Hóbennan Sa Puntra . . .

Kon Mi Por Bai Bon ku Mi Kompañero di Kuarto?

“Ami tabata kier un kushina limpi. Pero mi kompañeranan no tabatin kunes. Pa nan, tabata algu normal si no a warda tayó òf si a laga kos riba stof. Gewoon esei no tabata importante.”​—⁠Lynn. *

KOMPAÑERO DI KUARTO. “Nan por ta bon amigu di otro òf pió enemigu di otro,” segun e eskritor Kevin Scoleri. Kisas abo no tin sintimentunan asina intenso, pero nos no por nenga ku biba ku un hende por ta un berdadero reto. * Konflikto entre kompañeronan di kuarto ta asina komun serka studiantenan di universidat ku segun U.S.News & World Report, hopi skol ta hasi “esfuerso ekstenso” pa yuda kompañeronan di kuarto bai bon ku otro, entre otro mediante “programanan di mediashon di konflikto” i dor di tene seminario.

Asta pa kristiannan hóben ku a sali for di kas pa partisipá den e trabou di predikashon full time, por ta difísil pa kompartí apartamento ku un otro hende. Pero e bon notisia ta ku dor di apliká prinsipionan bíbliko i mustra “sabiduria sano,” hopi bes boso por resolvé konfliktonan ku surgi.​—⁠Proverbionan 2:7

Siña Konosé Otro

Despues ku e eksitashon di e mudansa pasa, kisas lo bo kuminsá anhelá e manera ku kosnan tabata bai na kas. (Numbernan 11:​4, 5) Sin embargo, ta bira mas duru pa bo ahustá si konstantemente bo ta pensa riba pasado. Eklesiástes 7:10 ta duna e konseho aki: “No bisa: ‘Pakiko e dianan di ántes tabata mihó ku esakinan?’ Pasobra no ta for di sabiduria bo ta puntra esaki.” Sí, mihó bo purba hasi bo situashon aktual mas plasentero posibel.

Kuminsá ku hasi esfuerso pa siña konosé bo kompañero di kuarto. Ta sierto ku no ta nesesario pa kompañeronan di kuarto ta amigu íntimo. De echo, bo kompañero di kuarto kisas no ta un persona ku bo ta sinti bo masha atraí na dje. Pero una bes bo tin ku biba ku e persona ei, no ta lógiko pa boso tin un relashon mas amikal posibel?

Filipensenan 2:⁠4 ta bisa nos pa “no buska [nos] interes personal so, ma buska tambe interes di otronan.” Sin lag’é sinti ku bo ta interog’é, lo bo por puntra bo kompañero di kuarto tokante e antesedente di su famia, kiko ta interes’é, su metanan i preferensianan. Duna informashon tokante bo mes. Mas boso sa di otro, mas boso lo kuminsá komprendé otro.

De bes en kuando, traha plan pa boso hasi kos huntu. Lee ta bisa: “Tin biaha ami ku mi kompañeranan tabata sali bai kome òf nos tabata bai bishitá un galeria di arte huntu.”  Kompañeronan di kuarto kristian tin un manera asta mas efikas pa hasi nan amistat mas será. Esei ta dor di hasi kosnan spiritual huntu, por ehèmpel prepará pa reunionnan di kongregashon òf traha huntu den e trabou di prediká.

David ta bisa: “Dia mi kompañero di kuarto a duna un diskurso públiko, mi a asistí na su kongregashon pa dun’é apoyo.” Ounke David ku su kompañero di kuarto su gustunan no ta meskos pa loke ta trata deporte i músika, nan amor pa kosnan spiritual a krea un amistat. Segun David: “Nos tin hopi kòmbersashon spiritual. Eigenlijk nos por papia oranan largu tokante kosnan spiritual.”

Pero tene kuidou: No bira asina pegá na un kompañero di kuarto ku bo no ta sera ningun otro amistat sano. Si bo kompañero di kuarto ta sinti ku e mester invitá bo tur biaha ku e ta bai un kaminda, lo e por kuminsá sinti su mes benout. Beibel ta konsehá pa “habri” bo mes pa mas amistat.​—⁠2 Korintionan 6:⁠13.

Biba Segun e Regla di Oro

Ta klaro ku segun ku boso ta siña konosé otro, boso lo ripará e diferensianan ku boso tin pa loke ta kustumber, gustu i punto di bista. Manera e hóben Mark ta spièrta, “bo mester spera imperfekshon.” Ser infleksibel òf egoista ta kousa strès i tenshon. Esei ta e kaso tambe si bo ta ferwagt pa bo kompañero di kuarto hasi kambionan grandi djis pa agradá abo.

Pa loke ta ser un kompañero di kuarto, Fernando a siña esaki: “Bo mester ta inegoista i no konsentrá riba bo mes.” Su komentario ta na armonia ku e famoso Regla di Oro, ku ta bisa: “P’esei, tur loke boso kier pa hende hasi pa boso, hasi meskos pa nan.” (Mateo 7:⁠12) Por ehèmpel, Fernando a ripará despues di poko tempu ku e i su kompañero di kuarto tabata klèsh riba e temperatura di kamber; e tabata gusta kamber kayente, pero su kompañero di kuarto a preferá di drumi den friu. E solushon? Segun Fernando: “Mi a buska un deken.” Sí, manera Mark a bisa, “sea fleksibel. Bo no tin ku legumai tur loke bo ta gusta, pero lo bo tin ku legumai un òf dos kos sí.”

