Konsuelo pa Esnan Ku Ta Yora

E ATAKE terorista ku a tuma lugá dia 11 di sèptèmber 2001 na New York City i Washington, D.C., a shòk hende na tur parti di mundu. Riba un solo dia, míles di hende a muri, entre nan sientos di pagadó di kandela, polis i paramédiko balente.

For di dia di e suseso ei, Testigunan di Yehova a hasi un esfuerso uní pa konsolá esnan ku a pèrdè sernan kerí den e tragedia. Nan a hasi esaki afin di “kura hende di kurason kibrá” i “pa konsolá tur esnan ku ta yora.”​—⁠Isaías 61:⁠1, 2.

Atraves di añanan, Testigunan di Yehova a ripará ku hende ku pèrdè un ser kerí hopi bes ta pensa riba e preguntanan ku ta sigui aki bou. Beibel tin kontesta pa nan. Pakiko bo no ta buska e tekstonan bíbliko menshoná aki bou den bo mes Beibel?

Morto di un persona ta predestiná?

Na Eklesiástes 9:⁠11, Beibel ta deklará ku “tempu i suerte” ta alkansá tur hende. Si ta bèrdat ku morto ta predestiná, dikon Beibel ta animá nos pa tuma medidanan di prekoushon anto?​—⁠Por ehèmpel, wak Deuteronomio 22:⁠8.

Dikon nos ta muri?

Dios a pone e promé pareha humano, Adam ku Eva, den un paradeis riba tera. Si nan a keda obediente, nan lo no a muri. Solamente si hende a desobedesé Dios nan lo a muri. (Génesis 1:28; 2:​15-17) Lamentablemente, Adam ku Eva a desobedesé nan Kreador. Komo resultado, nan a haña e kastigu: morto. Siendo ku tur hende a bini for di Adam ku Eva, nan tur a heredá piká i morto. Beibel ta splika: “Dor di ún hende [Adam] piká a drenta den mundu, i morto dor di piká, i asina morto a pasa pa tur hende.”​—⁠Romanonan 5:⁠12.

Den ki kondishon e mortonan ta?

Despues ku Adam a rebeldiá, Dios a bisa: “[Lo] bo bolbe na tera, pasobra for di dje bo a wòrdu tumá; pasobra stòf bo ta, i na stòf lo bo bolbe.” (Génesis 3:19) Pues, morto ta un kondishon totalmente inkonsiente, mihó bisá, di ineksistensia. Beibel ta deklará: “E bibunan sa ku nan lo muri, ma e mortonan no sa nada.” (Eklesiástes 9:⁠5) Tambe Beibel ta bisa ku ora un persona muri, “e ta bolbe na tera; e mes dia ei su pensamentunan ta peresé.”​—⁠Salmo 146:​3, 4.

Nos no tin un alma ku ta keda na bida ora nos muri?

Beibel ta siña bon kla ku bo alma ta simplemente bo mes, no un òf otro entidat apstrakto ku lo keda na bida ora bo muri. (Génesis 2:⁠7, NW ; Proverbionan 2:10; Yeremías 2:⁠34, NW ) Siendo ku esei ta e kaso, nos por bisa ku ora un persona muri, un alma a muri. Beibel ta bisa bon kla: “E alma [es desir, e persona] ku peka lo muri.”​—⁠Ezekiel 18:⁠4.

Ki speransa tin pa esnan ku a muri?

Beibel ta revelá ku Dios su propósito ta pa lanta e mortonan mediante un resurekshon pa nan biba riba e tera transformá den un paradeis, kaminda lo no tin malesa ni morto mas. Hesus a bisa: “E ora lo yega den kual tur ku ta den graf lo tende su bos, i lo sali.”​—⁠Huan 5:​28, 29; Revelashon 21:​1-4.

Ora Hesus a papia di su amigu Lázaro ku a kaba di muri, el a kompará morto ku soño. (Huan 11:​11-13) Ademas, despues ku Hesus a resusit’é, Lázaro no a bisa niun ora so ku el a bai na un lugá di tormento ni na un lugá di felisidat durante e periodo breve di su morto. (Huan 11:​37-44) Esaki ta lógiko, pasobra e mortonan ta inkonsiente. Nan no ta sufriendo, sino ta wardando riba e “ora” ku lo lanta nan. Mas importante ainda, e echo ku Hesus a resusitá Lázaro ta mustra ku e mortonan por biba atrobe. Sí, ku e milager aki Hesus a demostrá na un eskala chikitu kiko lo tuma lugá riba tera bou di gobernashon di e Reino di Dios. (Echonan 24:15) Ki un konsuelo esei ta pa esnan ku tin ser kerí ku a muri durante e tempu turbulento aki!