Kon pa Armonisá Siensia ku Religion

“Hende no ta mira siensia i religion mas komo dos kos kontradiktorio.”​—⁠The Daily Telegraph, Lònden, 26 di mei 1999.

TANTU siensia komo religion, den nan forma di mas nobel, ta enserá e búskeda pa bèrdat. Siensia ta deskubrí un mundu ku tin un areglo konsistente i armonioso, un universo ku ta kontené indikashonnan úniko di diseño inteligente. Religion berdadero ta duna nifikashon na e deskubrimentunan aki dor di siña hende ku ta e mente di e Kreadó ta e fuente di e diseño ku ta bisto den e mundu físiko.

Francis Collins, un biólogo molekular, a bisa: “Mi ta ripará ku religion ta enrikesé mi komprendementu di siensia.” El a sigui bisa: “Ora mi deskubrí algu tokante e gene humano, mi ta keda masha impreshoná ku e misterio di bida, i mi ta bisa mi mes: ‘Wauw, ta Dios so tabata sa esaki promé.’ Ta un sensashon sumamente plasentero i konmovedor, ku ta yuda mi apresiá Dios i hasi siensia algu ku ta duna mi mas satisfakshon.”

Kiko lo yuda un persona mira ku siensia no ta kontradesí religion?

Un Búskeda Kontinuo

Aseptá e límitenan: Nos búskeda pa haña kontesta tokante e universo, espasio i tempu infinito no tin un fin. Biólogo Lewis Thomas a remarká: “E búskeda aki lo no kaba pasobra hende ta  insasiablemente kurioso; nos ta gusta eksplorá, buska i purba di komprendé kosnan. Nunka nos lo haña kontesta riba tur nos preguntanan tokante bida i universo. Mi no por imaginá un punto final ora ku tur hende lo por hala un rosea di alivio i bisa: ‘Awor sí nos ta komprendé tur kos.’ Semper lo keda algu inkomprendibel pa hende.”

Pa loke ta trata religion e situashon ta meskos; no tin fin na e búskeda di konosementu. Pablo, un di e eskritornan bíbliko, a deklará: “Awor nos ta mira den un spil, skur asina, . . . awor mi konosé pa un parti.”​—⁠1 Korintionan 13:⁠12.

Pero no ta pasobra nos no tin kontesta riba tur pregunta sientífiko i religioso nos no por yega na konklushonnan bon fundá basá riba e echonan ku nos tin. Nos no tin mester di un konosementu detayá di e orígen di solo pa nos por ta apsolutamente sigur ku lo e sali mañan.

 Konsiderá e echonan konosí: Den e búskeda pa kontesta, nos mester laga prinsipionan sano guia nos. A ménos ku nos pega na e normanan mas haltu di evidensia, nos lo por ser engañá fásilmente den nos búskeda di bèrdat sientífiko i religioso. Realístikamente, ningun di nos hamas por evaluá tur konosementu i idea sientífiko ku awe ta yena bibliotekanan inmenso. Di otro banda, Beibel ta kontené un kolekshon fásil pa investigá di siñansanan spiritual ku nos por konsiderá. Beibel tin bon apoyo di echonan konosí. *

Sin embargo, relashoná ku konosementu en general, bo mester hasi esfuerso sinsero pa por distinguí entre echo i spekulashon, entre realidat i engaño, tantu den siensia komo den religion. Manera Pablo, e eskritor di Beibel a skirbi, nos tin ku rechasá “e argumentunan kontradiktorio ku ta bin di loke falsamente ta wòrdu yamá ‘konosementu.’ ” (1 Timoteo 6:20) Pa armonisá siensia ku Beibel nos tin ku konsiderá e echonan, i evitá konklushonnan basá riba spekulashon, i analisá kon kada echo ta apoyá i amplia otro.

Por ehèmpel, ora nos komprendé ku Beibel ta usa e palabra “dia” pa representá vários periodo di tempu, nos ta mira ku e relato di Génesis tokante seis dia di kreashon no nesesariamente ta kontradesí e konklushon sientífiko ku e planeta tera ta mas o ménos kuater mil mion i mei aña bieu. Segun Beibel, e tera tabata eksistí pa un periodo ku no ta ser spesifiká; promé ku e dianan di kreashon a kuminsá. (Wak e kuadro “E Dianan di Kreashon​—⁠Dia di 24 Ora?”) Asta si siensia korigí su mes i sugerí un  otro edat pa nos planeta, e deklarashon den Beibel ainda ta sierto. En bes di kontradisí Beibel, siensia den e kaso aki, i den hopi otro kaso, en realidat ta duna nos gran kantidat di informashon adishonal tokante e mundu físiko, tantu di aktualidat komo di pasado.

Fe, no kredulidat: Beibel ta duna nos un konosementu di Dios i di su propósitonan ku nos no por haña for di ningun otro fuente. Pakiko nos mester konfi’é? Beibel mes ta invitá nos pa tèst su eksaktitut. Konsiderá Beibel su outentisidat históriko, su balor práktiko, e onestidat di su eskritornan i su aspekto íntegro. Un persona por atkerí fe firme den Beibel komo e Palabra di Dios dor di investigá su eksaktitut, inkluso e deklarashonnan relashoná ku prinsipionan sientífiko i, asta mas konvinsentemente, e kumplimentu infalibel di sientos di profesia atraves di siglonan i te den nos tempu. Fe den Beibel no ta kredulidat, sino un konfiansa komprobá den e eksaktitut di deklarashonnan bíbliko.

