Pas Mundial No Ta Djis un Soño!

SI Alfred Nobel por a wak bèk riba siglo 20, lo el a sintié optimista ku e perspektivanan pa pas? Un kos ta sigur, lo el a keda kontentu pa sa ku hopi hende a hasi esfuerso sinsero pa kaba ku guera. Sin embargo, lo e tabatin ku konfrontá un realidat amargo. Profesor Hugh Thomas ta resumié bon: “Ounke en general siglo 20 tabata konosí pa mehoransanan sosial i mayor interes gubernamental pa e bida di hende pober, su rasgonan mas prominente tabata mitrayùr, tanki di guera, [e avion di tira bòm] B-52, e bòm nuklear i por último, e misil. Su rasgo mas destaká tabata gueranan mas sangriento i destruktivo ku di kualkier otro era.” Thomas ta agregá ku “p’esei, ta un asuntu di opinion personal si di bèrdat nos por karakterisá e era aki komo progresivo òf nò.”

E perspektivanan pa pas mundial ta mas mihó awor ku nos a drenta siglo 21? Niun tiki! Refiriendo na e atakenan terorista ku a tuma lugá dia 11 di sèptèmber 2001 na New York City i na Washington, D.C., e revista Newsweek a deklará: “Den un mundu kaminda hende por kombertí [Boeingnan] 767 den misilnan dirigí, nada no ta parse imposibel ni apsurdo⁠—⁠òf pió ainda, inevitabel.”

Tin hende ta bisa ku pa pas mundial bira un realidat, dos kos tin ku tuma lugá: Na promé lugá, mester bini kambionan radikal den hende su punto di bista i komportashon; na di dos lugá, tur nashon tin ku uni bou di un solo gobièrnu. Beibel ta predisí ku un dia lo logra pas, pero no mediante esfuerso humano. Salmo 46:9 ta bisa di e Kreador, Yehova Dios: “E ta hasi gueranan stòp te na e fin di tera.” Kon Dios lo logra esaki? Mediante su Reino, pa kua hopi hende sinsero a resa pidi bes tras bes. E Reino ei no ta un kondishon di kurason ku ta difísil pa hende definí, sino mas bien un berdadero gobièrnu mediante kua Dios lo establesé pas riba henter e tera. E profeta inspirá Isaías a predisí ku siudadanonan di e gobièrnu ei ‘nunka mas lo tren pa guera.’ (Isaías 2:⁠4) Mediante un programa di edukashon mundial, hende lo siña biba na pas i asina “bati nan spadanan traha plug ku nan, i nan lo bati nan lansanan traha skèr-pa-snui ku nan.”

Testigunan di Yehova ta hasiendo esaki kaba. Nan ta nenga di usa arma kontra nan próhimo, ounke nan ta pertenesé na hopi diferente grupo étniko i ta biba den mas ku 200 pais. Nan posishon neutral meimei di un mundu asotá pa guera ta duna prueba ku pas no ta un soño idealista sino un posibilidat realístiko.

Lo bo kier sa mas tokante e speransa aki ku Beibel ta ofresé pa berdadero pas? Sea asina bon di skirbi e publikadónan dje revista aki, usando e adrès mas serka di bo ku tin menshoná na página 5, òf tuma kontakto ku Testigunan di Yehova den bo área.