E Kareda Yen di Opstákulo di Mamanan

Di ser un mama ta un aventura kompliká pero emoshonante. Mamanan ta disfrutá di momentunan masha dushi mes ku nan lo no kier kambia pa nada di mundu. Sin embargo, tin bes algun mama por sinti ku nan ta kasi kai den otro. Helen ta kompará su bida komo mama ku un kareda yen di opstákulo. I ta parse ku segun ku tempu ta pasa e opstákulonan ta bira mas tantu i mas grandi.

Mamanan ta sakrifiká gran parti di nan tempu liber i di nan bida sosial pa hasi sigur ku nan yunan ta bon kuidá. Esther (un mama di sinku yu) ta bisa: “Mi mester ta disponibel tur ora. Mi mester a stòp di baña di un manera relahá i kuminsá dal mi bañonan lihé-lihé, anto tambe mi a stòp di prepará senanan romántiko i kuminsá hasi kuminda purá-purá den microwave. Mi no por a biaha hopi ni mira hopi lugá ni hasi hopi kos. Pero mi pañanan ta labá i doblá sí!”

Naturalmente, mayoria mama lo papia tambe di momentunan úniko di alegria ku nan ta eksperensiá segun ku nan ta kria nan yunan. Esther ta bisa: “Loke ta duna bo forsa pa sigui ta e smail ku de bes en kuando nan ta duna bo, e palabranan dushi ku nan ta bisa manera: ‘Danki Mami,’ i e brasanan tierno ku nan ta duna bo. Tur esaki ta yuda bo sigui padilanti.” *

 Mama Ta Bai Traha

Un opstákulo grandi ku a kompliká bida di mamanan ta e echo ku miéntras nan ta kumpli ku e responsabilidat tradishonal di famia na kas, nan ta bai traha pa yuda e famia finansieramente. Hopi di e mamanan aki ta traha for di kas, no pasobra nan ta deseá di hasi esei sino pa motibu ku e ta nesesario. Nan sa ku si nan keda kas, nan famia, spesialmente nan yunan, lo keda sin haña hopi kos ku nan mester di dje. Ounke hopi bes nan salario ta ménos kompará ku esun di hende hòmber ku ta hasi e mésun trabou, e ta di gran importansia.

Por ehèmpel, na São Paulo, Brazil, 42 porshento di e klase trahadó ta hende muhé. Un korant einan a yama mamanan ku ta dediká tur nan tempu na kriansa di nan yunan “un espesie den peliger.” Den e kunukunan di Áfrika, no ta nada straño pa mira un mama ku un bulto di palu pa kandela riba su kabes miéntras e ta karga su yu riba lomba.

Empleo Eksigente

Loke ta kousa mas opstákulo ainda ta e echo ku merkado laboral sa eksigí pa mamanan traha oranan largu. Anto esei no ta tur kos. Ora ku nan a tuma Maria (kende ta biba na Gresia) na trabou, su doño di trabou a pidié firma un dokumento den kua e ta primintí ku lo e no sali na estado pa tres aña. Anto si e sali na estado, lo e mester paga un suma. Maria a firma e papel. Pero despues di un aña i mei el a sali na estado. Su doño di trabou a mustra Maria e dokumento ku el a firma. Maria na su turno a bai korte ku e regla di e kompania i awor e ta wardando riba e veredikto.

Den situashonnan ménos ekstremo, doñonan di trabou por preshoná mamanan pa bin traha bèk asina nan kaba di duna lus. Generalmente nan no ta pèrmití nan traha ménos ora despues ku nan kuminsá traha atrobe. Pues trabou no ta adaptá na e echo ku awor e mama tin responsabilidat èkstra, esta, pa kuida un beibi. Nan no por pidi ‘buiten bezwaar’ pasobra nan tin mester di e plaka. Tambe mamanan tin ku trata ku e problemanan ku krèsh inferior ta trese kuné i ku e echo ku gobièrnu no ta duna nan sufisiente yudansa finansiero.

Di otro banda, tin algun mama ku ta traha pasobra nan kier tin e satisfakshon di a logra algu ku ta bale la pena, i no pasobra nan tin mester di e plaka. Sandra a disidí di bai trabou bèk despues di nasementu di su dos yunan. E ta kòrda ku ora e tabata haña su mes su so na kas ku e beibi, ‘tin bes e tabata para lombra wowo den direkshon di e bentana i puntra su mes ta kiko e resto di mundu tabata hasiendo.’ I tambe tin mama ta purba hui di e strès di bida di famia dor di bai traha. E korant Daily Telegraph di Gran Bretania a informá: “Tin mayor ta buska manera di traha mas ora den e ambiente relativamente trankil di trabou. Esaki ta krea un sírkulo visioso, ya ku nan ta redusí e kantidat di ora ku nan ta pasa ku yunan ku kada bes ta bira mas indiferente, agresivo i mala mucha.”

