Hóbennan Sa Puntra . . .

Kon Mi Ta Hasi Si Mi Topa un Mucha di Mi Skol?

“Bai skol djaluna tabata kruel. Si un amigu di mi a mira mi, mi tabata inventá henter un historia. Por ehèmpel mi tabata bisa mi amigunan ku mi tabata kolekta sèn pa un partido polítiko.”​—⁠James, Inglatera.

“Na skol, e muchanan ku a mira mi tabata tenta mi. Tabatin hopi preshon riba mi.”​—⁠Débora, Brazil.

TA DIKON e hóbennan aki tabatin asina tantu miedu pa nan amigunan mira nan? Ta un kos ilegal nan tabata hasi? Al kontrario. Nan tabata hasiendo e trabou di mas onorabel i importante na mundu awe. Nan tabata hasiendo e trabou ku Hesus a manda nos hasi ora el a bisa: “P’esei, bai i hasi tur e nashonnan disipel di mi, . . . i siña nan pa kumpli ku tur loke mi a ordená boso.”​—⁠Mateo 28:​19, 20.

Segun un enkuesta Gallup na Merka, mas ku 90 porshento di hóben ta kere den Dios. Rònt di mitar di nan ta bai misa tur siman. I maske hopi hóben ta den aktividatnan patrosiná dor di iglesia, por ehèmpel kanta den kor, poko di nan ta papia di Dios ku nan kompañeronan di skol. Testigunan di Yehova sí ta konosí rònt mundu pa nan trabou di prediká di kas pa kas. Míles di Testigu hóben ta partisipá den e trabou aki.

Si bo ta un hóben Testigu, sin duda abo tambe ta partisipá kaba den e trabou aki. Pero esei no ke men ku di mes bo ta hañ’é fásil. Kisas abo tambe ta preokupá ku lo bo topa un kompañero di skol na porta, meskos ku e hóbennan sitá na kuminsamentu. Un hóben britániko ku yama Jennie ta bisa frankamente: “Un dje kosnan di mas pió tabata pa un mucha di mi skol mira mi na saya, hopi mas nèchi bistí ku na skol, i ku mi tas di buki den man.”

E miedu di topa un kompañero di skol por ta asina fuerte ku algun hóben kristian a rekurí na sierto trikinan. Un hóben ku yama Leon ta bisa: “Mi konosé un hóben Testigu ku ta bisti un jacket ku kapuchon ora e ta den sirbishi, p’e por bah’é i tapa su kara kuné si e topa un di su amigunan di skol.” Otro hóbennan ta djis evitá  di prediká den sierto barionan. Un hóben ku yama Simon ta konta: “Mi ta kòrda kon mi tabata resa pidi pa nos no traha den un sierto kaya, dor ku mi tabata sa ku tabatin yen di mucha di mi skol ta biba eiden.”

Ta normal pa bo sinti bo un poko preokupá pa topa un hende ku bo konosé den sirbishi. Pero si bo laga e miedu ei dominá bo, ta perhudiká so e por perhudiká bo. Un hóben aleman ku yama Alicia ta bisa: “Mi tabatin un aktitut asina robes tokante predikashon, ku e tabatin un mal efekto riba mi spiritualidat.”

Pero pakiko bo tin ku prediká, asta si e ta algu asina difísil pa bo? Pa un kontesta, laga nos mira dikon Dios ta pone e obligashon aki riba bo. Despues nos lo mustra kon bo por vense bo temor, ku esfuerso i determinashon.

E Obligashon di Prediká

Pa kuminsá, algu ku lo por yuda bo ta di mira ku kompartí bo fe ku otronan no ta nada nobo ni straño. For di tempu di antigwedat hende ku ta teme Dios a hasi esei. Noe, por ehèmpel, ta mihó konosí komo esun ku a traha e enorme arka. (Génesis 6:​14-16) Pero 2 Pedro 2:5 ta bisa ku e tabata “un predikadó di hustisia” tambe. Noe a sintié obligá pa spièrta otro hende tokante e destrukshon ku tabata na kaminda.​—⁠Mateo 24:​37-39.

Mas despues, maske Dios no a manda e hudiunan spesífikamente pa nan prediká na hende ku no ta hudiu, hopi di nan a kompartí nan fe ku otro hende. Asina un hende muhé stranhero ku yama Rut a haña sa tokante Yehova. Ku gratitut na su suegra hudiu Noemí, Rut a bis’é: “Bo pueblo lo ta mi pueblo, i bo Dios, mi Dios.” (Rut 1:16) Despues Rei Sálomon a mustra ku hopi hende ku no ta hudiu lo bin tende dje “gran nòmber” di Yehova i bin ador’é na Su tèmpel.​—⁠1 Reinan 8:​41, 42.

