Hóbennan Sa Puntra . . .

Kon Mi Por Prediká na Mi Kompañeronan di Skol?

“Ora mi tabata prediká riba kaya diripiente mi a topa un hende ku mi konosé. Mi a keda paralisá! E persona ku mi tabata traha kuné mester a sigui papia pa mi.”​—⁠Alberto.

 “Mi tabata sa ku un mucha den mi klas tabata biba den e kaya aki, p’esei mi a laga mi ruman hòmber papia na tur e kasnan. Despues di un ratu el a haña un tiki strès i a pidi mi pa papia na e siguiente kas. Mi a bati na porta, i⁠—⁠ai no⁠—⁠tabata nèt e! Mi tabatin hopi miedu!”​—⁠James.

MUCHA yòn hopi bes no ta gusta pa bo papia ku nan tokante religion. Sin embargo, hóbennan ku ta kristian berdadero ta apresiá e privilegio ku Dios a duna nan pa kompartí nan fe ku otro hende. P’esei míles di hóben Testigu di Yehova ta partisipá den e trabou di prediká di kas pa kas. Pero algun ta bai ku e temor ku nan lo por topa un hende ku nan konosé di skol. Jennifer ta bisa: “Te ainda mi ta bira nervioso ora mi topa un hende ku mi a bai skol kuné.” Anto e ta sintié asina maske ta basta aña pasá el a kaba skol sekundario.

Si bo ta un hóben kristian, kisas lo bo sa sinti e mesun kos de bes en kuando. Naturalmente, nos tur tin miedu di haña un rechaso. Pues ta masha normal pa sinti bo un tiki nervioso ora bo tin ku papia tokante religion ku un mucha di skol. * Pero no tin motibu pa bo laga miedu dominá bo. Bo ta kòrda un hòmber den Beibel ku yama “Hosé di Arimatea”? El a kere loke Hesus a siñ’é. Sin embargo, Beibel ta deskribí Hosé komo “un disipel di Hesus, ma na sekreto pa miedu di e hudiunan.” (Huan 19:38) Awor, kon abo lo sinti bo si bo tin un amigu ku kier tene boso amistat sekreto? (Lukas 12:​8, 9) Kier men, no ta nada straño ku Dios ta spera pa kristiannan hasi “deklarashon públiko” di nan fe. (Romanonan 10:​10, NW) Esei ta inkluí papia ku e muchanan di bo skol.

Hosé di Arimatea a vense su miedu, por lo ménos te na e grado ku el a buska outorisashon pa dera Hesus. Kon abo por vense bo miedu?

Desaroyá un Anhelo pa Prediká

Apòstel Pablo no tabata tímido pa papia ku otro hende tokante su fe. Na Romanonan 1:​15, el a deskribí su mes komo un persona ku tabata ansioso pa deklará e mensahe di Beibel. Dikon e tabata asina ansioso? Manera e ta bisa na versíkulo16: “Pasobra mi no tin bèrgwensa di e evangelio, pasobra esaki ta e poder di Dios pa salbashon pa tur ku ta kere.” Kiko di abo? Realmente bo a komprobá pa bo mes kiko ta e bèrdat? (Romanonan 12:⁠2) Bo ta personalmente konvensí ku e mensahe di Beibel ta “e poder di Dios pa salbashon”?

Djis bai reunion kristian ku bo mayornan no ta sufisiente. Un hóben ku yama Deborah a bisa: “Ta fásil pa bo djis bai reunion pasobra bo mayornan ta manda bo. Pero ora hende tabata hasi mi pregunta tokante Beibel, mi no tabata sa kon pa mi kontestá nan.” Un hóben ku yama Mi Young tambe ta atmití: “Nos tin ku konvensé nos mes ku esaki ta e bèrdat.”

Kiko por animá bo pa kompartí bo konosementu di Beibel ku otronan? Un studio personal di Beibel. Un hóben ku yama Sean a bisa: “Ora bo mes kuminsá hasi bo studio personal di Beibel, bo ta kuminsá hasi e bèrdat di bo mes. Bo ta studiando pa bo mes.” Ta bèrdat ku no ta tur hende ta gusta studia di naturalesa. Shevon ta rekonosé: “Mi no gusta lesa. P’esei na prinsipio tabata duru pa mi lesa E Toren di Vigilansia ku Spièrta! òf lesa Beibel tur dia. Ma ku tempu, mi a kuminsá hasié.”

Kiko ta e resultadonan ora bo tin un studio diligente asina? Apòstel Pablo a bisa: “Fe ta bin for di tendementu.” (Romanonan 10:17) Segun ku bo fe i konvikshon ta krese, bo aktitut lo kambia sigur. Un hóben brasilero ku yama Elisângela a konkluí: “Ta un onor pa ta un kristian, e no ta algu pa tene bèrgwensa di dje.” Sí, segun ku bo fe ta krese, lo bo sinti bo motivá pa papia ku otronan, entre otro, ku e muchanan di bo klas. Pablo a bisa: “Nos tambe ta kere, p’esei nos tambe ta papia.” (2 Korintionan 4:13) Ademas, kon lo bo por ta “inosente di e sanger” di otro hende si bo ta keda sin duna e konosementu ku ta duna bida na hóbennan ku bo ta mira tur dia?​—⁠Echonan 20:​26, 27.

Tòg tin hóben kristian ku no ta sinti nan bon prepará pa papia ku otronan tokante Beibel. Un hóben ku yama Joshua a bisa: “Si bo no sa kiko pa bisa, no ta dushi pa prediká.” Un biaha mas, un komprendementu mas profundo di Beibel lo yuda bo maneh’é na un manera korekto. (2 Timoteo 2:15) Den kongregashonnan di Testigunan di Yehova, hóbennan por aserka e ansianonan di kongregashon i pidi yudansa personal den desaroyá e abilidat di siña. Un hóben di Alemania ku yama Matthias a bisa: “Ora ku realmente mi a kuminsá kombersá ku hende i no djis ofresé literatura basá riba Beibel, mi a kuminsá gusta e trabou di prediká.”

