E Diferente Tareanan di un Mama

4:50 a.m. Alex, (e beibi yorando i mitar na soño) ta subi e banda di kama kaminda Helen, su mama, ta. Helen su kasá Nick i e otro dos yunan, Penny di 5 aña ku Joanna di 12, ta drumí. Helen ta hisa Alex riba kama i ta dun’é pechu. Awor e mes no por bai drumi mas.

5:45 a.m. Helen ta kana ketu-ketu bai den kushina, traha kòfi, i lesa.

6:15–​7:20 a.m. Nick ta lanta. Helen ta lanta Penny ku Joanna for di soño, ta prepará desayuno i hasi algun trabou di kas. Ora tin 7:15, Nick ta sali pa bai trabou i ta pasa baha Joanna na skol. Helen su mama ta yega pa babysit Alex.

7:30 a.m. Helen ta baha Penny na lushiklas. Riba kaminda pa trabou Helen ta haña chèns pa pensa riba loke ser mama ta enserá. E ta bisa: “E ta e trabou di mas difísil ku mi a yega di tin.”

8:10 a.m. Ora Helen yega trabou e ta hañ’é ku masha hopi kos di hasi. E tin miedu di sali na estado atrobe pasobra esei lo por nifiká ku e ta pèrdè su trabou. I su famia mester di e entrada èkstra.

10:43 a.m. Despues ku Helen sera e telefon (un yamada tokante su yunan), Nancy su kolega di trabou ta konsol’é bisando: “Bo ta hasiendo un bon trabou komo mama.” Lágrimanan ta basha for di Helen su wowo.

12:05 p.m. Tanten ku Helen ta kome un sèntwich purá-purá, e ta reflekshoná riba e tempu promé ku su yu muhé a nase. E tempu ei e tabata planea kosnan p’e hasi den su tempu “liber.” ‘Esta ekiboká mi tabata!’ e ta konkluí.

3:10 p.m. Despues di vários yamada di telefon tokante e kosnan prèt ku Alex a hasi, Helen ta menshoná ku e tin un relashon spesial ku su yunan: “Nunka mi a yega di sinti e amor aki pa ningun otro hende.” Ta e sintimentunan profundo aki a yud’é vense e problemanan inesperá ku el a hañ’é ku n’e na prinsipio.

5:10 p.m. Despues ku e kaba di buska Joanna, Helen ta hasi algun diligensia. E ta yama Nick na telefon pa kòrd’é ku ta su bùrt pa pasa buska Penny for di skol.

6:00–​7:30 p.m. Ora Helen yega kas bèk, Wela por bai kas. Anto Helen ta sigui kuida Alex i hasi trabou di kas, i prepará kuminda. Ora nan a puntr’é kiko kuida un beibi ta enserá, Helen a suspirá bisando: “Un beibi kier tur kos di su mama: su brasanan, kurpa, lechi i asta e ta pon’é pèrdè soño.”

 8:30–​10:00 p.m. Helen ta yuda Joanna ku hùiswèrk i ta duna Alex pechu. Miéntras Nick ta lesa un mei ora asina pa Penny, Helen ta hasi algun trabou di kas mas.

11:15 p.m. Despues ku Penny ku Joanna a bai drumi, Alex ainda ta lantá den brasa di su mama, pero finalmente e ta pega soño. “Mi ta kere ku awor e por bai drumi den su kama,” Helen ta bisa Nick, kende ta mitar na soño kaba.