Konseho Práktiko pa Mamanan

Ya ku yunan ta representá generashonnan di futuro, nan mamanan ku ta forma nan, sigur-sigur meresé rèspèt, onor i koperashon. Maske e mundu moderno ta deskribí e ròl di mama di un manera inkonsistente, Beibel ta afirmá ku yunan ta un bendishon for di Dios i por ta un fuente di felisidat pa mayornan. (Salmo 127:​3-5) Sin embargo, e Skritura no ta ignorá loke mamanan ta pasa aden. Beibel ta relatá hopi desafio ku nan ta haña nan kuné.

E desishonnan ku mayornan ta tuma enkuanto kriamentu di yu i di bira mama tin un influensia profundo i permanente riba bida i personalidat di nan yunan. E desishonnan aki por pone ku mayornan mester hasi kambionan grandi den nan estilo di biba, pues nan tin ku tuma e desishonnan aki kuidadosamente. Pa hasi esei nan mester konsiderá preguntanan manera: E mama mester traha pafó di kas? Si ta asina, kuantu ora? Ken ta kuida e muchanan ora e mama ta na trabou? Finalmente, mayornan mester hasi loke nan ta kere ta mihó pa nan yunan i tambe loke ta korekto den Dios su bista.

 Pero mamanan no tin nodi sinti ku nan ta so den nan esfuersonan pa tuma desishonnan sabí. Nan por haña hopi konsuelo di e palabranan na Isaías 40:⁠11, ku ta indiká ku Dios tin un interes spesial den e nesesidatnan di mamanan ku tin beibi chikitu, kende e ‘lo guia ku ternura.’ Dios ta demostrá e interes profundo ei mediante un kantidat di prinsipionan bíbliko ku por duna un mama goso i éksito.

❖ Sea Rasonabel: Kristiannan mester ta konosí komo hende rasonabel. (Filipensenan 4:⁠5, NW) Janet Penley ku ta eskritor i mama alabes, a siña e balor di e prinsipio aki. E ta bisa: “Ora mi a bira mama mi tabatin ekspektativanan masha haltu mes. Mi a purba di bira e mihó mama ku a yega di eksistí. Mi a lesa tur buki i skucha tur ekspertonan ku ta trata tópikonan asina. Pero en bes di sinti ku mi tabata un mama eksitoso i kompetente, finalmente mi a sinti mi inadekuá i yen di strès.” E ta splika ku “si bo presta atenshon na loke otro hende ta spera i kumpli ku nan, i purba di adaptá bo mes na un norma ‘perfekto,’ esei ta kita bo entusiasmo i energia i ta pone bo wòri i sinti bo kulpabel.”

❖ Simplifiká: E revista Newsweek a bisa: “Loke famianan ta kore riesgo di pèrdè den e estilo di bida sumamente drùk aki ta, e esensia i e eksperensianan spesial di infansia i e goso di bida di famia.” Esei ta e motibu pakiko hopi mama ta deseá un bida mas simpel. Kon bo por logra esaki? Na promé lugá, pone prioridat, dunando atenshon na “e kosnan mas importante,” ku ta inkluí e tempu i kuido personal ku bo yunan tin mester. (Filipensenan 1:​10, 11, NW) Di dos, analisá e manera ku bo ta biba. Kisas bo tin ku legumai algun aktividat i kos material ku no ta realmente nesesario.

 Kiko ta mas importante den bo bida? Bo ta hasiendo tur kos pareu, òf bo por posponé algun meta miéntras bo ta sigui tras di otronan? Carolyn, un mama ku tin rekursonan limitá, ta konta kon e ta trata ku su situashon: “Mi ta mantené mi bida simpel i ta baha gastu.” Gloria, un mama di tres yu, ta kòrda: “Nos no tabatin plaka pa kumpra paña di marka, pero mi tabata kose paña pa e muchanan, i mi tabata bisa nan ku esakinan tabata spesial pasobra ningun otro mucha tabatin nan.”

E Palabra di Dios ta bisa ku un hende ku “warda komprendementu [disernimentu, NW] lo haña bondat.” (Proverbionan 19:⁠8) Disernimentu ta nesesario pa evaluá e kantidat di aktividat di rekreo, aparatonan sofistiká, i desaroyonan ku ta bira abrumador tantu pa mamanan komo pa yunan. Judith, un mama di Suráfrika, ta sklama: “Konstantemente nan ta bombardiá nos ku produktonan nobo, mihó teknologia, i mas servisio!” Esaki ta e manera ku Angela, mama di kuater yu na Alemania, ta trata ku e reto ei: “Bo tin ku determiná kiko ta esensial i útil pa bo, i yuda bo yunan pa hasi meskos.”

 ❖ Hasi kambionan kaminda ta posibel: Beibel ta duna e spièrtamentu pa usa “sano huisio i diskreshon.” (Proverbionan 3:​21, Beibel na papiamentu koriente) Si aktualmente bo ta traha pafó di kas, bo famia por biba di e salario di bo esposo so? Pa yuda bo kontestá e pregunta aki, determiná kuantu plaka bo ta bai kas kuné despues ku bo kaba di kita belasting, plaka pa paga krèsh, transpòrt, paña, plaka pa kumpra kuminda di restorant i otro kosnan adishonal. I tambe tene na mente ku si bo pone bo salario huntu ku esun di bo kasá, nan lo kobra bo kasá mas belasting pasobra e ta kai den un skal mas haltu. Lo bo keda sorprendí kon tiki a sobra.

Tin mama ta traha ménos ora òf mas serka di kas, lokual ta nifiká ménos plaka pero mas tempu pa e muchanan. Si bo disidí di stòp di traha i si bo trabou tabata importante pa bo mantené bo balor propio i pa bo por sinti bo satisfecho, pensa kiko lo bo por hasi na kas mes pa mantené e kosnan importante aki.

