Sakrifisio i Riesgonan di Duna Lès

“Hende ta spera masha hopi di esnan ku ta duna lès, sin embargo masha poko bes edukadónan dediká na nos skolnan ta haña elogio . . . públikamente pa nan esfuersonan.”​—⁠Ken Eltis, Universidat di Sydney, Oustralia.

HENDE tin ku atmití ku e profeshon aki ku a ser yamá e “profeshon di mas importante” tin hopi desafio kuné: for di salario insufisiente te na lokalnan den mal kondishon; for di muchu trabou di papel te na klasnan muchu grandi; for di falta di rèspèt i violensia te na mayornan indiferente. Kon algun maestro ta trata ku e desafionan aki?

 Falta di Rèspèt

Nos a puntra kuater maestro di e stat di New York kiko nan ta kere ta e problemanan prinsipal. Nan a kontestá unánimamente: “Falta di rèspèt.”

Segun William di Kenia, na Áfrika tambe kos a kambia den e aspekto aki. El a bisa: “Muchanan ta hañando ménos disiplina. Ora ami tabata kresiendo [awor e tin 40 i piku aña], a konsiderá maestronan entre esnan mas respetá den komunidat afrikano. Tantu mucha yòn komo hende grandi semper tabata konsiderá e maestro komo ‘role model.’ E rèspèt aki ta menguando. Kultura oksidental pokopoko ta influensiá e hóbennan, asta esnan ku ta biba mas den kunuku di Áfrika. Pelíkula, vidio i literatura ta presentá falta di rèspèt pa outoridat komo un kos heroiko.”

Giuliano, kende ta duna lès na Italia, ta lamentá: “Muchanan ta wòrdu afektá dor di e spiritu di rebelion i desobedensia ku a penetrá den henter sosiedat.”

Droga i Violensia

Tristu pa bisa, pero droga a bira un problema asina grandi na skolnan ku LouAnne Johnson ku ta outor i maestra na Merka a skirbi: “Prevenshon di droga ta parti di e programa di skol, desde lushiklas. [Lèternan kursivo ta di nos.] Muchanan sa mas di droga . . . ku mayoria hende grandi.” Tambe el a bisa: “Alumnonan ku no tin konfiansa propio, ku ta sinti ku ningun hende no ta stima nan, ta sinti nan nan so, laf òf insigur ta esnan ku tin mas chèns di eksperimentá ku droga.”​—⁠Two Parts Textbook, One Part Love.

Un maestro na Oustralia ku yama Ken, a puntra: “Kon nos maestronan por eduká un mucha di nuebe aña di edat si su mayornan mes a introdusié na droga, i ku awor ta adikto?” Michael, di 30 i piku aña, ta duna lès na un skol sekundario na Alemania. El a skirbi: “Nos sa ku tin bendementu i uso di droga, pero masha poko bes ta deskubrí esaki.” Tambe el a komentá riba e falta di disiplina i a bisa ku esaki “ta ser reflehá den un tendensia general ku e alumnonan tin di destruí kos.” El a sigui bisa: “Nan ta susha mesa i murayanan, i ta kibra mueblenan. Polis a arestá i interogá algun di mi alumnonan pa motibu di ladronisia den pakus i kosnan por el estilo. No ta nada straño ku frekuentemente tin hòrtamentu na skol! ”

Amira ta duna lès den e Estado di Guanajuato, Mèksiko. El a atmití: “Nos ta enfrentá problema di violensia i adikshon na droga den famia ku ta afektá e muchanan direktamente. Nan ta kompletamente rondoná i ta ser afektá dor di un ambiente den kua nan ta siña palabra sushi i otro bisionan. Un otro problema grandi ta pobresa. Maske edukashon ta pòrnada, e mayornan tin ku kumpra skref, pèn i otro materialnan. Pero kuminda ta na promé lugá.”

 Arma na Skol?

Na Merka tiroteonan ku a tuma lugá resientemente na skolnan ta mustra bon kla ku violensia relashoná ku arma no ta un problema chikí den e pais ei. Un informe ta bisa: “Nan ta kalkulá ku 135.000 arma ta ser hibá na e 87.125 skolnan públiko di e nashon aki tur dia. Pa redusí e kantidat di armanan na skol, ofisialnan ta usa aparatonan pa detektá arma, kámaranan, kachónan spesialmente entrená pa buska arma, razia den lòkernan, uso di karnèt pa identifikashon, i a prohibí uso di tas.” (Teaching in America) Tal medidanan di siguridat ta pone hende puntra: Ta di kiko nos ta papiando, di skol òf prizòn? Tambe e informe ta bisa ku nan a kita mas ku 6.000 alumno for di skol dor ku nan a bai skol ku arma!

