E Punto di Bista Bíbliko

Dios Ta Aprobá Guera?

MASHA hopi bes gobernantenan, generalnan i asta pastornan a deklará òf apoyá guera den nòmber di Dios! Na aña 1095, ku apoyo i sosten di Papa Urbano II, e Promé Krusada a sali bai pa rekonkistá e “Stat Santu” Yerúsalèm pa kristiandat. Pero promé ku nan a logra nan meta, un tropa di esnan ku a partisipá den e Krusada a ser likidá dor di e turkonan, kende nan selo pa Ala tabata mes fuerte ku e fe ku e esnan ku a partisipá den e Krusada tabatin den e Trinidat.

Na ougùstùs 1914, un sòldá aleman a skirbi for di su kampamentu durante Promé Guera Mundial: “Si ta eksistí hustisia i ta Dios ta esun ku ta dirigí susesonan den historia humano⁠—⁠i mi ta apsolutamente sigur ku asina ta⁠—⁠anto e viktoria mester ta di nos.” E mesun luna ei, Emperador Nikolas II a manda e ehérsitonan di Rusia kontra Alemania, i a proklamá: “Mi ta manda saludo di mi alma pa mi tropanan balente i pa mi aliadonan ilustre. Dios ta ku nos!”

Pues ku tal animashon, miónes di sòldá a bai bringa den guera, plenamente konvensí ku Dios tabata na nan banda. Hopi hende ta kere ku Dios ta pèrmití tal bringamentu komo e preis pa alkansá libertat, i pa apoyá esei nan ta mustra riba e gueranan menshoná den e Skritura Hebreo (generalmente yamá Tèstamènt Bieu). Nan interpretashon di e Palabra di Dios ta korekto?

E Gueranan di Antiguo Israel

Yehova Dios a dekretá ku Israel mester a bringa guera pa saka e kananeonan inmoral for di e Tera Primintí. (Levítiko 18:​1, 24-28; Deuteronomio 20:​16-18) Meskos ku Dios a kastigá malechornan den tempu di Noe ku un diluvio i Sódoma i Gomora ku kandela, asina el a usa e nashon di Israel komo su medio pa trese kastigu di morto.​—⁠Génesis 6:​12, 17; 19:​13, 24, 25.

Segun Beibel, otro batayanan ku Israel a bringa bou di Dios su guia tabata por lo general pa defendé nan mes kontra menasa di enemigu ku nan no a provoká. Ora e nashon tabata obedesé Yehova, e gueranan ku nan a bringa a terminá na nan fabor. (Éksodo 34:24; 2 Samuel 5:​17-25) Pero ora Israel a tribi bai guera kontrario na konseho divino esei generalmente tabata resultá den desaster. Tuma e kaso di Rei Yeróboam. El a ignorá un atvertensia divino direkto i a manda su enorme ehérsito bai bringa un guera sivil kontra Huda. Ora ku finalmente e violensia a terminá, 500.000 sòldá di Yeróboam a muri. (2 Krónikanan 13:​12-18) Asta fiel Rei Hosías un biaha a bai un bataya ku no tabata di dje. E desishon deskabeyá aki a kost’é su bida.​—⁠2 Krónikanan 35:​20-24.

Kiko e susesonan aki ta mustra? Ku den antiguo Israel, ta Dios tabata disidí si mester a bringa un guera. (Deuteronomio 32:​35, 43) El a laga su  pueblo bringa pa propósitonan spesífiko. Sin embargo, e propósitonan aki a kumpli hopi tempu pasá. Ademas, Yehova a profetisá ku esnan ku ta sirbié “den e último dianan” lo “bati nan spadanan traha plug ku nan” i “nunka mas nan lo tren pa guera.” (Isaías 2:​2-4) Ta bisto anto ku e gueranan menshoná den Beibel no ta hustifiká e konfliktonan den nos tempu, ya ku ningun di nan ta ser bringá bou di Dios su guia ni riba su òrdu.

E Efekto di e Siñansa di Kristu

Ora Hesus tabata riba tera el a demostrá kon pa remplasá odio ku amor inegoista, bisando: “Stima otro meskos ku ami a stima boso.” (Huan 15:12) Tambe el a bisa: “Bendishoná ta esnan ku ta hasi pas.” (Mateo 5:⁠9) E palabra griego pa “hasi pas” ta nifiká mas ku djis un estado trankil. En realidat e ta enserá kultivá pas, trahando aktivamente pa promové bon boluntat.

Ora nan a bin arestá Hesus, apòstel Pedro a purba defend’é ku un arma mortal. Pero e Yu di Dios a skuale, bisando: “Pone bo spada bèk na su lugá; pasobra tur esnan ku saka spada lo peresé pa medio di spada.” (Mateo 26:52) Kon kristiannan di promé siglo a apliká e palabranan aki? Tuma nota di e siguiente sitanan.

“Un repaso kuidadoso di tur e informashon disponibel [ta mustra] ku te ku e tempu di Marko Ourelio [aña 121-⁠180 Era Komun], ningun kristian a bira sòldá; i ningun sòldá, despues di bira kristian, a keda den servisio militar.”​—⁠The Rise of Christianity.

“E komportashon di e [promé] kristiannan tabata hopi distinto for di e romanonan. . . . Siendo ku Kristu a prediká pas, nan a nenga di bira sòldá.”​—⁠Our World Through the Ages.

E romanonan a mata hopi disipel di Kristu komo ku nan a nenga di sirbi den e ehérsito di emperador. Dikon kristiannan a mantené un posishon asina impopular? Pasobra Hesus a siña nan hasi pas.

Guera Moderno

Imaginá bo ki situashon teribel lo tin si e siguidónan di Kristu mester a bringa den ehérsitonan enemigu di otro, purbando di mata otro. Un situashon asina lo ta kontrario na prinsipionan kristian. En realidat, esnan ku ta obedesé e Dios di Beibel lo no kousa daño na ningun hende, ni sikiera na nan enemigunan. *​—⁠Mateo 5:​43-45.

Ta klaro anto ku gueranan literal ku ta tuma lugá entre hende den nos tempu no tin bendishon di Dios. Kristiannan berdadero, siendo hende ku ta hasi pas, ta boga pa e pas ku lo bai tin rònt mundu bou di e Reino di Dios.

[Nota]

[Plachi na página 15]

General Francisco Franco di Spaña ta ‘pose’ ku vários pastor katóliko

[Rekonosementu]

U.S. National Archives photo

[Plachi na página 15]

Sòldánan ta ser bendishoná pa pastornan di religion griego òrtodòks promé ku nan sali pa Kosovo, 11 di yüni 1999

[Rekonosementu]

AP Photo/Giorgos Nissiotis