Purbando di Balansá Vários Kos A La Bes

No ta fásil pa balansá trabou ku responsabilidatnan na kas. Un mama hulandes a bisa loke hopi otro ta sinti: “Kansá, kansá i kansá. Asta ora mi lanta, mi ta kansá. Ora mi bin for di trabou, kansansio ta dominá mi. Ya kaba e muchanan ta bisa: ‘Semper Mami ta kansá.’ I esei ta pone mi sinti mi kulpabel. Mi no kier keda sin bai trabou, pero na e mesun momentu mi kier ta un mama agradabel ku ta hasi tur kos posibel. Pero mi no ta e ehèmpel perfekto ku mi kier ta.”

E ta un di e míles di mamanan ku ta traha i ku a  aseptá e pensamentu ku pasa ‘tempu di kalidat’ ku e muchanan en parti por kompensá e echo ku e no ta tur ora huntu ku su yunan. Pero tòg e ta haña ku e pensamentu aki no a duna e resultado deseá. Hopi mama awendia ta bisa ku nan esfuerso pa trata ku e strès di trabou huntu ku e responsabilidatnan di kas ta pone ku nan ta keda morto kansá, kargá i nan no ta wòrdu bon pagá.

Ora hende muhé ta pasa muchu ora sin nan yunan, e muchanan no ta haña loke nan tin mas mester di dje: e tempu i atenshon di nan mama. Fernanda A. Lima, sikólogo di mucha na Brazil, ta bisa ku ningun hende por kumpli ku e papel di mama manera e mama mes. E ta bisa: “E promé dos añanan di e mucha su bida ta esnan mas importante. E mucha ta muchu chikitu pa komprendé dikon su mama no t’ei.” Un otro persona por yena parsialmente e nesesidat ku un mucha tin di su mama pero e no por remplas’é. Lima ta bisa: “E beibi ta sinti ku e no ta hañando e kuido amoroso di su mama.”

Kathy, un mama ku tin un yu muhé chikitu i ku ta traha henter dia a bisa: ‘Mi tabata sinti mi masha kulpabel mes, komo si fuera mi tabata bandon’é [na krèsh]. Esaki ta duru pasobra bo sa ku bo ta pèrdiendo e oportunidat di mira bo yu krese i desaroyá, i bo ta sinti bo masha straño ora bo pensa ku e ta mas pegá na hende di krèsh ku na abo.’ Un stewardess na Mèksiko a atmití: “Despues di un tempu, bo yu no ta rekonosé bo mas, e no ta respetá bo, simplemente pasobra no ta abo ta lantand’é. Nan sa ku bo ta nan mama, pero di ripiente, nan ta preferá di ta ku e señora ku ta kuida nan.”

Di otro banda, mamanan ku ta keda kas pa kuida nan yunan ta bisa ku dor ku komunidat ta duna masha importansia na trabou pagá, nan tin ku soportá menospresio i humiashon. Den algun kultura hende no ta konsiderá e posishon di un ama di kas komo unu onorabel mas. P’esei hende muhé ta sinti nan preshoná pa tin nan mes karera, asta si nan no tin mester di un entrada èkstra.

Nan So Mester Lucha

Loke ta kontribuí ku un mama ta haña mas opstákulo ainda ta e echo aki: Despues di henter un dia di trabou, un mama ta yega kas kansá, no pa deskansá, sino pa sigui ku e trabounan normal di kas. Hopi bes sea ku mamanan ta traha òf nò, hende ta konsiderá nan komo esnan ku ta prinsipalmente responsabel pa atendé ku e trabounan di kas i ku e yunan.

Miéntras ku kada bes mas mama ta traha pa oranan largu, tòg no ta semper tatanan ta koperá ku nan. The Sunday Times di Lònden a skirbi: “Un investigashon nobo ku nan a hasi ta indiká ku Gran Bretania ta un nashon di tatanan ousente, pasobra hende hòmber ta pasa ménos ku 15 minüt pa dia ku nan yunan. . . . Hopi hende hòmber no ta gusta mashá pa ta huntu ku nan famia. . . . Na komparashon, un mama britániko ku ta traha lo pasa 90 minüt pa dia ku su yunan.”

 Tin esposo ta keha ku nan esposa tin difikultat pa delegá trabou di kas pasobra e ta insistí ku tur kos mester wòrdu hasí na e manera ku é ta hasi nan. “Si bo no hasié asina, e no ta bon” e esposonan ta bisa. Klaramente, pa un ama di kas kansá haña e koperashon di su esposo, e mester ta fleksibel en kuantu e manera ku e tareanan ta ser hasí. Di otro banda, e esposo no mester usa e argumento ei komo un èksküs pa keda sin yuda.

Mas Opstákulo

Tradishon ku ta firmemente ankrá tambe por trese mas opstákulo ainda. Komunidat hapones ta  fèrwagt pa mamanan lanta nan yunan di un manera similar ku otro mamanan ku tin yunan di mesun edat. Si otro yunan ta bai lès di piano òf lès di pintamentu, un mama ta sintié obligá pa laga su yunan hasi e mesun kos. Skolnan ta preshoná mayornan pa laga nan yunan hasi e mesun aktividatnan ku otro muchanan ta hasi despues di skol. Si bo yunan ta diferente esei por pone ku otro muchanan, maestronan i otro mayornan i famianan ta keda fastidiá nan. E mesun kos ta sosodé den otro pais.

