Kon pa Prevení i Kontrolá Preshon Haltu

DJE KORESPONSAL DI SPIÈRTA! NA BRAZIL

MARIAN tabatin miedu! Di ripiente su nanishi a kuminsá sangra sin stòp. E di: “M’a kere ku mi ta bai muri.” Dòkter a bisa Marian ku preshon haltu a pone su nanishi bludu. “Pero mi ta sinti mi bon,” Marian a bisa. “Hopi hende no sa mes ku nan tin preshon haltu pasobra nan no tin e síntomanan,” e dòkter a bis’é.

Kon ta bai ku bo preshon? E manera ku bo ta biba aktualmente por pone ku den futuro bo ta haña preshon haltu? Kiko bo por hasi pa mantené bo preshon di sanger bou di kòntròl? *

Preshon di sanger ta e forsa ku sanger ta ehersé den e adernan. Por midié dor di mara un bant hanchu di rùber rònt di bo brasa i yen’é ku airu. E bant aki ta konektá na un aparato ku ta midi preshon. Bo por mira dos sifra riba e aparato aki. Por ehèmpel: 120/80. E promé sifra nan ta yama preshon di sanger sistóliko pasobra e ta indiká preshon di sanger durante batimentu di kurason, anto e segundo sifra nan ta yama preshon di sanger diastóliko pasobra e ta indiká preshon di sanger ora e kurason ta relahá. Nan ta midi preshon di sanger na milimeter di merkurio, i ora un pashènt su preshon di sanger ta riba 140/90, dòkternan ta konsiderá esei preshon haltu.

Kiko ta pone preshon di sanger subi? Imaginá ku bo ta muha mata. Dor di habri e kranchi duru òf dor di sera e boka di e slan un tiki, bo ta lanta e preshon di awa. Mesun kos ta sosodé ku preshon di sanger: E ta subi ora e volúmen di sanger oumentá òf ora e adernan kaminda e sanger ta pasa bira mas smal. Kon un hende su preshon ta subi? Tin hopi faktor ku ta hunga un ròl.

Faktornan Ku Bo No Por Kontrolá

Investigadónan a deskubrí ku si un hende tin famia ku preshon haltu, e tin mas chèns di haña e malesa. Estadístikanan ta indiká ku ohochinan idéntiko tin mas chèns di haña preshon haltu ku ohochinan di dos eisèl. Un estudio ta referí na e “lokalisashon di e genenan responsabel pa preshon haltu” ku lo por konfirmá ku tin un komponente hereditario responsabel pa preshon haltu di sanger. Tambe nan a deskubrí ku e riesgo di haña preshon di sanger apnormalmente haltu ta bira mas grandi segun ku un hende su edat ta subi i ku e riesgo ta mas grandi serka hende hòmber koló skur.

Faktornan Ku Bo Por Kontrolá

Wak kiko bo ta kome! Salu (sodio) por hisa preshon di algun hende, spesialmente hende diabétiko, esnan ku tin tenshon emoshonal, hende grandi i algun hende koló skur. Demasiado vèt den sanger por pone ku kolesteròl ta pega den e adernan i akumulá ei (aterosklerósis). Esaki ta sera e adernan i  hisa preshon di sanger. Hende ku ta pisa mas ku 30 porshento di loke dòkternan ta rekomendá tin mas chèns di haña preshon haltu. Estudionan ta indiká ku kuminda riku na potasio i kalsio posiblemente ta baha preshon di sanger.

Hende ku ta huma tin mas chèns di haña aterosklerósis, diabétis, atake di kurason i atake selebral. Dor di esei, humamentu i preshon haltu ta un kombinashon peligroso ku ta kousa malesa di ader i kurason. Maske e evidensianan ta kontradiktorio, kafeina (ku bo ta haña den kòfi, te i kola), i strès emoshonal i físiko tambe por hisa preshon. Ademas, sientífikonan sa ku demasiado konsumo di bebida alkohóliko i falta di ehersisio por hisa preshon di sanger.

Estilo di Bida Saludabel

Ta un ekibokashon pa warda te ora bo haña preshon haltu pa bo kuminsá hasi kambio. For di yòn un hende mester ta interesá pa hiba un estilo di bida saludabel. Dor di kuida bo salú for di awor esei lo resultá den un mihó kalidat di bida den futuro.

E Terser Kombenio Brasilero Riba Preshon Haltu a deskribí kua ta e kambionan ku un hende mester hasi den su estilo di bida pa redusí preshon haltu. Nan ta un bon guia pa hende ku tin preshon haltu òf normal.

