Zjangada—Un Boto di Bela Pekuliar di Brazil

DJE KORESPONSAL DI SPIÈRTA! NA BRAZIL

YA PA vários siglo, piskadónan ku kurashi yamá ‘zjangadeiros’ a nabegá e kosta nortost di Brazil den pleno solo den nan zjangadanan simpel pero bunita. Laga mi konta bo kiko mi a siña tokante e botonan di bela pekuliar aki.

Na promé instante un zjangada por pone bo pensa riba un boto trahá den purá dor di hende ku a noufragá. Pero no bruha; un zjangada por yega un velosidat di te diesdos kilometer pa ora, i kompetí den regata. Apesar ku su diseño ta simpel, e por keda vários dia riba laman, i bo por topa unu 60 kilometer for di kosta banda di barkunan transatlántiko grandi. *

Originalmente nan a kuminsá usa zjangada na Brazil na fin di siglo 17 komo boto di peska pa laman ganchu. Kolonisadónan portugues a pega un bela triangular riba e botonan fofo ku e nativonan tabata usa. Hende ta kere ku ta e portuguesnan a bini ku e nòmber zjangada, ku kier men “pegá na otro.” Promé ku nan a yega Brazil, e portuguesnan a bishitá India, kaminda nan a adoptá e palabra aki for dje idioma tamil.

For dje promé tempunan ei te awor, zjangada a konosé vários kambio. Ántes e kurpa dje boto tabata konsistí di sinku te ocho tronkon di palu fofo (por ehèmpel, piúva), mará ku kabuya di mata, sin ni un solo skruf ni klabu. Awendia mayoria dje botonan aki ta trahá di tabla manera esnan ku bo ta usa pa traha boto, i p’esei nan ta mas duradero. Otro inovashon ta un kaha di palu furá ku plachi di zink i foam, ku nan ta usa pa warda loke nan piska. E tamaño di zjangada no a kambia. Nan ta varia entre 16 pa  26 pia largu, i por ta te 6 pia hanchu.

Durante e último dékadanan, boto di peska moderno ta forma kompetensia pa nan, i a obligá hopi zjangadeiro buska otro trabou, por ehèmpel di hiba turista keiru riba zjangada. Ainda tin un par di pueblito tradishonal di piskadó n’e kosta nortost di Brazil. Bida den e pueblitonan ei ta simpel. Den hopi di nan, miéntras ku e hòmbernan ta riba laman, e hende muhénan ta gana algu èkstra pa yuda e famia dor di traha obra di kanchi fini.

Ta na un pueblito di piskadó na e playa di Murcuripe mi ta bai dal mi promé trep riba un zjangada.

Un Dia Komo Zjangadeiro

Kuat’or di mardugá, n’e playa nan ta sera mi konosí ku mi kuater ko-nabegantenan. Assis ta nos kapitan. Ora ku nan kaba di hisa bela, mi promé trabou ta di yuda pusha e zjangada for di riba e tronkonnan di palu di carnauba, i hink’é den laman. Kasi mesora e zjangada ta yena ku awa, i ta parse ku e ta bai hundi. Ménos mal ku ta mi idea. Ta kasi imposibel pa un zjangada hundi. E tripulashon ta konta mi ku tin bes nan ta bòltu sí, i pa bo lanta nan bèk bo mester ta un nabegante ku eksperensia i un bon landadó. En todo kaso, ora nos bai mas leu riba laman, olanan ta subi dèk konstantemente.

Nos kapitan ta tuma su posishon patras den e boto, kaminda e ta kontrolá e bela i e timon. Otro zjangadeiro ta na kabes di e boto. E dos otro tripulantenan, wantá n’e baranan, ta lèn den banda pa balansá e zjangada ora e ta bai di banda. Mi ta pensa ku, komo opservadó, mihó kos ku mi por hasi ta di tene duru n’e baranan. Hopi bes, hende manera ami ku ta nabegá pa promé bes ta marea, pero mi ta purba wanta lo mihó ku mi por.

Despues di nabegá pa mas o ménos dos ora, nos ta yega nos destino. Den purá e tripulantenan ta baha bela i tira anker, ku ta un piedra den un erante di palu, i nan ta kuminsá piska. Nan ta usa gewoon liña, no hengel. Ta p’esei nan man ta yen di marka i kayo. Ademas di piska, tin bes nan ta kohe kref den un trampa ku nan ta yama manzuá. E ta trahá di bambu i un liña di nylon. Tin di nan ta usa sombré di kabana hanchu pa tapa solo. Otronan ta bisti djis un pèchi.

Pa un zjangadeiro, bida ta duru; un rutina di salu, sodó i solo. Maske e fishi a pasa di tata pa yu durante siglonan, kada bes ménos hóben ta skohe pa siñ’é.

Mèrdia, nos i vários otro zjangada ta kuminsá bai bèk den direkshon di kosta. Ku nan belanan blanku elegante riba e laman bèrdè briante i e shelu blou, nan ta konkistá e furia dje olanan. E bista presioso aki a inspirá vários poema i kantika.

Ora nos yega tera mi ta yuda pusha e zjangada bèk riba su palunan den santu. Normalmente un zjangada por pisa un 300 kilo, pero ku nos brasanan kansá e ta parse hopi mas pisá. E zjangadeironan ta bende loke nan a piska ku un rebendedó, pa e bende nan ku pueblo. Nos biahe tabata kòrtiku, i ta un par di kilo di piská so nos a kohe. Pero un zjangada por karga te 1.000 kilo di piská. Mi ta gradisí e tripulashon i ta bolbe kas kansá pero satisfecho. E anochi ei riba kama, ainda mi por a sinti e zjangada ta bai bin; Brazil su boto di bela primitivo pero pekuliar.

[Nota]

[Plachi na página 17]

Un zjangada tradishonal di tronkon di palu, ku nan no sa usa mas

[Plachi na página 17]

Normalmente un zjangada por pisa un 300 kilo