Gresia Ta Defendé Derechonan Religioso

PA PROMÉ BES, aña pasá, e gobièrnu griego a duna Testigunan di Yehova pèrmit pa usa un di su fasilidatnan deportivo mas balioso, pa tene un kongreso grandi. Ta trata aki di e Sala di Deporte Olímpiko ku por karga 20.000 persona. E stadion airekondishoná aki ta parti di e kompleho ku lo wòrdu usá na aña 2004 pa e Weganan Olímpiko na Aténas.

Notabel ta ku na aña 1963 i 1988, e Testigunan a hasi areglo pa usa fasilidatnan deportivo na Aténas pa nan kongresonan. Sin embargo, tur dos biaha outoridatnan a sede na e menasanan di e Iglesia Griego Òrtodòks i a nenga di laga e Testigunan usa nan.

Un Resultado Diferente

Na luna di febrüari 2001, e Testigunan a pidi pèrmit pa usa e Sala di Deporte Olímpiko, un di e poko fasilidatnan ku dak i ku ta sufisientemente grandi pa akomodá nan tur. Pero nan tabata puntra nan mes si historia lo ripití su mes. Manera nan a teme, e promé reakshon di outoridatnan tabata negativo.

Apesar di esei, inmediatamente nan a aserká ofisialnan di rango haltu ku tin reputashon di ta hustu i sin prehuisio. Nan lo ta dispuesto pa defendé e derechonan konstitushonal di adorashon i di reuní trankilamente? Nan lo resistí preshon religioso? Nan a hasié, i un desishon nobo a anulá e rechaso anterior. Esaki a habri kaminda pa e Testigunan por a programá nan kongreso na e Sala di Deporte pa dia 27 te ku 29 di yüli 2001.

 Na e mesun momentu, outoridatnan a duna pèrmit na e Testigunan pa usa un otro fasilidat deportivo kontrolá pa gobièrnu, e Palasio di Deporte na Tesalónika.

Preshon Intenso Ta Frakasá

Segun ku e promé dia di kongreso na Aténas tabata aserkando, preguntanan inkietante a keda: Outoridatnan lo kumpli ku nan promesa, apesar di preshon for di klero òrtodòks? I e Testigunan lo por reuní sin intervenshon di gruponan malbado?

Iglesia Òrtodòks no a laga su táktika bieu para, esta, di purba usa su influensia pa interumpí e kongreso. Kanalnan di televishon a revelá ku klero òrtodòks a eksigí pa nan no hasi menshon di e kongreso. Sin embargo, na final e esfuerso ku e iglesia a hasi no a duna resultado.

Ta un ironia ku Iglesia Òrtodòks a akusá e Testigunan di ta un religion di sekresia, siendo ku ta nèt e iglesia ei a purba stroba públiko di haña sa loke tabata sosodiendo den e Sala di Deporte. Afortunadamente medionan di komunikashon no a laga kleronan preshoná nan. Nan a duna un kobertura amplio i onesto di e kongreso.

Ademas, míles di delegado a duna informashon na e públiko tokante e kongreso i a papia ku nan di nan kreensianan. Unda ku nan a bira, por a identifiká e delegadonan na e badgenan hel ku nan tabatin bistí. Hopi hende ku no ta Testigu di Yehova a ser invitá na e kongreso i a bini. Komo resultado e asistensia na e Sala di Deporte a oumentá te na 15.760. E kongresonan na e Palasio di Deporte na Tesalónika durante e último dos simannan di yüli tabatin un asistensia total di 13.173 persona.

Opservadónan A Keda Impreshoná

Ora ku un multitut di 2.604 boluntario⁠—⁠tur Testigunan di Yehova⁠—⁠a invadí e Sala di Deporte, pa limpia, fèrf i prepará pa e kongreso, e manager di e stadion a bisa: “Nos a bin aki pa mira ku nos mes bista algu ku nunka a yega di sosodé den e lugá aki.” Un hende a remarká: “Boso mester usa e lugá aki tur aña pa dun’é un renobashon kompleto.”

Andreas Vardakis, direktor di asuntunan públiko di e Sala di Deporte, a keda impreshoná. “Boso a hasi e lugá aki bunita,” el a bisa. “Nos tin personal pa dirigí e lugá. Pero, boso partisipashon tabata un influensia motivador ku a hasi e kongreso aki un éksito.”

Durante e kongreso, despues ku e komisario di polis a realisá ku e no tabatin ku manda hende pa kontrolá e multitut di hende pasífiko, el a sklama: “Nunka mi a mira hende asina amabel i ordená! ”

Un Punto Sobresaliente di e Kongreso

Den e diskurso final di e kongreso, a wòrdu anunsiá ku e Ministerio Griego di Edukashon i Religion Nashonal a rekonosé Testigunan di Yehova komo “un religion konosí.” Ademas, e Ministerio a duna rekonosementu ofisial na e sede nashonal di Testigunan di Yehova na Aténas. En parte e dokumento di gobièrnu ta bisa:

“Gobièrnu ta konsiderá [e] Testigunan di Yehova kristian komo un religion konosí . . . ku tur e benefisionan legal ku esei ta trese kuné. E artíkulo ya menshoná di e Konstitushon ta protehá libertat di adorashon, e método i forma di ekspresá adorashon, i libertat di skohe e método di atministrashon i organisashon di kada iglesia òf reunion religioso. E protekshon aki klaramente ta konta tambe pa e propiedatnan i fasilidatnan di Marousi [e ofisina di sukursal di Testigunan di Yehova], un lugá sagrado i konsagrá, dediká na e adorashon di Dios. E fasilidatnan ei ta wòrdu yamá Bètel, es desir: ‘Kas di Dios.’”

Tantu Testigunan di Yehova komo otro hende ku ta na fabor di libertat religioso, ta gradisidu pa e desaroyo aki. Nan ta resa pidi ku e desaroyo aki lo tin komo resultado, ku hende lo por sigui ku nan bida kristian di un manera “trankil i ketu den tur santidat i dignidat.”​—⁠1 Timoteo 2:​1, 2.

[Plachinan na página 28]

Testigunan reuní na e Sala di Deporte Olímpiko

[Rekonosementu]

Harry Bilios