Awor, si e sirbidónan antiguo ei di Dios mes a papia ku otro hende maske nan no tabatin ningun òrdu direkto pa prediká, kuantu mas nos ku ta kristian lo no mester sinti nos obligá pa prediká? No lubidá ku nos a risibí òrdu pa prediká “e evangelio aki di e reino.” (Mateo 24:14) Nos, meskos ku apòstel Pablo, tin un obligashon di deklará e bon nobo aki. (1 Korintionan 9:16) Asta nos salbashon ta den wega. Romanonan 10:9 i 10 ta bisa: “Si bo konfesá ku bo boka Hesus komo Señor, . . . lo bo ta salbá; pasobra ku kurason hende ta kere pa haña hustisia, i ku boka e ta konfesá pa haña salbashon.”

Unda bo por hasi e konfeshon ei, òf, manera Tradukshon di Mundu Nobo ta tradusié, “hasi deklarashon públiko”? Predikashon informal tin su lugá. Pero sirbishi di kas pa kas ta keda un dje maneranan di mas efikas pa alkansá hende. (Echonan 5:42; 20:20) Bo ta liber dje obligashon aki debí ku bo ta hóben? Nò. Na Salmo 148:12 i 13 Beibel ta duna nos e mandamentu aki: “Tantu yònkuman komo bírgen; ansiano i mucha. Laga tur alabá e nòmber di SEÑOR.”

E Reto di Prediká na Bo Pareunan

Ta bèrdat ku por ta fastioso si ora bo ta den sirbishi bo topa un hende ku ta bai bo skol. Kon ku bai bin, ta normal pa bo ke pa hende aseptá bo. Niun hende no gusta pa hende tenta nan ni zundra nan. I manera un hóben ku yama Tanya a bisa: “Mucha di skol por ta hopi kruel!” P’esei, ta lógiko pa bo puntra bo mes kon bo kompañeronan di skol lo reakshoná si nan mira bo tur nèchi bistí i ku un Beibel den bo man. Lamentablemente, no ta nada straño si nan ridikulisá bo. Un hóben di Brazil ku yama Felipe ta konta: “Tabatin un mucha hòmber den mi klas ta biba den e mesun edifisio ku mi. E tabata bisa: ‘Mira bo ei ku bo Beibel! Ta kiko bo tin den e tas ei?’ ”

Bira víktima di mofa no ta nada prèt. Beibel ta konta nos ku Isak yu di Abraham a wanta tentamentu kruel na man di Ismael, su mitar  ruman. (Génesis 21:⁠9) Apòstel Pablo no a minimisá gravedat dje maltrato aki. Na Galationan 4:29 e apòstel ta yam’é apropiadamente ‘persekushon.’

Hesus tambe a bisa di antemano ku tin hende ku lo trata su siguidónan malu. El a bisa: “Si mundu odia boso, sa anto ku el a odia ami promé ku boso. Si boso tabata di mundu, mundu lo a stima loke ta di dje; ma pasobra boso no ta di mundu, ma ami a skohe boso for di den mundu, p’esei mundu ta odia boso.”​—⁠Huan 15:​18, 19.

P’esei, komo kristian, bo mester ta prepará pa wanta persekushon den un òf otro forma. (2 Timoteo 3:12) Asta si bo keda sin papia un solo palabra tokante Beibel ku bo pareunan, tòg algun di nan lo por persiguí bo djis pasobra bo ta komportá bo segun normanan haltu i bo no ta partisipá ku nan den mal kondukta. (1 Pedro 4:⁠4) Sin embargo, Hesus ta duna bo e palabranan di konsuelo aki: “Bendishoná boso ta ora ku hende insultá boso i persiguí boso, i ta gaña tur klase di maldat riba boso pa mi kousa.” (Mateo 5:11) Kon por ta ku tentamentu ta un bendishon? Dor ku bo sa ku bo ta hasi Yehova su kurason kontentu! (Proverbionan 27:11) I si bo hasi Yehova kontentu, bo ta riba kaminda pa haña bida eterno komo rekompensa!​—⁠Lukas 10:​25-28.

Ménos mal ku no ta tur bo kompañeronan di skol⁠—⁠i kisas ni sikiera e mayoria⁠—⁠lo trata bo malu si bo topa nan den sirbishi. Un hóben britániko ku yama Angela ta kòrda nos esaki: “Ora bo topa un kompañero di skol na un porta di kas, hopi bes nan tin mas miedu ku bo!” De echo, algun di nan por tin basta gana di sa ta kiko bo tin di bisa. Di tur manera, hopi hóben kristian ta disfrutá di hopi éksito dunando nan kompañeronan di skol testimonio. Nos siguiente artíkulo den e seri aki lo mustra algun manera pa bo tambe hasié.

[Plachi na página 21]

Hopi hóben tin miedu di topa un kompañero di skol den sirbishi

[Plachi na página 23]

Nunka laga tentamentu pone bo sinti bèrgwensa di bo fe