Un Refresko di un Mata Eksótiko

DI E KORESPONSAL DI SPIÈRTA! NA NIGER

BO TA gusta un kos di bebe friu riba un dia kayente? Hopi famia di Wèst Áfrika ta disfrutá di un kos di bebe refreskante ku tin koló bibu i ta dushi, saludabel i barata. Nan ta yam’é bissap, i ta trah’é di e mata roselle, un tipo di kayena tropikal. E mata aki por krese bira 2 meter haltu òf mas. E ta krese den vários parti di mundu, pero foral den e klimanan mas seku di paisnan manera Niger, Mali i Senegal.

Kon Ta Prepará Bissap

Bo ta pone un kuchara di e kèlkinan di e flor den mas o ménos un liter di awa. Laga e meskla herebé i despues ta pon’é trèk entre 15 pa 20 minüt. Kaba ta kola e kèlkinan, i por bebe e te sea kayente òf friu, ku òf sin suku. Awe nos kier prepará un kos di bebe friu ku e muchanan lo gusta, p’esei nos ta pone suku aden. Tin famia ta prepar’é agregando sabor di menta òf di vania. Nos ta basha e bissap friu i koló kòrá bibu den sakunan di plèstik chikitu transparente i ta mara nan na kònòpi. Awor e ta kla pa parti pa e muchanan ansioso! Kontentu nan ta sker un huki di e saku i ta gosa di nan kos di bebe preferí. Klaro ku algun ta preferá di beb’é den glas.

Nan ta bisa ku bissap no ta smak dushi so, sino ta bon pa bo salú tambe. E tin kalsio, fòsfòr, heru, vitamina A i C, i mas! Tin hende ta bisa ku tambe bissap ta habri barika na un manera suave i ta pone bo oriná i ku e ta un stimulante pa higra. En todo kaso, nos ta masha kontentu ku aparte di ta bunita pa bista, e mata aki ta duna nos un kos di bebe saludabel i refreskante!

[Rekonosementu pa Potrèt na página 31]

Potrèt di Kazuo Yamasaki