Respetá siensia i rekonosé ku fe religioso tin balor: Testigunan di Yehova ta invitá hende di mente habrí, tantu esnan sientífiko komo religioso, pa nan tambe buska e bèrdat ku sinseridat riba ámbos tereno. Den nan kongregashonnan e Testigunan ta stimulá rèspèt sano pa siensia i pa su deskubrimentunan ku a keda komprobá i tambe un kreensia firme ku ta den Beibel so bo por haña bèrdat religioso. Sí, den Beibel, un buki ku na un manera franko i ku hopi evidensia ta deklará ku e ta e Palabra di Dios. Apòstel Pablo a bisa: “Ora boso a risibí for di nos e palabra di Dios su mensahe, boso a asept’é no komo palabra di hende, ma pa loke e ta berdaderamente, e palabra di Dios.”​—⁠1 Tesalonisensenan 2:⁠13.

Klaro ku meskos ku den siensia, falsedat i práktikanan perhudisial a infiltrá den religion. Pues, tin religion berdadero i tin religion falsu. Ta p’esei hopi hende a bandoná religion organisá i tradishonal pa bira miembro di e kongregashon kristian di Testigunan di Yehova. Nan tabata desepshoná pasobra e religion ku nan tabata pertenesé na dje no tabata dispuesto pa rechasá tradishon humano i mito afin di por aseptá e bèrdat deskubrí òf revelá.

Es mas, kristiannan berdadero su bida ta haña ègt un nifikashon i propósito, basá riba un konosementu masha personal di e Kreadó​—⁠manera Beibel ta revel’é​—⁠i di su propósito ku el a deklará pa humanidat i pa e planeta ku nos ta biba ariba. Testigunan di Yehova a keda satisfecho ku kontestanan rasonabel i basá riba Beibel pa preguntanan manera: Pakiko nos ta eksistí? Kiko ta spera nos den futuro? Gustosamente nan lo kompartí e informashon aki ku bo.

[Nota]

[Kuadro na página 10]

E Dianan di Kreashon​—Dia di 24 Ora?

Algun fundamentalista, ku ta interpretá Beibel kompletamente literal, ta pretendé ku ta kreashonismo i no evolushon ta splika historia prehumano. Nan ta deklará ku tur kreashon físiko a tuma lugá den solamente seis dia di 24 ora kada un, mas o ménos un 6.000 pa 10.000 aña pasá. Pero ku e deklarashonnan ei nan ta promové un siñansa ku no ta kuadra ku Beibel i ku a pone hopi hende redikulisá Beibel.

Akaso un dia den Beibel semper ta literalmente 24 ora largu? Génesis 2:4 ta papia di “e dia ku SEÑOR Dios a traha tera i shelu.” Esun dia aki ta enserá tur e seis dianan di kreashon di Génesis kapítulo 1. Segun uso bíbliko, un dia ta un periodo di tempu fiho i e por ta mil aña òf míles di aña. E dianan di kreashon di Beibel ta pèrmití hende yega n’e konklushon ku kada dia di kreashon a dura míles di aña. Ademas, promé ku e dianan di kreashon a kuminsá, tera tabata eksistí kaba. (Génesis 1:⁠1) P’esei riba e punto aki e relato bíbliko ta na armonia ku siensia berdadero.​—⁠2 Pedro 3:⁠8.

Komentando riba e afirmashon ku e dianan di kreashon tabata literalmente solamente 24 ora largu, e biólogo molekular Francis Collins a remarká: “Kreashonismo a hasi mas daño na e konsepto serio di fe ku kualkier otro kos den historia moderno.”

[Kuadro na página 11]

Siensia A Tuma e Posishon di Superioridat Moral?

Ta di komprendé ku hopi hende di siensia a rechasá religion pa motibu di su resistensia kontra progreso sientífiko, su historia teribel, i su hipokresia i krueldat. Profesor di mikrobiologia John Postgate ta señalá: “E religionnan di mundu . . . a kousa e horornan di sakrifisio humano, krusada, masakrenan organisá di hende indefenso i inkisishon. Den e mundu moderno e banda skur aki di religion a bira peligroso. Pasobra distinto for di siensia, religion no ta neutral.”

Komparando e banda skur di religion ku e supuesto rasonabilidat, ophetividat i disiplina di siensia, Postgate ta bisa ku “siensia a bin okupá e posishon di superioridat moral.”

Di bèrdat siensia tin e posishon di superioridat moral? E kontesta ta nò. Postgate mes ta atmití ku “komunidatnan sientífiko tambe a eksperensiá yalusí, golosidat, prehuisio i envidia.” E ta agregá ku “un par di sientífiko a demostrá ku nan ta dispuesto pa mata den nòmber di investigashon, manera a sosodé na Alemania nazi i den kamponan di prizon hapones.” I ora e revista National Geographic a asigná un reportero investigativo pa saka afó kon bini un froude di fosil a keda presentá den su páginanan komo un echo, e reportero a bini ku un “historia di sekresia i konfiansa ekiboká, di konfliktonan feros entre hende ku tabata para riba nan opinion, di hende ku tabata purba engrandesé nan mes, di e kreensia irealístiko di ku algu deseá ta sierto, suposishonnan ingenuo, eror humano, terkedat, manipulashon, difamashon, gañamentu [i] desonestidat pa saka probecho personal.”

I naturalmente ta siensia a duna humanidat instrumentonan horibel di guera, manera vírus òf bakteria mortal ku por ser usá komo arma biológiko, gas venenoso, misil, bòm dirigí dor di laser i bòm nuklear.

[Plachi na página 8, 9]

Nébula Fruminga (Menzel 3), di e Teleskop Espasial Hubble

[Rekonosementu]

NASA, ESA and The Hubble Heritage Team (STScI/AURA)

[Plachinan na página 9]

Siensia a deskubrí un mundu yen di rasgonan úniko di diseño inteligente

[Plachi na página 10]

Testigunan di Yehova ta stimulá rèspèt pa siensia berdadero i kreensia den Beibel