Propaganda i un deseo di kumpra kos por pone yunan eksigí nan mayornan pa kumpra kos pa nan. Den paisnan desaroyá, mamanan kisas ta sinti ku nan mester kumpra tur loke nan yunan kier dor ku nan ta mira otro mamanan hasi esei. Si nan no por hasi esei, nan ta sinti ku nan a frakasá.

E konsiderashon aki relashoná ku mamanan moderno no mester pone nos duda ku tin miónes di mama ku ta traha duru i hasi sakrifisio propio. Nan ta hasi nan bèst pa kumpli ku un di e kousanan di mas noble: lanta e generashonnan di futuro di e famia humano. Esaki ta un privilegio, pasobra Beibel ta bisa: “Yunan ta un regalo di SEÑOR, nan t’un berdadero bendishon.” (Salmo 127:⁠3, Beibel na papiamentu koriente) Miriam (ku ta un mama di dos yu) a representá e mamanan ei bon ora el a bisa: “Apesar di e desafionan, ser mama ta trese gosonan inkomparabel. Ora nos ku ta mama mira nos yunan reakshoná na e entrenamentu i disiplina ku nos ta duna nan, i bira miembronan responsabel di sosiedat, esaki ta duna nos un satisfakshon.”

Kiko por yuda mamanan disfrutá mas di nan regalo? E siguiente artíkulo lo duna algun sugerensia práktiko.

[Nota]

[Kuadro na página 6]

“Dia di Mama”

Pobresa teribel, falta di edukashon, esposonan iresponsabel, abusu frekuente i e epidemia di AIDS ta plaga mamanan na Suráfrika. Resientemente riba Dia di Mama, un korant di Suráfrika, The Citizen, a informá: “Hòmbernan lo abusá di míles di hende muhé i algun lo pèrdè nan bida riba Dia di Mama.” E tipo di problemanan aki ta pone ku tur aña míles di mama surafrikano ta bandoná nan beibi. Den un periodo resien di dos aña, e kantidat di beibinan ku nan a bandoná a subi ku 25 porshento. Loke ta shòk bo mas ainda ta ku kada bes mas hende muhé ta kometé suisidio. Resientemente, un hende muhé ku ta biba den un área pober a tene su tres yunan den su brasa miéntras un trein tabata biniendo riba nan. Nan tur a muri. Pa nan logra sobrebibí, tin mama ta bira prostituta i bende droga òf ta animá nan yu muhénan pa hasi esei.

Un informe di Hong Kong ta mustra ku “algun mama hóben ta mata nan beibi despues ku nan kaba di duna lus òf ta benta nan beibi den barí di sushi, dor ku nan no por ku e preshonnan.” Un korant ku yama South China Morning Post a menshoná ku na Hong Kong algun hende muhé hóben kasá “awor ta bou di preshon asina fuerte [ku] nan salú mental por bai atras te na e grado ku nan ta mata nan mes.”

[Kuadro na página 7]

Mamanan di Vários Pais

Asina poko tempu

❖ Un enkuesta na Hong Kong a mustra ku 60 porshento di mamanan ku ta traha ta haña ku nan no ta dediká sufisiente tempu na nan yunan. Den siman, 20 porshento di mucha bou di tres aña no ta biba na kas di nan mayornan ku ta traha. Hopi bes nan ta biba serka nan welonan.

❖ Hende muhé na Mèksiko ta pasa un 13 aña di nan bida ta kuida por lo ménos un yu ku tin ménos ku sinku aña.

Mamanan i trabou

❖ Na Irlanda 60 porshento di hende muhé ta keda kas pa kuida nan yunan. Na Gresia, Italia i Spaña, mas o ménos 40 porshento di hende muhé ta hasi e mesun kos.

Yudando ku trabou di kas

❖ Na Hapon 80 porshento di ama di kas a bisa ku nan ta deseá pa un miembro di famia yuda nan ku e trabounan di kas, spesialmente ora nan ta malu.

❖ Na Hulanda hende hòmber ta dediká 2 ora pa dia na nan yunan i 42 minüt na trabou di kas. Hende muhé ta pasa un 3 ora ku nan yunan i 1 ora ku 42 minüt na trabou di kas.

Mamanan ku strès

❖ Na Alemania mas ku 70 porshento di mama tin strès. Mas o ménos 51 porshento ta keha ku nan tin problema ku wesu di lomba i ku e diskonan ku tin meimei di nan. Mas ku un tersera parti tur ora bai ta kansá i deprimí. Kasi 30 porshento ta sufri di doló di kabes òf migraine.

Mamanan abusá

❖ Na Hong Kong 4 porshento di hende muhé ku nan a entrevistá a bisa ku nan kasá òf partner a abusá di nan durante embaraso.

❖ Un enkuesta ku e revista Focus di Alemania a hasi ta indiká ku kasi 1 di kada 6 mama a atmití ku por lo ménos un biaha nan a wòrdu ataká físikamente dor di nan yunan.

[Plachinan na página 7]

Mamanan por ta bou di hopi preshon, debí ku nan tin ku purba di balansá trabou i bida di famia ku otro