❖ Buska yudansa: E Palabra di Dios bes tras bes ta mustra ku un “sklamashon pa yudansa” por duna resultado. (Éksodo 2:​23, 24; Salmo 34:15) Ora un mama sklama pa yudansa, su esposo mester hasi kaso di esei i yud’é. Huntu kisas boso por parti e trabounan di kas pa boso por tin tempu pa kumpli ku e metanan ku boso a pone huntu, manera dediká mas tempu na boso yunan. Si ta posibel, un mama por pidi yudansa i animashon di vários hende, manera famianan i amigunan di konfiansa, ku tin e mesun meta i interesnan kuné.

Hopi mama ta haña yudansa práktiko di kompañeronan kreyente di e kongregashon kristian lokal. María ta un mama ku tin tres yu. El a realisá ku “hala serka di e kongregashon” ta un di e maneranan ku “Dios ta demostrá amor i kompashon na nos i ta demonstrá ku e ta preokupá pa nos.”

❖ Pone tempu pa relahá: Asta Hesus, un hòmber perfekto ku tabatin masha hopi resistensia, a invitá su disipelnan pa bai “na un lugá solitario i sosegá un ratu.” (Marko 6:​30-32) E éksito ku lo bo tin komo mama ta dependé di bo abilidat di keda balansá durante tempunan difísil. Ta bèrdat ku bo yunan tin mester di bo, pero pa nan ta importante tambe pa bo ta felis i kontentu. Bo mester rilèks di un forma rasonabel.

Angela, ku nos a menshoná kaba, tin un manera pa e logra haña tempu pa rilèks: “Mi ta apartá tempu mainta ora ta ketu. Mi ta tuma por lo ménos mei ora pa mi mes. Anto ami ku mi esposo ta tuma un òf dos anochi pa siman. E ora ei e muchanan sa ku nan tin ku bai un otro kaminda den kas i hasi algu einan sin hasi bochincha. Di e manera ei nos por tin un ora pa nos mes.”

❖ Duna prioridat na bo spiritualidat: Ta notabel ku e desafionan di un mama ta bira mas grandi ora nan lubidá kiko ta nan propósito i nan no tin prioridat. Famianan kristian ta sinti nan felis ora nan traha huntu pa pone Dios su boluntat promé den nan bida. Apòstel Pablo a skirbi: “Santidat [deboshon na Dios, NW] ta probechoso pa tur kos, komo ku e ta kontené promesa pa e bida presente i pa esun ku ta bin.” (1 Timoteo 4:⁠8) Un famia ku ta deboto na Dios i ta sigui Dios su guia bíbliko ta haña felisidat. Asta si ta un miembro so di e famia ta apliká prinsipionan bíbliko, kos ta bai mas mihó ku si ningun di nan ta aplik’é.

Adele, un mama kristian ku ta traha henter dia, a mira e benefisio di enfoká riba kosnan spiritual. E ta bisa: “Nos tin un kantidat grandi di guia i informashon den publikashonnan basá riba Beibel ku ta siña nos kiko nos yunan ta pasando aden i kon nos por yuda nan. Ora ku bo mira bo yunan ta reakshoná riba loke bo ta duna nan spiritualmente bo ta sinti ku bo esfuerso a bale la pena. Ora bo mira un poko progreso den nan komportashon i den nan manera di rasoná, bo ta realisá ku nan a komprendé e informashon i a aseptá bo guia i ku bo tin éksito.” *

Sí, ta posibel pa un mama logra éksito den e kareda yen di opstákulo ei. Dios mes ta duna nan e siguransa i konsuelo di ku e esfuerso diligente i sakrifisio propio di mamanan ku ta konfia den dje lo no ta pòrnada. Mamanan ku kultivá un relashon personal kuné por haña alivio i konsuelo for di su promesa ku lo e “duna forsa na esun kansá.”​—⁠Isaías 40:⁠29.

[Nota]

[Kuadro na página 10]

Influensia di un Mama

Komo mama, kisas tin bes bo ta puntra bo mes ta ki impakto lo bo ta hasiendo riba e bida di bo yu. Tin bes e influensia di pareu, maestro, entretenimentu, weganan di vidio i músika por parse di ta mas grandi ku esun di bo.

Konsiderá e ehèmpel di Yokebet, mama di Moises. E tabata biba den un époka sumamente difísil i no tabatin mashá di bisa riba loke lo sosodé ku su yu. Sin embargo, el a usa e oportunidatnan ku e tabatin pa influensiá su formashon. Promé, el a demostrá fe yen di kurashi dor di no pèrmití nan mata Moises. Dios a rekompensá su fe no solamente dor di skapa e beibi sino tambe dor di perkurá pa kos bai di tal manera ku Yokebet por a sirbi komo su yaya, i mama.​—⁠Éksodo 1:​15, 16; 2:​1-10.

Ta bisto ku Yokebet tabatin influensia riba e personalidat di su yu. Apesar ku Moises tabatin konekshon real ku Egipto, ora el a bira adulto el a sinti su mes atraí na e hebreonan i na nan Dios. Esei ta duna prueba ku su mayornan tabatin influensia riba dje durante su añanan di formashon.​—⁠Hebreonan 11:​24-26.

Komo mama probablemente bo tin mas oportunidat ku Yokebet di influensiá bo yu. Bo ta hasiendo bon uso di e tiki añanan di infansia di bo yu pa dun’é instrukshon duradero di Dios? Òf bo ta laga e kultura aktual ehersé un impakto dominante riba e desaroyo di bo yu?

[Plachinan na página 10]

Enbolbé otronan den e trabounan di kas, apartá tempu pa bo mes i duna prioridat na bo spiritualidat