Eksplorando e Tesoronan di Oaxaca

DI E KORESPONSAL DI SPIÈRTA! NA MÈKSIKO

SEGUN e Instituto Nashonal di Antropologia i Historia di Mèksiko, nan a identifiká kasi 4.000 sitio arkeológiko den henter e estado Oaxaca, den e parti zùitost di Mèksiko. For di e sitionan aki, arkeólogonan a koba saka restunan masha balioso, di kua hopi a keda ekshibí den e Museo de las Culturas de Oaxaca. Djòin nos durante nos bishita na e museo fasinante aki.

E Museo de las Culturas de Oaxaca * ta situá den e lugá ku ántes tabata kombento Santo Domingo de Guzmán, i ta ubiká den e stat Oaxaca, un 430 kilometer zùitost di Siudat di Mèksiko. E museo tin 14 sala di ekshibishon ku ta show hoya, eskultura, serámika i otro obranan di arte balioso.

Den e promé sala di ekshibishon nos ta mira kabesnan di flecha. Nan ta kasi e úniko evidensia ku a resta di e presensia di gruponan yagdó ku tabata move rònt Oaxaca míles di aña pasá. Pasando pa e di dos sala, nos ta siña tokante Monte Albán, un stat situá riba punta di un seru den e vaye sentral di Oaxaca. Nan a yega di yam’é “e promé stat grandi di henter kontinente di Amérika.” Monte Albán aparentemente  a prosperá entre aña 300 pa 900 di nos era. Sin embargo, su konstrukshon inisial kisas ta data un 700 aña promé ku nos era.

E ruinanan bon konserbá di Monte Albán ta revelá ku su pueblo a atkerí konosementu ekstenso riba tereno di astronomia, trahamentu di artíkulonan di oro i skirbimentu usando dibuho (hiërogliefen). Te ainda bo por mira su tesoronan arkeológiko. Por ehèmpel, tin vários piramit ku ta destaká den e vaye. Ademas, nan a koba saka plenchinan públiko grandi, gangnan bou di tera, un kancha pa hunga un wega di bala ritual ku tabata ser yamá ollama, i alrededor di 170 graf bou di tera.

Dia 9 di yanüari 1932, e arkeólogo dr. Alfonso Caso a deskubrí Graf 7, un graf di indjan zapoteka ku tabatin e restunan di un noble, huntu ku un kantidat grandi di tesoro. Entre e artíkulonan ku a haña den e graf aki tabatin hoya trahá di oro, plata i koper, i tambe jade, turkesa, piedranan di kristal, pèrla i koral. Hopi di e artíkulonan aki ta ekshibí, entre nan, ophetonan di oro ku ta pisa en total kasi 4 kilo.

Fuera di hoya i piedra presioso briante, Graf 7 tabatin bunita artefaktonan di klei i wesu labrá. Un artíkulo remarkabel tabata un bunita pòchi di tur koló dòrná ku dibuho. Ora ku Monte Albán a kai den ruina, e periodo di skirbi den relieve riba monumentonan a terminá, i e skirbimentu miksteka a kuminsá, foral riba blachinan di buki (codex).

Pa aña 900 di nos era, tur e statnan grandi di e parti zùit di Norteamérika (konosí komo Mesoamérika), inkluso Monte Albán, a keda bandoná. Durante e siguiente 600 añanan, guereronan i gruponan militar a goberná. Di tur e gruponan ku a biba na Oaxaca durante e periodo ei, ta e mikstekanan kisas a laga e herensia di mas grandi. Segun The Encyclopedia Americana: “E mikstekanan tabata artesano- i artistanan maestral ku a destaká den hoyanan i bukinan di plachi masha bunita.”

Ku tempu nos ta spera di bolbe bèk i repasá informashon tokante Mèksiko su lucha pa haña independensia for di Spaña. Miéntras tantu, bin i eksplorá personalmente e tesoronan di antiguo Mèksiko. Lo bo keda kontentu di a hasié!

[Nota]

[Plachinan na página 24, 25]

Monte Albán a prosperá entre aña 300 i 900 di nos era

Abou: Korasa i otro artíkulonan for di Graf 7 i pòchinan di e mesun era

[Rekonosementu]

Tur potrèt: Reproducción Autorizada por el Instituto Nacional de Antropología e Historia CONACULTA-INAH-MEX