Hóbennan Sa Puntra . . .

Dikon Ta Asina Difísil pa Biba ku Mi Kompañero di Kuarto?

“Mi ta un hende ku gusta mashá pa mi kosnan ta na òrdu i limpi. Pero ora mi yega kas, mi kompañero di kuarto ta bentá riba flur ta wak televishon; korant, papel i pòpkòrn bentá tur kaminda. Tur biaha ora mi ta bai kas, mi ta imaginá mi kaba kiko ta warda mi, i mi ta bisa mi mes: ‘Mi no tin gana di drenta den e kuarto ei.’”​—David.

“Mi kompañera di kuarto tabata un mucha muhé masha malkriá. Mi ta pensa ku el a kere ku ta un kriá e tabatin ta biba huntu ku nos. I semper e tabata kier pa kos bai na su manera.”​—Renee. *

“SIÑA tolerá e pekuliaridatnan di un hende deskonosí por siña [nos] fleksibilidat i e arte di tuma i duna,” segun un artíkulo den U.S.News & World Report. “Pero hopi bes e proseso ei ta doloroso.” Hende ku a yega di kompartí kuarto ku un kompañero kisas ta di akuerdo ku esei.

Hopi studiante di universidat ta kompartí kuarto ku un kompañero pa baha e gastunan haltu di skol. Otro hóbennan ta hasié pasobra nan kier ta independiente di nan mayornan. Serka hóbennan kristian, hopi a skohe un kompañero di kuarto pa nan por a dediká nan mes na interesnan spiritual. (Mateo 6:⁠33) Nan ta haña ku nan por sirbi mas lihé komo predikadó di tempu kompleto si nan tin un hende pa yuda nan karga e gastunan di kosto di bida. Tin biaha tambe un kompañero di kuarto ta parti di bida komo misionero òf di sirbishi di Bètel na e vários sukursalnan di Testigunan di Yehova. *

Spièrta! a papia ku vários mucha hòmber i mucha muhé ku tin un kompañero òf kompañera di kuarto. Nan tur ta di akuerdo ku un kompañero di kuarto por ta mas ku un hende ku ta yuda paga e kuarto, e por ta un kompaño, un hende pa papia kuné i pa hasi kos huntu kuné. Segun Lynn: “Nos tabata keda lantá te lat i papia tokante kos ku mucha muhé gusta papia  di dje òf djis wak pelíkula.” I Renee ta bisa: “Un kompañera di kuarto por animá bo. Tin biaha ora bo ta traha pa gana bo pan i ta purba paga tur bo resibunan i ta purba prediká, ta dushi pa bo tin un kompañera ku ta animá bo.”

No opstante, biba ku un kompañero di kuarto⁠—⁠foral unu ku na prinsipio kasi bo no konosé⁠—⁠por ta un gran desafio. U.S.News & World Report a komentá riba e situashon na universidatnan: “Apesar di e gran esfuerso ku hopi skol ta hasi pa asigná kompañeronan di kuarto ku ta bai ku otro, tin hopi kombinashon ku ta resultá insatisfaktorio.” Sí, tabatin kasonan kaminda konflikto entre kompañeronan di kuarto a eskalá den violensia! P’esei a lanta hopi Web site riba Internèt ku ta pèrmití studiantenan deshogá nan frustrashon (aparentemente konstante) relashoná ku nan kompañero di kuarto. Dikon hopi bes ta resultá asina difísil pa biba ku un kompañero di kuarto?

Biba ku un Hende Deskonosí

Segun Mark: “Bai biba den un kuarto ku un hende deskonosí ta un eksperensia un tiki interesante. Bo no sa realmente ki sorto di hende lo e ta.” De echo, djis pensa ku bo ta bai biba ku un hende ku ken kisas bo tin masha tiki òf nada en komun por laga bo sinti masha inkómodo. Ta sierto ku kristiannan lo mester tin hopi kos en komun i hopi kos pa papia over di dje. Asina mes, David ta atmití: “Mi tabatin masha miedu ku mi mester a biba ku un kompañero di kuarto.”

Sin embargo, a resultá ku David su kompañero di kuarto a bini di mesun stat kuné. Pero no ta tur kombinashon ta duna bon resultado. Mark ta konta: “Mi promé kompañero di kuarto no tabata gusta papia. Ora bo ta kompartí un kuarto ku un hende, bo tin ku papia. Pero e no kier a papia. E kos ei a ègt kuminsá iritá mi.”

Antesedente distinto for di otro por kousa otro tenshon. Segun Lynn: “Ora bo bai biba pa promé bes riba bo mes, bo kier hasi kosnan na bo manera. Pero pronto bo ta realisá ku bo tin ku tene kuenta ku otro hende.” En bèrdat ta asina ku ora bo sali for di e protekshon di bo kas di famia, por ta un shòk grandi ora bo deskubrí kon otro hende por tin puntonan di bista kompletamente distinto for di bo.

