Hóbennan Sa Puntra . . .

Kon Mi Por Haña un Bon Kompañero di Kuarto?

“Sin kompañera di kuarto, lo mi no por a sirbi nunka komo predikadó di tempu kompleto i paga hür i awa ku koriente.”​—⁠Lynn. *

ORA hóbennan bai biba riba nan mes, nan ta keda hopi bes masha sorprendí ora nan ripará kon karu bida ta den e ‘mundu real.’ Un manera pa hopi di nan anda ku kosto di bida haltu ta dor di kompartí gastu ku un òf mas kompañero di kuarto.

Pero manera un artíkulo anterior den e seri aki a mustra, no ta dje fásil ei pa kompartí kamber ku un otro persona, foral ku un hende kompletamente deskonosí. * Esaki ta konta asta pa kristiannan hóben ku ta kompartí kuarto pa nan por sirbi komo predikadó di tempu kompleto. Sin importá kiko ta bo situashon en partikular, si bo tin pensá di kompartí kuarto ku un persona, ta rasonabel pa bo usa “sabiduria sano” ora di skohe e persona ei. *​—⁠Proverbionan 3:⁠21.

E Peliger di Mal Asosiashon

Hopi adulto hóben ta buska riba bòrchinan di informashon, den avisonan di korant i riba Internet pa haña posibel kompañeronan di kuarto. Pero pa hóbennan kristian, e fuentenan ei ta forma un peliger serio. Probablemente nan lo pone bo den kontakto ku hendenan ku no tin mesun fe, moralidat ni normanan ku bo. E echo ku bo kier kompartí kuarto solamente ku un persona di bo mes fe ta nifiká ku bo tin un mente será òf ku bo ta antisosial? Nò, esei ta muestra di sabiduria. Beibel mes ta spièrta: “Mal kompania ta daña bon kustumber.”​—⁠1 Korintionan 15:⁠33.

Konsiderá e kaso di e mucha muhé Lee. E no tabata un kristian batisá ainda ora el a kuminsá biba na e kampus di universidat. Despues el a konta: “Tabatin un ambiente peligroso. Algun mucha muhé tabata yega kas i haña nan kompañera ta hasi sèks.” Bibando den e ambiente ei despues di poko tempu tabatin un impakto negativo riba Lee su spiritualidat. E ta atmití: “Mi tabata falta mayoria di mi reunionnan kristian.” Nada straño ku su komportashon a kuminsá bai atras. “Un dia, mi a asta papia palabra malu, i un di e mucha muhénan di: ‘Yehova ta aprobá esei?’ ” Esta un humiashon! Afortunadamente, Lee a sali for di e mal ambiente ei i a kuminsá hasi progreso spiritual. Pero su eksperensia ta duna un ehèmpel di e peliger di biba ku hende ku no ta respetá bo normanan.

Kon pa Haña un Kompañero Adekuá

Unda bo por buska anto? Kuminsá den bo propio kongregashon di Testigunan di Yehova. Ta interesante ku esnan ku ta predikadó di tempu kompleto hopi bes ta topa otro hóbennan ku  un mentalidat spiritual na e vários skol- i reunionnan ku ta ser tené spesial pa predikadónan di tempu kompleto. * Mayornan, ansianonan di bo kongregashon, superintendentenan biahero i otro rumannan tambe lo por yuda; kisas nan konosé algun hóben ku lo ta bon kompañero di kuarto.

Otro kos ku por yuda ta di laga hende sa ku bo ta buska un kompañero di kuarto. Mas tantu hende sa ku bo ta en buska di esei, mas chèns bo tin di haña resultado. (Eklesiástes 11:⁠6) Riba tur kos, pidi Yehova yuda bo haña un kompañero di kuarto, i dependé riba dje p’e bendishoná bo esfuersonan.​—⁠1 Huan 5:​14, 15.

Buska e Informashon Nesesario

Una bes bo a haña un posibel kompañero di kuarto, kisas bo ta kla pa kompartí kamber ku e persona ei. Pero ta sabí pa bo investigá un tiki promé. E rumannan di su kongregashon ta “duna bon testimonio di dje”? (Echonan 16:​1, 2) Kisas abo ku bo mayornan por papia direktamente ku algun persona ku tin kualifikashon spiritual i ku ta yegá na dje. Boso lo por puntra: ‘Ki reputashon e persona aki tin? E ta un persona emoshonalmente i spiritualmente stabil? E ta prediká na otro hende i ta komentá na reunion? E ta un persona konosí pa kondukta desente?’

Kòrda ku “esun ku anda ku hende sabí lo ta sabí.” (Proverbionan 13:20) Segun David: “Mi kompañero di kuarto ta masha spiritual. Esei ta yuda mi mantené mi spiritualidat.” Renee, kende tabatin vários kompañera di kuarto, tambe ta bisa: “Algun di mi kompañeranan di kuarto tabata sugerí pa nos lesa un kapítulo di Beibel huntu tur anochi. Komo ku mi mayornan no tabata Testigu, nunka nos no tabatin un studio di Beibel di famia. P’esei pa mi tabata masha great ku mi por tin un ‘studio di famia’ ku mi kompañeranan di kuarto!” Sí, un kompañero di kuarto ku meskos ku bo tin amor pa kosnan spiritual por ta un berdadero bendishon.

