SEÑOR, i deskubrí e konosementu di Dios. Pasobra SEÑOR ta duna sabiduria; for di su boka ta sali konosementu i komprendementu.”

Tuma nota ku e palabra kondishonal “si” ta ser menshoná tres bes den e tekstonan aki ku ta pone bo pensa. Imaginá bo, si nos ta dispuesto pa aseptá e reto ei, nos por “deskubrí e konosementu di Dios”! Esei sigur ta e edukashon di mas importante.

[Kuadro na página 13]

Un Mayor Felis

Un maestro di e stat di New York a risibí un karta ku ta bisa lo siguiente:

“Lo mi kier gradisí bo di henter mi alma i kurason pa loke bo a hasi pa mi yunan. Bo interes, bondat i abilidat a yuda nan logra lo máksimo. Mi tin sigur ku nunka nan lo a eksperensia esei sin bo. Bo a hasi mi masha orguyoso di mi yunan, un eksperensia ku nunka lo mi lubidá. Saludo di S. B.”

Bo konosé un maestro ku lo bo por animá?

[Plachi na página 12]

‘Bo ta sinti bo asina felis pa mira alumnonan ora nan wowonan bria pasobra nan a komprendé un tópiko.’​—GIULIANO, ITALIA

[Plachinan na página 13]

‘Ta masha rekompensador ora un alumno ta tuma tempu pa skirbi bo un karta pa ekspresá apresio.’​—CONNIE, OUSTRALIA