E Punto di Bista Bíbliko

Kristiannan Mester Prediká na Otro Hende?

KISAS bo kriansa òf kultura ta dikta ku no mester papia di religion pafó di e sírkulo di famia òf di iglesia. Dor di esei, lo bo por sinti bo iritá si ònferwagt un hende yama na bo kas ku Beibel den man. Algun hende tin e punto di bista aki debí na e aktonan violento ku a tuma lugá den historia di religion bou di e preteksto di kier salba hende.

Hopi nashon su historia ta konta kon hende a kombèrtí masalmente, no pasobra amor pa Kristu a motivá nan, sino mas bien pasobra nan tabatin miedu di ser matá si nan no kombèrtí. Hopi hende a preferá di bai skonde, di bandoná nan kas i pais, òf asta pèrdè nan bida⁠—⁠tin di nan kimá na staka⁠—⁠i no kombèrtí na e religion di nan persiguidónan.

E bukinan inspirá di Beibel no ta apoyá tal kombèrtimentu fòrsá. Pero esei ta nifiká tambe ku bo no mester kompartí bo kreensianan religioso ku otro hende? Beibel mes ta kontestá esei.

Siña ku Outoridat

Promé, konsiderá e ehèmpel ku Hesukristu a pone. E tabata un gran maestro ku a influensiá e bida di esnan ku a skuch’é. (Huan 13:​13, 15) Den e Sermon Riba Seru, su siñansa tabata simpel pero potente. E efekto tabata ku su oyentenan a “keda asombrá di su siñansa; pasobra e tabata siña nan manera un hende ku tin outoridat.” (Mateo 7:​28, 29) Despues di 2.000 aña, ainda su siñansanan ta influensiá bida di esnan ku analisá nan. Konfirmando e punto di bista aki, Profesor Hans Dieter Betz a remarká ku “e influensia ku e Sermon Riba Seru ta ehersé ta bai hopi mas leu ku e fronteranan di hudaismo i kristianismo, òf asta e kultura oksidental.”

Djis promé ku el a subi na shelu Hesus a duna un mandamentu ku a garantisá ku despues ku e no t’ei mas e trabou di siña hende ku el a kuminsá kuné lo a sigui i asta lo a prosperá. (Huan 14:12) El a instruí su disipelnan pa bai na hende di tur nashon, i “siña nan pa kumpli ku tur loke” el a manda. E propósito prinsipal di e asignashon aki a bira bisto ora ku den e mesun deklarashon Hesus a bisa: “P’esei, bai i hasi . . . disipel.”​—⁠Mateo 28:​19, 20; Echonan 1:⁠8.

Konsiderá tambe e ehèmpel di apòstel Pablo. Despues ku e mes a kombèrtí na kristianismo, e no a vasilá pa kompartí su fe nobo ku otronan. (Echonan 9:​17-19, 22) Pablo tabatin e kustumber di papia den snoa i duna prueba pa mustra “ku e Kristu mester a sufri i lanta for di e mortonan.” Den un forma ábil “el a rasoná ku nan for di e Skrituranan” afin di “konvensé hudiu i griego.” Segun un outoridat riba  e tema, e palabra griego tradusí komo “konvensé,” ta nifiká “kousa un kambio den e manera di pensa mediante e influensia di rasonamentu òf di konsiderashonnan moral.” E resultado di Pablo su rasonamentu konvinsente tabata ku el a “konvensé masha hopi hende, i a hasi nan desviá [kambia na otro opinion, NW ].”​—⁠Echonan 15:3; 17:​1-4, 17; 18:4; 19:⁠26.

Obligá òf Konvensé​—⁠Kua?

Den tempu moderno, hende ta usa e palabra “proselitismo” pa indiká ku ta obligá hende kombèrtí na algu. Beibel no ta apoyá tal práktika. Al kontrario, e ta siña ku hende a ser kreá ku boluntat liber i ku e privilegio i responsabilidat di disidí kon nan lo hiba nan bida. Esaki ta inkluí e desishon kon nan ta adorá Dios.​—⁠Deuteronomio 30:​19, 20; Hosué 24:⁠15.

Hesus a respetá e derecho aki ku Dios a duna hende. Nunka el a usa su poder i outoridat ekstraordinario pa fòrsa, òf obligá, un persona aseptá loke el a bisa. (Huan 6:​66-69) Ku e propósito di yega na kurason di su oyentenan, el a motivá nan dor di usa rasonamentu lógiko, komparashon i pregunta pa haña nan punto di bista. (Mateo 13:34; 22:​41-46; Lukas 10:36) Hesus a siña su disipelnan pa demostrá e mesun rèspèt aki na otro hende.​—⁠Mateo 10:⁠14.

Ta bisto ku Pablo a sigui e ehèmpel di Hesus den su sirbishi. Ounke Pablo a konvensé su oyentenan ku rasonamentu bíbliko sólido, el a respetá nan sintimentu i punto di bista. (Echonan 17:​22, 23, 32) E tabata sa ku ta amor pa Dios i pa Kristu tin ku motivá nos pa sirbi nos Kreadó aktivamente. (Huan 3:16; 21:​15-17) P’esei nos desishon ta un desishon personal.

Desishon Personal

Ora hende na tinu ta tuma desishonnan grandi den bida, manera por ehèmpel kua kas mester kumpra, unda pa traha i kon pa kria yu, nan no ta hasi esei riba impulso. Talbes nan ta investigá e diferente posibilidatnan ku tin, ta meditá riba loke nan a haña i probablemente ta pidi konseho. Ta despues di tuma tur e kosnan aki na kuenta nan ta tuma un desishon.

E desishon kon nos mester adorá Dios ta meresé mas tempu i esfuerso ku kualkier otro desishon den bida. Lo e tin un efekto riba e manera ku nos ta hiba nos bida awor, i mas importante, lo e tin un efekto riba nos speransa di bida eterno den futuro. E kristiannan di promé siglo na Berea a komprendé esaki bon kla. Maske ta apòstel Pablo a splika nan e bon nobo personalmente, tòg nan a eksaminá e Skritura tur dia pa hasi sigur ku loke Pablo tabata siña nan tabata sierto. Komo resultado, “hopi di nan” a bira kreyente.​—⁠Echonan 17:​11, 12.

Awe Testigunan di Yehova ta sigui ku e trabou ku Hesus a organisá, esta, siña hende i hasi disipel. (Mateo 24:14) Nan ta respetá kada ken su derecho di tin su propio religion. Pero ora ta trata di kompartí nan kreensianan religioso ku otro hende, nan ta sigui e ehèmpelnan ku tin den Beibel. Sí, nan ta usa rasonamentu onesto for di e Skritura pa hasi loke nan ta konsiderá un trabou ku ta salba bida.​—⁠Huan 17:3; 1 Timoteo 4:16.