E Punto di Bista Bíbliko

Kristiannan Mester Spera Protekshon Divino?

Hopi bes Beibel ta referí na Dios su abilidat di protehá su adoradónan di daño. Rei David a bisa: “Reskatá mi for di hende malbado, o SEÑOR; protehá mi kontra hende violento.” (Salmo 140:⁠1) Den nos dia hopi adoradó di Dios ku a haña nan ku violensia, krímen, desaster natural a skapa na wowo di angua. Tin hende ta puntra nan mes si ta Dios a protehá nan di un manera milagroso na e okashonnan ei, spesialmente dor ku tin otro okashonnan ora hende ku ta teme Dios no a skapa sino a pasa den tragedianan grandi, òf asta a muri di un manera violento.

YEHOVA DIOS ta protehá algun hende for di daño i otronan nò? Nos mester spera di skapa milagrosamente for di violensia i desaster awendia?

Protekshon Milagroso den Relatonan di Beibel

Beibel tin vários relato den kua Dios milagrosamente a intervení na fabor di su adoradónan. (Isaías 38:​1-8; Echonan 12:​1-11; 16:​25, 26) Tambe e Skritura ta relatá kon na otro okashonnan Yehova no a protehá su sirbidónan for di kalamidat. (1 Reinan 21:​1-16; Echonan 12:​1, 2; Hebreonan 11:​35-38) Esei ta mustra klaramente anto ku Yehova por disidí di proveé protekshon pa un sierto motibu òf propósito ki ora ku e skohe pa hasi esei. Pues ora kristiannan individual no wòrdu librá di prueba, nan no mester konkluí ku Dios a bandoná nan. Nos tin ku aseptá e realidat ku kosnan malu lo sosodé, asta ku sirbidónan fiel di Yehova. Dikon esei ta e kaso?

Dikon Kosnan Malu Ta Sosodé ku Sirbidónan Fiel di Dios

Un motibu ta ku nos tur a heredá piká i imperfekshon di Adam ku Eva. Es desir nos por spera di haña nos ku doló, sufrimentu i morto.  (Romanonan 5:12; 6:23) Un otro motibu ta, ku nos ta biba den e último dianan. Beibel ta deskribí ku hende di nos dia lo ta “sin amor, irekonsiliabel, ku mala lenga, sin dominio propio, grosero, odiadó di loke ta bon.” (2 Timoteo 3:​1-5) Prueba di esaki ta e kantidat di violashon, sekuestro, asesinato i otro krímennan brutal ku ta tuma lugá.

Hopi sirbidó fiel di Dios ta biba i traha meimei di hende violento i tin bes esnan violento ta mek riba e sirbidónan fiel aki. Kisas nos por haña nos mes den un situashon den kua nos bida ta na peliger djis pasobra nos tabata na un sierto lugá na un mal momentu. Ademas, nos ta eksperensiá e realidat ku Sálomon a papia di dje ora el a bisa: “Tempu i suseso imprevisto ta kai riba nan tur.”​—⁠Eklesiástes 9:⁠11, NW.

I tambe, apòstel Pablo a bisa ku hende lo persiguí kristiannan pasobra nan ta adorá Dios. El a bisa: “Di bèrdat, tur hende ku ta deseá di hiba un bida santu den Kristu Hesus lo wòrdu persiguí.” (2 Timoteo 3:12) Den e último añanan esaki a resultá di ta e kaso den vários pais.

Pues, hende ku ta teme Dios no ta liber di e efektonan di violensia, krímen, desaster natural òf morto aksidental. Satanas a purba di usa e argumento ku Yehova ta pone un trankera rònt di Su pueblo pa nada malu no pasa nan. (Job 1:​9, 10) Esei no ta e kaso. Sin embargo, nos por ta sigur ku Yehova ta protehá su pueblo asta ora e no salba nan di un manera milagroso di un situashon.

E Manera Ku Yehova Ta Protehá Su Pueblo Awendia

Mediante su Palabra, Yehova ta proveé guia divino ku ta protehá su pueblo. Spiritualidat i konosementu di Beibel por duna nos sano huisio, ku na su turno lo por yuda nos tuma desishonnan sabí i evitá di kometé erornan innesesario. (Salmo 38:4; Proverbionan 3:21; 22:⁠3) Por ehèmpel, kristiannan a evitá hopi kalamidat dor ku nan a sigui Beibel su konseho enkuanto moralidat seksual, golosidat, rabia i violensia. Tambe, dor ku nos no tin amistat íntimo ku mal hende, ta ménos probabel ku nos lo ta kaminda kalamidat lo por tuma lugá, esta na un sierto lugá na un mal momentu. (Salmo 26:​4, 5; Proverbionan 4:14) Esnan ku ta apliká prinsipio bíbliko ta biba mihó, loke hopi bes ta resultá den un mihó salú mental i físiko.

Ta un gran konsuelo pa sa ku maske Dios ta pèrmití kos malu sosodé, lo e duna su adoradónan e forsa ku nan tin mester pa nan por soport’é. Apòstel Pablo ta duna nos e siguransa: “Dios ta fiel, kende lo no pèrmití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.” (1 Korintionan 10:13) Tambe Beibel ta primintí “poder mas ayá di loke ta normal” pa yuda nos wanta kalamidat.​—⁠2 Korintionan 4:​7, NW.

Dios Ta Aktua Segun Su Propio Boluntat

Kristiannan mester spera ku Dios lo reskatá nan milagrosamente di tur desaster ku tuma lugá? Beibel no ta apoyá e pensamentu ei.

Klaro ku Yehova Dios por disidí di intervení direktamente na fabor di kualkier sirbidó di dje. I si un hende ta kere ku el a skapa di daño pa motibu di intervenshon divino, ningun hende no mester kritik’é. Pero ora Yehova disidí pa no intervení, esaki no mester wòrdu interpretá komo un indikashon di su desaprobashon.

Nos por tin e konfiansa ku maske ki prueba òf situashon nos enfrentá, Yehova lo duna su sirbidónan fiel protekshon divino. E ta hasi esei dor di eliminá e situashon, òf dor di duna nos e forsa pa nos wanta. Anto si nos muri, dor di resusitá nos pa biba pa semper den su mundu nobo.​—⁠Salmo 37:​10, 11, 29; Huan 5:​28, 29.