Un Refugio Úniko pa Founa di Mediteráneo
Un Refugio Úniko pa Founa di Mediteráneo
DI E KORESPONSAL DI SPIÈRTA! NA SPAÑA
PA MÍLES di aña, paisnan a lo largu di Laman Mediteráneo a rosa nan mondinan, laga bestia kome tur yerba di sabana i a yag riba algun bestia di mondi te kasi kaba ku nan. Tin masha poko área den e region ei ku ainda ta den nan kondishon natural. Sin embargo, den un parti di Spaña, debí na un kombinashon di sirkunstansia un área chikí a sobrebibí kasi intakto. Su nòmber ta Monfragüe, ku ta nifiká “Seru Impenetrabel.”
Pero e isolashon di e parti aki di Spaña so lo no tabata basta pa protehá su naturalesa. Afortunadamente, e kunukeronan ku tabata biba den e region rònt di Monfragüe a praktiká un método di krio di bestia ku a resultá sumamente balioso pa konserbá un pida presioso di e terenonan ekstenso di selva nativo ku un tempu tabata kubri e serunan di Mediteráneo. E mondi konserbá tabata konosí komo dehesa, es desir, “sabana di palu.”
Un Método Ekológiko di Krio di Bestia
Siglonan pasá e kunukeronan di Extremadura (e region di Spaña kaminda Monfragüe ta situá) a deskubrí ku e mondinan di palu di eik semper-bèrdè ku ta kubri e pais por duna nan tounan bon sombra i kuminda. * P’esei en bes di kap tur palu pa haña tereno pa e tounan kome yerba, nan a konserbá sufisiente palu di eik pa krea un mondi di palu grandi ku sekshonnan habrí di sabana. Tambe nan a snui e palunan pa stimulá nan takinan pa span. E sombra di e palunan di eik impreshonante aki a protehá e sabana di yerba bou di nan, i e abundansia di fruta ku nan ta produsí ta perkurá kuminda nutritivo pa baka i porko. Komo ku e dehesa aki a konserbá un parti importante di su palunan original, hopi sorto di para i bestia nativo a logra sobrebibí.
Tin dos riu ku ta forma kloof i ta krusa dor di e dehesa, Tajo i Tiétar, i ta topa bou di e tòp di Seru Monfragüe. Finalmente na 1979, e área di mondi i baranka ku ta na rant di e dos riunan aki i ku a konservá e selva Mediteráneo original mihó ku na kualkier otro parti, a bira un parke natural. Nan a hasié un parke pasobra aktualmente nan ta konsiderá Monfragüe un di e refugionan mihó konserbá di e ekosistema di Mediteráneo.
Paranan di Beibel
Ounke e parke ta kubri un área relativamente chikí, e ta perkurá un refugio pa genet (un bestia ku parse pushi), biná komun, porko salbahe i e lynx spañó, un di e mamíferonan ku ta masha difísil pa haña mira i ku ta kore peliger grandi di ser eksterminá na Europa. Sin embargo, siendo ku mayoria di e bestianan aki ta bestia djanochi, un
bishitante di den dia tin mas chèns di mira e paranan yagdó magnífiko ku tin na abundansia den e área. Mayoria di e paranan yagdó aki di Mediteráneo ta tambe para típiko di paisnan di Beibel.Meimei di siglo 19, e naturalista H. B. Tristram a ripará ku kasi tur kaminda ku el a bishitá den Palestina, e tabata mira buitre (vale gier) ta zueif rònt den laira. Meskos ta pasa na Monfragüe, kaminda tin 400 par ku nèshi den e serunan steil di baranka ku ta ofresé bista riba e riunan Tajo i Tiétar. Na fin di dia, desénas di buitre ta bula den sírkulo riba nan nèshi ku nan ta kompartí, i shelu ta keda tur pintá ku nan siluetanan inmenso. *
Oyevarnan blanku ku ta traha nan nèshi riba edifisionan bieu den hopi parti di Europa, ainda ta traha nèshi den e palunan di eik den e área di Monfragüe, kaminda nan ta oumentá. (Salmo 104:17) Otro para ku huntu ku e oyevar ta hasi uso di e kolumnanan di aire kayente ku ta subi bai laira, ta águila imperial i águila real (keizersarend i goudarend ). Ku pasenshi nan ta zueif i laga e aire hiba nan laira, konstantemente en buska di proi ku nan ta ‘mira djaleu.’—Job 39:27-29.
Mas ágil i abundante ku e águilanan ta un tipo di falki rode wouw, ku durante zomer ta bira masha hopi. Tambe tin e zwarte wouw ku tin un bista skèrpi i ku konstantemente ta patruyá e riunan di e parke, semper en buska di piská ku e ta kohe for di den awa.—Job 28:7.
Otro paranan yagdó, manera palabrua real i palabrua komun (oehoe i kerkuil), ta kuminsá bula ora ta birando anochi. E palabrua real ta traha nèshi riba e barankanan steil isolá di Monfragüe, un habitat paresido na e ruinanan desolá di antiguo Babilonia, kaminda Isaías a profetisá ku e palabrua lo forma su kas.—Isaías 13:21.
Ta Konserbá i Restorá e Refugio
Flor di mondi ta duna e parke un aparensia kolorido, foral den lènte. E flornan blanku delikado di e rosa di baranka, kompañá pa flornan püs di mata di lavendel, ta kubri práktikamente tur barika di seru ku no tin palu. I segun ku zomer ta aserká, matanan di amapola ( papaver) ku ta tur kaminda ta agregá un toke kòrá na e sabananan bèrdè.
E interes prinsipal di e outoridatnan di e parke ta pa konserbá e habitat presioso aki. Pa logra esei, nan ta bezig ta planta matanan nativo pa remplasá e palunan di pino i eukalipto ku hende a introdusí i ku no ta benefisiá e parke su founa. Tambe nan ta koperá ku kunukeronan lokal pa protehá e dehesanan ku tin rònt di e parke, animando nan pa bolbe planta palu di eik ki ora ku ta nesesario. Ta di spera ku e medidanan aki lo garantisá e sobrebibensia di e refugio úniko aki pa founa di Mediteráneo.
[Nota]
^ par. 6 E sortonan prinsipal di palu di eik semper-bèrdè na Spaña ta kurkeik i steeneik. Tiponan di eik similar tabata krese masha hopi na Palestina den tempu di Beibel.
^ par. 10 E vale gier su alanan ta midi 2,80 meter di punta pa punta, i e ta un di e paranan mas grandi di Europa i Asia.
[Plachinan na página 16, 17]
Di robes pa drechi: Baka ta kome yerba den sabana habrí ku palu di mondi, un genet i un biná
[Plachi na página 18]
Buitre pretu
[Plachi na página 18]
Palabrua real
[Plachi na página 18]
Águila real
[Rekonosementu]
Fotos: Cortesía de GREFA