At’akí un otro tereno kaminda bo por apliká e Regla di Oro: Siña tolerá e gustunan di bo kompañero di kuarto. Bo no gusta su músika? Wèl, probablemente e tambe ta pensa meskos di bo músika. P’esei si bo kompañero di kuarto su gustu di músika no ta moralmente degradá, purba toler’é. Fernando ta bisa: “Lo mi a preferá pa mi kompañero di kuarto gusta otro tipo di músika. Pero mi a kuminsá kustumbrá ku su gustu.” Di otro banda, un persona por gosa di su músika usando headphone ya asina e no ta stroba su kompañero di kuarto, ku kisas ta studiando.

Sigui e Regla di Oro tambe por prevení pleitu innesesario tokante poseshonnan material. Por ehèmpel, si bo tin e kustumber di kue tur loke ku tin den frishidèr sin pidi⁠—⁠anto masha poko bes abo ta pone kos aden⁠—⁠esei por kousa malkontentu. Di otro banda, si bo ta rabia òf wak bo kompañero di kuarto ku mal wowo ora e kue algu ku abo a kumpra, esei lo no ègt yuda pa boso tin un bon relashon. Beibel ta animá nos pa “ta generoso i dispuesto pa kompartí.” (1 Timoteo 6:18) Si bo ta sinti ku bo kompañero ta probechá di bo, no sera bo mes i keda sin  papia. Ekspresá bo keho na un manera kalmu i bondadoso.

Respetá otro su poseshonnan personal. Ta tribí di bo parti pa fia algu sin pidi. (Proverbionan 11:⁠2) Kòrda tambe ku bo kompañero di kuarto mester di privasidat. Mustra kortesia básiko manera bati promé ku bo drenta su kamber. Ora bo ta mustra rèspèt, bo kompañero probablemente tambe lo hasi meskos. David ta konta: “No ta problema pa un di nos studia na kas. Nos tur dos ta respetá otro kompletamente i lo keda ketu pa e otro por studia. Pero tin biaha ami ta bai biblioteka pa studia pa por si akaso mi kompañero di kuarto kier hasi algu otro.”

Sigui e Regla di Oro ta enserá tambe ser responsabel ora ta trata kosnan manera paga bo parti di hür na tempu òf hasi bo parti di trabou di kas.

Kon pa Atendé Pleitu

Den tempu di Beibel, Pablo ku Barnabas⁠—⁠dos hòmber kristian hopi respetá⁠—⁠tabatin ‘un pleitu hopi fuerte.’ (Echonan 15:⁠39, Beibel na papiamentu koriente) Kiko si algu similar pasa entre boso dos? Podisé tin un klèsh di personalidat òf un kustumber personal iritante ku ta kaba ku bo pasenshi. Pero un solo desakuerdo òf pleitu ta nifiká ku boso mester stòp di kompartí kuarto? No nesesariamente. Evidentemente Pablo ku Barnabas a logra resolvé nan desakuerdo. Podisé bo por hasi meskos promé ku bo dal e paso drástiko di bai biba otro kaminda. At’akí algun prinsipio bíbliko ku por yuda.

● ‘No hasi nada ku un aktitut di egoismo òf orguyo, ma ku humildat konsiderá e otro mas importante ku bo mes.’​—⁠Filipensenan 2:⁠3.

● “Laga tur amargura, furia, rabia, griteria i kalumnia wòrdu kitá for di boso, huntu ku tur malisia. I sea kariñoso ku otro, miserikòrdioso, pordonando otro, meskos ku Dios den Kristu tambe a pordoná boso.”​—⁠Efesionan 4:​31, 32.

● “P’esei, si bo presentá bo ofrenda na altar, i ayanan bo kòrda ku bo ruman tin algu kontra bo, laga bo ofrenda ayanan dilanti di altar, i bai; rekonsiliá ku bo ruman promé, i despues bin presentá bo ofrenda.”​—⁠Mateo 5:​23, 24; Efesionan 4:⁠26.

E Benefisionan

Hopi kristian hóben (i tambe esnan no dje hóben ei) ku tin kompañero di kuarto a siña personalmente ki sierto ta e palabranan di e rei sabí Sálomon: “Dos ta mihó ku un.” (Eklesiástes 4:⁠9) Sí, hopi a deskubrí ku e eksperensia di kompartí kuarto ku un hende tin benefisio. Mark ta bisa: “Mi a siña adaptá mi mes i trata mihó ku hende.” Renee ta agregá: “Bo ta siña hopi tokante bo mes. I na mesun tempu, kompañeronan di kuarto por tin un influensia positivo ku ta stimulá bon komportashon.” Lynn ta atmití: “Mi tabata hopi malkriá ora mi a bai biba ku mi kompañeranan di kuarto. Pero mi a siña di no ta asina infleksibel. Awor mi ta realisá ku djis pasobra un hende ta hasi algu diferente for di e manera ku ami ta hasié, no kier men ku e ta robes.”

Ta sierto ku pa bo bai bon ku un kompañero di kuarto ta rekerí esfuerso i sakrifisio. Pero si bo traha duru pa apliká prinsipionan bíbliko, bo por eksperensiá mas ku solamente biba na pas ku otro; kisas lo bo haña ku ta asta dushi pa bo tin un kompañero di kuarto.

[Nota]

[Plachi na página 14]

Kue kos ku no ta di bo sin pidi por kousa tenshon

[Plachi na página 15]

Mustra konsiderashon na otro