For di Nos Lektornan

Orashon E artíkulo “Hóbennan Sa Puntra . . . Dios Lo Tende Mi Orashonnan?” (8 di yüli 2001) a fortalesé mi hopi. Mi a risibí e revista ora mi tabata drumí den hospital. Mi no por a bai Salon di Reino ni nos kongreso. Mi tabata hopi tristu, i mi no por a kontrolá mi sintimentunan. Orashon na Yehova a trankilisá mi, i mi a keda sorprendí kon bon mi a sinti mi. Ta un konsuelo pa sa ku Yehova lo no lubidá mi nunka.

A. O., Hapon

Mi tin 18 aña di edat i mi ta un pionero regular, un predikadó di tempu kompleto. Mi tin un par di luna ta sinti mi deprimí. Mi tabata sinti meskos ku Steve, e hóben menshoná den e artíkulo ku a bisa ku tin bes e sa sinti ku e no mester kansa Dios ku su problemanan. Pero mi a tuma e konseho na Lukas 12:6 i 7 na pechu. El a trankilisá mi i motivá mi pa habri mi kurason pa Yehova.

M. D., Nikaragua

Salú Den boso edishon di 8 di yüni 2001 mi a lesa e artíkulo “Medisina Moderno​—⁠Kon Haltu E Por Yega?” Komo un hende ku no a studia medisina ni siensia, mi a haña boso splikashon i referensianan na historia di medisina hopi interesante i probechoso. Lo mi warda e edishon ei bon.

E. F., Alemania

Mal Uso di Droga Regularmente, mi ta risibí boso revistanan serka un kolega, i mi ta lesa nan. Pero mi a keda masha strañá tokante algu ku e artíkulo “Mal Uso di Droga​—⁠Tin Un Solushon!” ta duna di komprendé basta kla, esta, ku tur músiko di ròk lo ta drogadikto. (8 di yüli 2001) Tin masha hopi músiko di ròk ku no tin nada di haber ku droga, i ku ta tuma nan trabou na serio.

M. M., Hapon

“Spièrta!” ta kontestá: Nos intenshon no tabata pa duna di komprendé ku tur músiko di ròk ta usa droga. Sin embargo, ta bon konosí ku hopi músiko di ròk i nan fanátikonan ta usa droga durante konsierto.

Tragedia Horibel Mi a kere ku ta den pelíkula so sierto kosnan por a pasa. P’esei, e eksperensia “Enfrentando un Tragedia Horibel” a dal mi hopi duru. (8 di ougùstùs 2001) Asina ku mi a kaba di les’é mi a resa pidi Yehova sostené Jonathan, Oscar i Oscar su welonan. Eksperensianan asina ta animá nos pa duna lo mihó di nos mes na Yehova promé ku “tempu i suerte” alkansá nos.​—⁠Eklesiástes 9:⁠11.

E. P., Italia

Mi a keda profundamente konmoví ora mi a lesa e historia horibel dje tragedia ku a dal Theresa i su famia. Mi tin hopi gana pa su famia sa ku ami tampoko no por warda pa brasa Theresa den e mundu nobo ku Yehova a primintí.

L. T., Italia

Mi tin seis aña ta bula pipa pa boutismo. Mi no tabatin e determinashon nesesario pa hasi sierto kambionan. Pero e eksperensia di Theresa a pone mi pensa hopi. Mi a yega na e konklushon ku mi no por biba sin Yehova, i mi a habri mi kurason p’e. Apesar ku loke e famia a pasa aden ta un tragedia, el a animá mi.

M. L., Repúblika Cheko

Mi a keda straño ku un Testigu di Yehova por a bira víktima di un krímen asina, pero e artíkulo a yuda mi realisá ku Yehova no ta protehá nos milagrosamente. Mi no sa ki dia ami mes lo por haña mi ku un tragedia. Pero e fe fuerte ku kua e famia di Theresa a enfrentá e situashon a yuda mi pa ta determiná pa enfrentá kualkier prueba ku kurashi.

S. O., Hapon