For di Nos Lektornan
For di Nos Lektornan
Tiner Deprimí Mi a bira masha kontentu ora mi a haña e seri di artíkulo di portada di Spièrta!, “Yudansa pa Tinernan Deprimí”! (8 di sèptèmber 2001) Mi tin vários aña ta lucha ku e malesa aki. Danki pa a duna mi un man den un temporada difísil.
L. D., Fransia
Mi ta un verplegster di mucha. Hopi hende ta balotá kon grave i ekstenso depreshon ta, pero boso nò. Mi a bestèl shen ehemplar di e revista aki. Mi tin intenshon di entregá nan na tur dòkter di mucha i persona ku ta traha den kuido di salú mental den e área ku mi ta biba.
B. P., Merka
Mi tin vários famia ku nan a diagnostiká ku depreshon òf trastorno bipolar. Rekonosiendo e kosnan aki komo malesa i no komo un debilidat por yuda mashá pa restorá e dignidat ku hopi hende a pèrdè. E sugerensianan ku boso a duna lo yuda nos tur mustra mas komprenshon i duna mas apoyo.
C. M., Kánada
Asina ku mi a haña e revista aki den mi man, mi a kuminsá les’é. Mi a yora di alegria p’e echo ku boso ta apresiá hóbennan asina tantu i a dediká 12 página na e tema. Masha, masha danki!
M. M., Oustria
E artíkulo aki a ègt yuda mi kalma mi mes i baha mi kurason. Tambe el a hasi mi konsiente ku no ta mi so tin e malesa aki. Mi ta resa pidi Yehova ku e por duna konsuelo i yudansa na tur hende ku ta sufri di depreshon.
Y. T., Hapon
Mi ta bai tene un stòk di e revista aki na man tur momento. E ta presis loke tinernan tin mester, i mi ta kere ku lo e yuda hopi di nan i nan mayornan enfrentá loke boso a deskribí debidamente komo un malesa. Probablemente lo e salba bida.
R. F., Merka
Mi a haña un konsuelo ora mi a lesa ku e doló emoshonal aki no ta bini di un òf otro defisiensia spiritual. Un peso a kita for di mi kurason i mi a yora ora mi a lesa ku Yehova “ta serka di e hende di kurason kibrá.”—Salmo 34:18.
A. I., Hapon
Mi tin 16 aña, i pa años mi ta sufri di atakenan di depreshon. E revista aki ta nèt loke mi mester! E artíkulonan a duna mi e konseho ku mi tabatin mester.
L. B., Oustralia
Mi tabata un tiner deprimí, i nunka mi no a konta mi mayornan ni ningun otro hende ku mi kier a mata mi kurpa. Esaki tabata un eror grave. Ta importante pa buska yudansa ora bo ta deprimí. Danki pa mustra boso interes i preokupashon pa hóbennan.
S.G.C., Merka
Mi tabatin un tarea di skol pa skirbi un òpstèl tokante un problema sosial di mi gustu ku ta apropiado pa tinernan. Mi a usa e seri di e portada di 8 di sèptèmber 2001, “Yudansa pa Tinernan Deprimí.” Tin hopi tiner ku depreshon kaminda mi ta biba. Mi a yega di usa Spièrta! den pasado pa otro tareanan di skol, i a risibí masha bon punto!
S. H., Oustralia
Tin biaha mi ta sinti mi hopi ‘down’ i mi ta kuminsá pensa ku mi no ta bal nada. Mi tabatin bèrgwensa di papia ku mi mayornan kristian òf ku e ansianonan di kongregashon tokante mi sintimentunan. Sin embargo, ora mi a lesa e frase ku ta bisa: “No ta bo falta ku bo tin e malesa aki,” mi a sinti un gran alivio! I mi a bolbe realisá ku mi no ta e úniko.
H. T., Hapon