 Papia Habrí ku Otro

Awor abo ku e persona mester topa otro i papia. Tal kòmbersashon por yuda bo wak si boso personalidat ta bai ku otro. Ta interesante ku e revista Communication Research Reports ta informá di un estudio ku a revelá ku kompañeronan di kuarto ku tin mesun estilo di komuniká tabata esnan ‘ku mas a gusta i keda satisfecho ku nan kompañero di kuarto.’ Pues si bo ta un persona habrí, sosial i ekspresivo, lo bo por haña bo ku problema si bo bai kompartí kuarto ku un persona reservá, ketu òf ku ta inkliná na evitá otro hende.

Ounke lo bo no kier pa boso kòmbersashon parse un interogashon polisial, lo ta bon pa papia di e metanan i plannan ku bo futuro kompañero di kuarto tin a korto plaso. E ta buska pa progresá spiritualmente òf e ta djis interesá pa skapa di un situashon tenso na kas? Lynn ta mustra riba un otro problema ku por surgi: “Mi tabatin un kompañera ku tabatin un frei, i e frei tabata tur ora den nos kamber, kedando te lat anochi.” Lynn tabata haña nan ekspreshonnan di kariño inapropiá i esei tabata molesti’é. Sin embargo, bo por evitá e tipo di problemanan ei si boso palabrá algun regla básiko di antemano. Por ehèmpel, Renee ta bisa: “Nos tabatin un regla ku mucha hòmber no mag keda despues di sierto ora.” Tambe lo ta konsehabel pa tur dos kompañero palabrá pa nan nunka keda nan so den kamber òf apartamento ku un persona di e otro sekso.

Tambe lo ta bon pa papia tokante kosnan manera hòbi, preferensia i ki músika boso gusta. Mark ta bisa: “Lo mi tin gana di kompartí kuarto ku hende ku ta gusta e mesun tipo di kosnan ku ami gusta, ku tin un personalidat similar, ku gusta hasi e mesun kosnan ku mi.” Klaro ku e echo ku boso tin otro gustu no kier men ku boso no por kompartí kuarto huntu. E berdadero kuestion ta: Kon fleksibel boso tur dos ta? Boso ta dispuesto na tolerá diferensia i hasi ahuste pa akomodá gustu di otro?

Lee ta sugerí: “Bo tin ku puntra tambe kiko e otro persona ta ferwagt for di e areglo. Tin hende ta ferwagt ku lo bo ta nan mihó amiga i kompinchi. Pero ami no ta interesá den esei.” David tambe ta bisa: “Mi ta gusta un kompañero di kuarto ku mi por hasi kos huntu kuné, pero ku no ta sinti ku tur biaha e mester bai ku mi ki ora ku mi ta hasi kos huntu ku otro hende.” Asina tambe purba saka afó si e persona ta interesá p’e ta bo partner den e trabou di prediká òf ku e tin algu otro na mente, talbes sirbi den un kongregashon di idioma stranhero.

Por último, hasi sigur ku boso no ta pasa por haltu di asuntunan manera kushinamentu (un di boso sa kon pa kushiná?), kon ta parti trabou di kas, uso di aparatonan personal, lugá den kashi, muebel, lugá pa warda kos i bestia di kas. Si boso papia tokante e kosnan ei di un manera habrí, boso por evitá malkomprendementu i sintimentunan ofendí. Proverbionan 20:18 ta bisa: “Bon konseho ta hasi un plan mas firme.” (Beibel na papiamentu koriente)

“Korektamente i na un Manera Ordená”

Bo ta haña un otro prinsipio práktiko na Lukas 14:​28, ku ta bisa: “Kalkulá e gastunan.” Sí, purba kalkulá kuantu boso kosto di bida lo ta. Kuantu lo tin ku paga na hür? Kuminda? Awa ku koriente? Boso lo usa mesun telefòn? Si ta asina, kon boso lo parti e resibu? Lynn ta bisa: “Ami definitivamente lo hasi sigur ku un mucha muhé por paga su parti di e gastunan promé ku mi tum’é komo kompañera di kuarto.” E revista riba Internet The Next Step korektamente ta bisa: “Kompañeronan di kuarto ku no ta yuda paga hür i kuminda . . . òf ku ta subi bo resibu di awa ku koriente ta duna bo strès innesesario.”

Renee ta bisa: “Tin biaha e kuestion no ta kuantu e tin ku paga, sino ki dia!” E ta splika: “Nos mester a paga nos hür pa dia tres di kada luna. Pero tin biaha un kompañera ta sali bai pasa wikènt otro kaminda sin paga su parti, i ami tin ku pidi nos doño di kas despensa.” Klaramente ta sabí pa hasi tur kos “korektamente i na un manera ordená,” i no laga kosnan importante pa kasualidat. (1 Korintionan 14:40) Hopi bes ta sabí pa pone palabrashonnan riba papel.

Si bo ta kuidadoso i prudente bo tin mas chèns di haña un kompañero di kuarto ku lo ta un bendishon pa bo i no un fuente di angustia. Sin embargo, kiko por hasi si surgi problema i konfliktonan di personalidat? Un futuro artíkulo lo trata e situashonnan aki.

[Nota]

[Plachi na página 26]

Tin peliger den kompartí kuarto ku personanan ku no ta pega na moralidat di Beibel

[Plachi na página 26]

Promé ku bo bai di akuerdo pa kompartí kuarto ku un persona, boso sinta huntu i papia riba asuntunan importante