Iris, un maestra na e stat di New York, a bisa Spièrta!: “E alumnonan a smòkel arma drenta skol kuné. E aparatonan pa detektá metal no ta stroba e armanan di drenta. Vandalismo na skol ta un otro problema grandi.”

Maestronan konsiente tin ku lucha kontra di e ambiente di anarkia aki pa duna mucha edukashon i siña nan balornan. Nada straño ku hopi maestro ta sufri di depreshon i agotamentu. Rolf Busch, presidente di e Asosiashon di Maestronan na Thuringia, Alemania, a bisa: “Kasi un tersera parti di e un mion maestro na Alemania ta bira malu pa motibu di strès. Nan ta sinti nan agotá ora nan ta trahando.”

Muchanan Ku Ta Haña Beibi

Un otro problema grandi ta aktividat seksual di adolesentenan. George S. Morrison, ku a skirbi e buki Teaching in America, ta bisa di e pais ei: “Mas o ménos 1 mion tiner (11 porshento di mucha muhé entre 15 pa 19 aña) ta sali na estado tur aña.” Di tur e paisnan desaroyá, Merka tin e porsentahe mas haltu di embaraso di tiner.

Iris a konfirmá e asuntu aki ora el a bisa: “E tópiko ku adolesentenan ta papia mas di dje ta relashon seksual i fiesta. E kos aki ta un opseshon. Anto awor nos tin Internet riba kòmpiuter na skol! Esaki kier men akseso na gruponan di chat i pornografia.” Angel di Madrid, Spaña, a bisa: “Inmoralidat seksual entre e alumnonan ta un realidat. Nos tabatin kaso di alumnonan masha yòn ku ta sali na estado.”

“Babysitternan Glorifiká”

Un otro keho ku algun maestro tin ta ku hopi mayor no ta asumí nan responsabilidat pa eduká nan yunan na kas. Segun maestronan, mayornan mester ta e promé edukadónan di nan yunan. Bon manera i étika mester kuminsá na kas. Nada straño ku Sandra Feldman, presidente di e Federashon Merikano di Maestro, ta bisa ku ‘mester trata maestronan mas manera otro profeshonalnan i ménos manera babysitternan glorifiká.’

Hopi bes mayornan no ta apoyá e disiplina ku nan yunan ta haña na skol. Leemarys, menshoná den e artíkulo anterior, a bisa Spièrta!: “Si bo hiba e muchanan delinkuente serka e kabes di skol, bo por konta ku e mayornan ta bai kontra bo!” Relashoná ku e manera pa trata ku alumnonan problemátiko Busch ku ya a ser menshoná kaba a bisa: “Edukashon den famia ta disparsiendo. Bo no por asumí mas ku mayoria mucha ta bin for di famianan ku a kria nan di un manera rasonabel i bon.” Estela, di Mendoza, Argentina, a bisa: “Komo maestro nos tin miedu di e alumnonan. Si nos duna nan un mal punto, nan ta tira nos ku piedra òf ta ataká nos. Si nos tin un outo, nan ta hasi daño na dje.”

 Ta algu straño ku den hopi pais tin un skarsedat di maestro? Vartan Gregorian, presidente di e Korporashon di Carnegie di New York, a atvertí: “Nos skolnan [merikano] ta bai tin mester di mas ku 2,5 mion maestro nobo durante e siguiente dékada.” Statnan grandi “ta drùk bezig buskando maestronan for di India, Islanan di Antia, Suráfrika, Europa i di kualkier otro kaminda ku por haña bon maestro.” Naturalmente esaki lo por tin komo resultado ku e áreanan ei lo haña nan ku un skarsedat di maestro.

Pakiko Tin Skarsedat di Maestro?

