E Webu di Abestrus Ta un Milager

DI E KORESPONSAL DI SPIÈRTA! NA SUR ÁFRIKA

INMÓBIL den e mashin pa brui nan artifisialmente, webu di abestrus no ta duna ningun indikashon di loke ta tumando lugá paden ni di e demostrashon dramátiko ku ta a punto di kuminsá. Pero aki na e boerderij di krio di abestrus nos tin chèns di siña tokante e desaroyonan fasinante di un abestrus, kuminsando ku e webu ku nan ta pone.

Ta Mima e Webunan

Mama abestrus ta pone su webunan koló krèm den un nèshi simpel den santu. * Kada webu por pisa kasi un kilo i mei. Anto tur dia e trahadónan ta hiba e webunan ku e abestrusnan a pone na e mashinnan di brui di e boerderij. Esei lo bira e kas di e webunan pa aproksimadamente seis siman.

Esaki ta un periodo pa mima e webunan ku ta brui. Ta tene nan kayente i cozy na un temperatura di mas o ménos 37 grado Celsius, ku ta ideal pa e puitunan ku ta desaroyando den e webu. Pa evitá ku e dòl òf èmbrio ta sak den bòm di e webu i pega na e flishi di e kaska, e kriadó di abestrus ta tene e webunan den un rèki spesial ku ta bòltu nan outomátikamente, òf e ta laga bòltu nan tur dia na man. Esaki ta imitá e manera ku abestrus ta bira su webunan regularmente den nan nèshi di santu den sabana.

Un Bista den e Webu

Pero kon nos por sa kiko ta tumando lugá den e webu? E kriadó di abestrus ta kohe un webu suavemente i ta pon’é den un buraku den tòp di un kaha ku tin un pera di lus briante den dje. E prosedura aki ta laga e kriadó mira un silueta di e desaroyo remarkabel ku ta tumando lugá den e webu. E ta hasi esaki periódikamente ku e webunan pa kontrolá progreso di e bida den e webu. Si despues di lusa e webu un par di biaha e nota ku paden di e webu ta líkido ainda, e no ta pone e webu bèk den e mashin di brui pasobra evidentemente e webu no a fertilisá.

Durante e 39 dianan ku e webu di abestrus ta pasa den e mashin di brui, un kresementu milagroso ta tuma lugá den e webu ku tin kaska manera porselana. Rònt di e mesun tempu ta forma un saku di aire ku al final ta tuma un tersera parti di e espasio disponibel den e webu. * E puitu ta hañ’é hopi pèrtá den e webu i ta posishoná su mes pa su binidero salida for di e webu. Pero promé, un proseso krusial ta tuma lugá: e saku di e dòl tin ku kuminsá pasa dor di e kabuya di lombrishi i dor di lombrishi drenta den e puitu su barika chikí. Esaki ta sumamente importante pasobra e saku di e dòl ta kontené e supstansianan nutritivo i energia ku lo e tin mester asina ku e sali for di e webu.

Saliendo for di Nan Kaska

Porfin e gran dia ta yega, i nos t’ei pa mir’é. Promé, e puitunan tin ku kibra e flishi i drenta den e saku di aire promé ku nan por yega na e kaska mes. Distinto for di yu di otro bestia ku tin un djente spesial pa kibra nan kaska, abestrus tin un kapa  protektivo ku ta yuda protehá e punta di nan pik suave. E puitu ta pone su pik protehá kontra e parti paden di e kaska i ku su palu di garganta e ta pusha e flishi ku ta separ’é for di e saku di aire. Despues di pusha i frega e flishi aki pa basta ratu, e ta kibra. Esaki ta permití e puitu yena henter e área paden di e kaska.​—⁠Wak e plachi A.

E puitu su pulmonnan chikí porfin ta hala nan promé rosea di aire fresku! Awor su pulmonnan ta traha. Sin embargo, tur e esfuerso ei a gasta kasi tur e aire den e webu pèrtá. P’esei awor no ta tempu p’e puitu entregá, e tin ku sigui lucha i kibra e kaska p’e sali for dje. Ku tur su forsa e puitu ta manda su kabes patras i ta keda dal e paden di e kaska ku e punta di su pik. Diripiente, e puitu morto kansá ta mira un rayo di lus ora ku e kaska ta haña un sker chikí, i dor di e sker e puitu ta sinti aire fresku di bèrdè!​—⁠Wak plachi B.

Despues di sosegá un poko, e puitu ta bolbe haña sufisiente forsa pa sigui krak e kaska di webu, hasiendo bon uso di su pia drechi i su pik chikí protehá. Anto pushando e kaska di krak un banda, manera un Goliat chikí, e puitu ta purba sinta i ta wak e mundu rondó di dje ku tur e dignidat i konfiansa ku un abestrus resien nasí i ku ta zeila por tin.​—⁠Wak plachi C.

 Dikon e kriadó di abestrus no ta yuda e puitu sali for di su kaska? Esaki ta pa e puitu su mes bon. Ta dura un tempu promé ku su lombrishi por apsorbé e dòl di webu i despues hala sera. Un yudante ekiboká ku ta purba pura e proseso por leshoná e kriatura frágil òf pon’é haña un infekshon serio.

Anyway, porfin e puitunan aki na e boerderij a sali for di nan webu. Pa nos ta un espektákulo emoshonante pa para wak kon e puitunan di abestrus ta bringa sali for di nan kaska di webu i ta keda morto kansá pero viktorioso.

Enkuentro ku e Mayornan di Kriansa

Despues di un ratu e aire kayente di e mashin di brui ta seka lana di e puitunan, i nan ta bira masha leuk i suave. Anto ta pone nan den un kurá chikí pafó den solo. Nan ta gosa sinfin! Porfin nan por duna nan pianan chikí ku ainda ta tembla e ehersisio ku esakinan ta anhelá.

E siguiente dia ta un dia importante pa e puitunan ku pluma suave. Nan ta sera konosí ku nan mayornan di kriansa, abestrusnan adulto ku lo kuida nan durante e siguiente tres lunanan. Ainda e puitunan no ta sinti hamber pasobra e supstansianan nutritivo di e dòl di nan webu ta sisti nan. Pero despues di vários dia ku nan a sali for di webu, nan ta kuminsá sinti poko ral. Pero kiko nan por kome? Pa nos sorpresa, e puitunan ta kuminsá komo e sushi fresku di nan mayornan di kriansa! E kriadó di abestrus ta splika ku esaki ta yuda desaroyá nan sistema di inmunidat.

Wak nan kore manera loko pa keda pareu ku e stapnan gigantesko di nan mayornan di kriansa! Esei sí ta eksigí hopi esfuerso. Pero puitu di abestrus ta krese inkreiblemente lihé: 30 centimeter pa luna. P’esei sorprendentemente, den apénas un luna ya nan por keda pareu ku e pasonan di adultonan hopi mas grandi.

Ora e adolesentenan tin seis luna, nan a krese kompletamente i ta midi 2,5 meter. Ta difísil pa kere ku shete luna promé e kriaturanan delegá aki​—⁠ku pia i garganta largu​—⁠tabata simplemente webu inmóbil den un mashin di brui di un boerderij di abestrus.

[Nota]

[Diagram na página 23]

(Pa e teksto den su formato kompleto, wak e publikashon)

E PROSESO PA BRUI SALI

A

B

C

[Rekonosementu]

Fuente di e pinturanan: Dr. D. C. Deeming

[Plachi na página 23]

E dia grandi: e puitunan ta sali for di nan webu!

 [Rekonosementu pa Potrèt na página 25]

John Dominis/Index Stock Photography