I por último, bo por pidi Dios den orashon p’e yuda bo papia ku kurashi. (Echonan 4:⁠29, NW) Apòstel Pablo personalmente a eksperensiá Dios su yudansa den e aspekto aki. Na 1 Tesalonisensenan 2:⁠2, e ta bisa: “Den nos Dios nos tabatin e kurashi di papia e evangelio di Dios  ku boso meimei di hopi oposishon.” Segun un obra di referensia, por tradusí e palabranan aki di e siguiente manera: “Dios a saka miedu for di nos kurason.” Pues, pakiko no pidi Dios den orashon p’e saka miedu for di bo kurason?

Identifiká Bo Mes

Na armonia ku e orashon ei, bo por dal un paso ku ta eksigí hopi kurashi. Un hóben britániko ku yama Chic ta konsehá: “Bisa e muchanan di bo skol ku bo ta un kristian.” Sigur lo bo no kier ta un ‘disipel sekreto.’ Un hóben ku yama Rebecca ta atmití ku un tempu e tabatin masha miedu di topa un hende ku e konosé, ora e ta prediká. Pero e ta bisa ku el a deskubrí ku “si bo bisa nan ku bo ta un kristian i ku bo ta bai di kas pa kas, tin bes nan lo puntra bo: ‘Anto, ki dia lo bo bin na mi kas?’”

Pero pakiko warda te ora boso topa otro pa kasualidat? Buska oportunidat pa kompartí bo fe na skol. Kòrda riba e preguntanan ku apòstel Pablo a hasi: “Kon nan lo kere den esun, di kende nan no a tende? I kon nan lo tende sin un predikadó?” (Romanonan 10:14) Abo ta den e mihó posishon pa yuda e muchanan di bo klas pa skucha. Un hóben ku yama Iraida a bisa: “Skol ta un teritorio pa prediká ku nos so por yega na dje.” P’esei hopi hóben ta probechá di nan situashon dor di prediká informalmente.

Tin bes un tarea di skol tambe por duna bo e oportunidat pa kompartí e bèrdat di Beibel. Un hobensita britániko ku yama Jaimie a konta: “Nos tabata papia tokante evolushon den lès di biologie, anto mi a bisa loke mi ta kere. Un di e mucha hòmbernan a hasi bofon di mi i a bisa ku Testigunan di Yehova ta bobo i no ta meresé di ta den e sistema eskolar. Apesar di esei, mesora e otro muchanan den klas a kuminsá tuma parti pa mi.” Ta bisto ku Jaimie su reputashon komo un kristian ehemplar a duna bon resultado. Jaimie a sigui bisa: “Komo resultado, mi a haña oportunidat di laga un ehemplar di e buki Ta Eksistí un Kreador Ku Ta Interesá den Bo? ku un mucha den mi klas.” *

Na Rumania un mucha muhé di 14 aña di edat ku yama Roxana ta relatá un eksperensia similar: “Mi maestra a bisa ku nos klas ta bai papia tokante alkohòl, tabako i droga. P’esei mi a bai skol ku e ehemplar di Spièrta! na spañó di 22 mart 2000, ku a trata e tópiko ‘Kon Bo Por Stòp di Huma.’ Un mucha den mi klas a mira e revista, a koh’é, i no kier a duna mi e bèk. Ora el a kaba di les’é, el a bisa ku e ta determiná pa stòp di huma.”

No ta semper lo bo haña un reakshon faborabel asina. Pero Eklesiástes 11:6 ta konsehá nos: “Sembra bo simia mainta, i no keda sin hasi nada atardi; pasobra bo no sa . . . [unda] lo tin éksito.” Anto si bo no haña un reakshon faborabel, ora bo kompartí bo kreensianan na skol esei ta pone un fundeshi pa un kòmbersashon mas agradabel den e trabou di prediká di kas pa kas si a kaso un dia bo topa un mucha di bo skol. Un hóben britániko ku yama Jessica ta bisa: “Prediká na muchanan di skol en realidat ta mas fásil pasobra bo konosé nan kaba.” Lo bo por keda sorprendí di kon kurioso algun di e muchanan di skol ta pa haña sa loke bo ta kere.

Ta bèrdat ku no ta tur lo risibí bo di un manera amabel. Pero Hesus ta duna e konseho práktiko aki: “Ken ku keda sin risibí boso, ni paga tinu na boso palabranan, ora boso sali bai for di e kas ei . . . sagudí e stòf kita for di boso pia.” (Mateo 10:14) Ku otro palabra, bo no mester tuma nan rechaso komo algu personal. Bai trankil djei anto buska un otro hende ku ta mas dispuesto pa skucha. Tardi òf trempan lo bo haña hende di kurason onrado ku tin hamber pa e bèrdat i ku ta dispuesto pa skucha. Lo no ta un satisfakshon pa bo si un di nan ta un kompañero di skol? Si ta asina, lo bo keda kontentu ku bo a vense bo miedu di kompartí bo fe ku e muchanan di bo klas.

[Nota]

[Plachi na página 26]

Tareanan di skol hopi bes ta duna bo oportunidat pa kompartí e bèrdat di Beibel

[Plachi na página 26]

No tene miedu di identifiká bo mes komo un kristian

[Komentario na página 28]

“Ora bo mes kuminsá hasi bo studio personal di Beibel, bo ta kuminsá hasi e bèrdat di bo mes.”​—Sean.