Yoshinori, un maestro di skol hapones ku tin 32 aña di eksperensia, a bisa ku “duna lès ta un trabou noble ku un bon motibu su tras, i e ta un trabou hopi respetá den sosiedat hapones.” Lamentablemente, esaki no ta e kaso den tur kultura. Gregorian, sitá anteriormente, tambe a bisa ku maestronan “no ta haña rèspèt, rekonosementu i kompensashon komo profeshonal. . . . Den mayoria estado [na Merka], maestronan ta ser pagá ménos kompará ku kualkier otro trabou ku ta rekerí un estudio universitario.”

Ken Eltis, sitá na prinsipio, a skirbi: “Kiko ta pasa ora maestronan ta deskubrí ku hopi otro trabou ku ta rekerí hopi ménos edukashon ta supstansialmente mihó pagá? Òf kiko ta pasa ora ku alumnonan ku nan a duna lès diesdos luna pasá . . . ta gana mas plaka ku nan awor akí òf ku nan lo gana despues di un periodo di sinku aña? Ora maestronan ripará esaki, sigur e ta afektá nan sintimentu di balor propio.”

 William Ayers a skirbi: “Maestronan ta mal pagá . . . Komo promedio nos ta gana un kuart di loke abogadonan ta ser pagá, mitar di loke un akountent ta gana, ménos ku un shofùr di trùk i un astiero. . . . No tin ningun otro profeshon ku ta eksigí asina tantu i ta risibí asina poko kompensashon finansiero.” (To Teach​—⁠The Journey of a Teacher) Na luna di novèmber 2000, Janet Reno, eks-konsehero legal merikano, a bisa tokante e mesun tópiko: “Nos por manda hende luna. . . . Nos ta paga nos atletanan sumanan grandi di plaka. Dikon nos no por paga nos maestronan?”

Leemarys a bisa: “Por lo general maestronan ta mal pagá. Ku tur mi añanan di estudio, ainda mi ta gana solamente un salario abou pa aña, aki na e stat di New York, un lugá yen di strès i komplikashonnan.” Valentina un maestra di St. Petersburg, Rusia, a bisa: “Pa loke ta trata entrada, e trabou di un maestro no tin masha balor. E pago semper tabata bou di e salario mínimo.” Marlene di Chubut, Argentina, ta sinti e mesun kos: “Salario abou ta fòrsa nos traha na dos òf tres lugá, koriendo di un lugá pa otro. Esaki berdaderamente ta redusí nos efektividat.” Arthur un maestro di Nairobi, Kenya, a bisa Spièrta!: “Ku un ekonomia ku ta bai atras, mi bida komo maestro no ta fásil. Manera hopi di mi koleganan lo atmití, salario abou semper a desanimá hende di skohe nos profeshon.”

Diana un maestra na e stat di New York, a keha ku e hopi trabou ku papel ta tene e maestronan okupá pa oranan largu. Un keho ku tur tabatin ta: “Henter dia papel aki papel aya ku ta tene man.”

No Tin Sufisiente Maestro, Anto Muchu Hopi Alumno

Berthold di Düren, Alemania, a menshoná un otro keho ku ta bini padilanti regularmente: “E klasnan ta muchu grandi! Akinan algun tin mas ku 34 alumno. Esaki ta nifiká ku nos no por presta atenshon na e alumnonan ku tin problema. Nan ta ser ignorá. Nesesidatnan individual ta wòrdu neglishá.”

Leemarys sitá anteriormente a splika: “Aña pasá fuera di e echo ku mayornan ta indiferente, mi problema di mas grandi tabata ku mi tabatin 35 alumno den mi klas. Imaginá bo ta purba traha ku 35 mucha di seis aña di edat!”

Iris a bisa: “Aki na New York tin un skarsedat di maestro, spesialmente di wiskunde, natuurkunde i scheikunde. Nan por haña un mihó trabou otro kaminda. P’esei, e stat a buska hopi maestro stranhero.”

Klaramente, duna lès ta un trabou ku ta eksigí hopi di un persona. Pues anto kiko ta mantené un maestro motivá? Dikon nan ta sigui i ta perseverá? Nos último artíkulo lo kontestá e preguntanan aki.

Komentario na página 9]

Nan ta kalkulá ku na Merka 135.000 arma ta ser hibá skol tur dia

[Kuadro/Plachi na página 10]

Kiko Ta Hasi un Maestro Eksitoso?