Ekspertonan ta rekomendá hende gordo pa baha man na kuminda ku tin hopi kaloria, i no tene diet ku ta primintí ku lo bo baha hopi i den un tempu kòrtiku. Tambe nan ta rekomendá pa na mesun momentu bo hasi ehersisio moderá. Anto relashoná ku salu, nan ta sugerí pa no tuma mas ku seis gram pa dia, ku otro palabra, no mas ku un telep. * Den práktika esei ta nifiká baha man na e kantidat di salu ku bo ta usa ora di prepará kuminda, i tambe baha man na kuminda di bleki, belèg (salami, ham, sosèshi i otronan), i kuminda humá. Tambe bo por redusí e kantidat di salu dor di no agregá salu na bo kuminda ora bo ta kome i dor di lesa riba etikèt di kuminda prosesá ta kuantu salu nan a agregá na dje.

E Kombenio Brasilero tambe ta rekomendá pa oumentá e kantidat di potasio pasobra  e por ‘baha preshon haltu.’ Si esei ta e kaso, ta masha saludabel pa kome “kuminda ku tin poko sodio i hopi potasio,” manera bonchi, berdura bèrdè skur, bakoba, milon, wòrtel, roibit, tomati i apelsina. Un otro kos importante ta pa mantené konsumo di alkohòl na un nivel rasonabel. Algun eksperto ta indiká ku hende hòmber ku ta sufri di preshon haltu no mester konsumí mas ku 30 mililiter di alkohòl pa dia; i hende muhé òf esnan ku ta flaku òf ku tin kurpa chikitu no mester tuma mas ku 15 mililiter pa dia. *

E Kombenio Brasilero a konkluí ku ehersisio regular ta baha preshon haltu di sanger i asina redusí e riesgo di desaroyá preshon haltu. Ta benefisioso pa hasi aerobics na un manera moderá. Esakinan por ta kana, kore baiskel òf landa pa 30 te 45 minüt, tres te sinku bes pa siman. * Otro faktornan ku ta kontribuí na un estilo di bida mas saludabel ta: stòp di huma, kontrolá vèt den sanger (kolesteròl i ‘triglyceriden’) i diabétis, kome sufisiente kalsio i magnesia i dominá strès emoshonal i físiko. Tin remedi ku por hisa preshon den sanger, manera remedi pa nanishi será, antiásido ku tin hopi sodio, píldora pa kita apetit i píldora pa migrèn ku tin kafeina aden.

Si bo tin preshon haltu, sin duda bo dòkter ta den e mihó posishon pa duna bo konseho (adaptá na bo sirkunstansia) enkuanto kiko pa kome i bo estilo di bida. Sin embargo, sin importá den ki situashon bo ta, un bida saludabel for di yòn semper ta benefisioso, no solamente pa hende ku preshon haltu pero pa henter famia. Marian (menshoná na prinsipio di e artíkulo aki) mester a hasi kambio den su estilo di bida. Aktualmente e tin ku tuma remedi i ta hiba un bida normal apesar ku e tin problema ku salú. Kiko di abo? Miéntras bo ta warda riba e tempu ora tur hende lo tin un bida saludabel i “ningun habitante lo no bisa: ‘Mi ta malu,’ ” tene bo preshon di sanger bou di kòntròl!​—⁠Isaías 33:⁠24.

[Nota]

[Kuadro na página 14]

KOMBATÍ PRESHON HALTU

1. Loke Por Yuda Kontrolá Preshon Haltu

• Baha peso

• Baha man na salu

• Kome mas kuminda ku ta riku na potasio

• Baha man na bebida alkohóliko

• Hasi ehersisio regularmente

2. Otro Medidanan Ku Por Yuda Kontrolá Bo Preshon di Sanger

• Tuma suplemento di kalsio i magnesia

• Kome kuminda vegetariano riku na fibra

• Tuma terapia ku ta kita strès

3. Medidanan Adishonal

• Stòp di huma

• Kontrolá nivel di kolesteròl

• Kontrolá diabétis

• No usa remedi ku por hisa bo preshon

[Rekonosementu]

Adaptá for di e Terser Kombenio Brasilero Riba Preshon Haltu​—⁠Revista Brasileira de Clínica & Terapêutica.

[Plachinan na página 15]

Ehersisio regular i kuminda saludabel ta yuda prevení i kontrolá preshon haltu