Otro Antesedente, Otro Manera di Hasi Kosnan

Kon kos ta bai ta dependé hopi di e entrenamentu ku un persona ta haña òf ta keda sin haña di su mayornan. (Proverbionan 22:⁠6) Segun e hóben Fernando: “Ami ta un persona ku gusta kos na òrdu i limpi, i mi kompañero tabata masha slòns. Tuma por ehèmpel e kashi di paña: E ta gusta benta kos tur kaminda. Ami gusta kologá mi pañanan.” Tin biaha e diferensia den norma ta hopi ekstremo.

Renee ta kòrda: “Mi tabatin un kompañera kende su kuarto literalmente a parse un chiké di porko! Tambe mi tabatin kompañeranan di kuarto ku no tabata limpia mesa despues di kome òf ku tabata laga nan tayónan den e baki pa laba tayó pa dos òf tres dia.” Sí, pa loke ta trata trabou di kas, tin algun kompañero di kuarto ta presis manera Proverbionan 26:14 ta bisa: “Manera porta ta drai riba su skarnirnan, asina e floho ta drai riba su kama.”

Di otro banda, si bo ta kompartí kamber ku un persona ku ta demasiado ordená, tampoko no ta dushi. Un mucha muhé ku yama Lee ta bisa di su kompañera di kuarto: “E tabata haña ku mester limpia despues di kada ora. Di ningun manera mi no ta un hende porko, pero tin biaha mi por laga kos riba mi kama, por ehèmpel buki. I e tabata haña ku e tin ku kontrolá e situashon.”

Tambe kompañeronan di kuarto por tin nan propio idea tokante kiko ta higiena personal. Mark ta splika: “Mi kompañero di kuarto ta lanta na último momentu, kore bai n’e labamano, sprengu poko awa riba su kabei, i sali bai.”

Diferensia den antesedente i personalidat por influensiá loke nos ta skohe komo dibertishon i rekreo. Mark ta bisa ku e ku su kompañero di kuarto “no ta gusta e mesun tipo di  músika.” Sin embargo, ora ámbos kompañero ta respetá otro, e diferensianan ei por ta benefisioso i por asta yuda nan tur dos amplia nan gustu. Pero mayoria biaha e diferensianan aki ta resultá den konflikto. Segun Fernando: “Mi gusta músika spañó, pero mi kompañero semper ta kritik’é.”

Telefòn​—Un Problema

Uso di telefòn por ta un dje kousanan mas grandi di konflikto. Mark ta bisa: “Mi gusta drumi trempan. Pero mi kompañero ta keda lantá te lat papiando na telefòn. Despues di poko tempu esei por kuminsá iritá bo.” Lynn ta bisa meskos: “Tin biaha mi kompañera su amiganan tabata bèl e tres or òf kuat’or di mardugá. Si e no ta na kas, ami tabatin ku lanta pa kontestá e telefòn.” Kon nan a solushoná esei? “Nos a sòru pa nos kada un tin nos mes telefòn.”

Sin embargo, no ta tur hóben por afòrt nan mes telefòn, i hopi di nan ta haña nan obligá na kompartí e telefòn. Esaki por hiba na momentonan hopi tenso. Renee ta kòrda: “Un di mi kompañeranan di kuarto tabatin un frei, i hopi bes e tabata papia na telefòn pa oranan largu. Un luna el a papia mas ku 160 florin na telefòn anto e tabata kier pa nos paga parti di e resibu ya ku nos a palabrá di partié entre nos.”

Djis haña chèns ku e telefòn por ta un otro problema. Lee ta kòrda: “Mi tabata kompartí kuarto ku un persona mas grandi ku mi. I nos tabatin un telefòn so. Mi tabata papia tur ora na telefòn pasobra mi tabatin hopi amiga. Nunka e no a bisa nada. Ami a pensa ku si e kier a usa e telefòn e ta laga mi sa. Awor mi ta realisá ku loke mi a hasi a mustra un falta di konsiderashon.”

Falta di Privasidat

“Tur hende mester di poko privasidat,” segun David. “Tin biaha gewoon mi tin ku rilèks i no hasi apsolutamente nada.” Sin embargo, por ta difísil pa haña privasidat ora bo ta kompartí bo kamber ku un persona. Mark tambe ta bisa: “Mi tin gana di ta mi so de bes en kuando. P’esei e kos di mas duru pa mi tabata e falta di privasidat. Ami ku mi kompañero di kuarto tin mesun orario. Pues ta difísil pa haña privasidat.”

Asta Hesukristu de bes en kuando tabatin mester di tempu pa ta su so. (Mateo 14:13) P’esei por ta hopi frustrante ora ku e presensia di bo kompañero di kuarto ta stroba bo di lesa, studia òf meditá. Segun Mark: “Ta duru pa studia pasobra semper tin algu ta pasando den e kamber. El a invitá amigunan, e ta na telefòn, òf e ta wak televishon òf skucha radio.”

Pero tòg pa difísil ku por ta pa soportá un kompañero di kuarto, míles di hóben a logra esei ku éksito. Otro artíkulonan den e seri aki lo trata algun manera práktiko pa benefisiá dje situashon ora bo ta kompartí kuarto ku un persona.

[Nota]

[Plachi na página 16]

Por ta un desafio ora boso no tin mesun gustu den músika

[Plachi na página 18]

Falta di konsiderashon por krea tenshon