Kon lo bo deskribí un maestro eksitoso? E ta un persona ku por desaroyá e memoria di un mucha di tal manera ku e por ripití echonan i pasa tèst bon? Òf e ta un persona ku ta siña bo analisá, pensa i rasoná? Òf e ta un persona ku ta yuda mucha bira un mihó siudadano?

“Ora nos komo maestro ta rekonosé ku nos ta partner di nos alumnonan den e biahe largu i kompliká di bida, i kuminsá trata nan ku e dignidat i e rèspèt ku nan meresé komo hende, e ora ei nos ta riba e kaminda pa bira maestronan balioso. E ta masha fásil i masha difísil a la bes.”​—⁠To Teach​—⁠The Journey of a Teacher.

Un bon maestro ta rekonosé kiko kada alumno por i sa kon pa hasié progresá. William Ayers a komentá: “Nos mester haña un mihó manera, un manera ku ta edifiká riba puntonan fuerte, eksperensia, abilidat i kapasidat . . . Esei ta hasi mi kòrda e súplika di un mayor merikano nativo kende su yu hòmber di sinku aña a ser tildá komo un ‘siñadó lento’: ‘Wind-Wolf sa nòmber di mas ku kuarenta para i e rutanan ku nan ta bula. E sa ku águila tin diestres pluma na su rabu ku ta balans’é perfektamente. Loke e tin mester ta un maestro ku sa kiko e por.’ ”

Pa saka lo mihó for di kada mucha, e maestro mester deskubrí loke ta interesá i motivá e mucha i loke ta pone e mucha pensa i komportá su mes di sierto forma. I un maestro dediká mester stima mucha.

[Rekonosementu]

United Nations/Photo by Saw Lwin

[Kuadro na página 11]

Siñamentu Semper Mester Ta Algu Dibertido?

E maestro, William Ayers, a traha un lista di pensamentu robes ku tin en kuanto dunamentu di lès. Un di nan ta: “Bon maestronan ta hasi siñamentu un kos dibertido.” E ta sigui bisa: “Dibertishon ta distraé i entretené. Payaso ta entretené hende. Chiste por ta dibertido. Siñamentu ta algu ku ta enbolbé bo, apsorbá bo, sorprendé bo, desorientá bo, i hopi bes sumamente agradabel. Si e ta dibertido, ta bon. Pero no ku e mester ta dibertido.” Tambe el a bisa: “Pa un hende duna lès e tin mester di un variedat amplio di konosementu, abilidat, kapasidat, disernimentu i komprendementu⁠—⁠i mas importante ainda, e ta rekerí pa e ta un persona bondadoso ku ta mustra interes.”​—⁠To Teach​—⁠The Journey of a Teacher.

Sumio di e stat di Nagoya, Hapon, a ripará ku su alumnonan tin e siguiente problema: “Hopi alumno di skol sekundario no ta interesá den nada otro ku dibertí nan mes i hasi loke no ta rekerí niun esfuerso.”

Rosa, konsehero di studiante na Brooklyn, New York, ta bisa: “E aktitut general di alumnonan ta ku siña ta laf. E maestro ta laf. Nan ta pensa ku tur kos mester ta dibertido. Nan no ta komprendé ku loke bo ta saka for di siñamentu ta dependé di e esfuerso ku bo ta hasi pa siña.”

E opseshon ku mucha yòn tin pa dibertishon ta pone ku ta difísil pa nan hasi esfuerso i sakrifisio. Sumio, sitá ariba a bisa: “E problema ta ku nan no por diserní kiko lo influensiá nan futuro. Tin masha poko alumno di skol sekundario ku ta pensa ku si nan traha duru pa algu awor aki, esei lo benefisiá nan den futuro.”

[Plachi na página 7]

DIANA, MERKA.

[Plachi na página 8]

‘Bendementu i uso di droga ta komun pero masha poko e ta ser deskubrí.’​—MICHAEL, ALEMANIA

[Plachi na página 8, 9]

“Nos ta enfrentá problema di violensia i adikshon na droga den famia.”​—AMIRA, MÈKSIKO

[Plachi na página 9]

‘Mester trata maestronan mas manera otro profeshonalnan i ménos manera babysitternan glorifiká.’​—SANDRA FELDMAN, PRESIDENTE DI E FEDERASHON MERIKANO DI MAESTRO