Pakiko Mester di Polis?

KON bida lo tabata si no tabatin polis? Wèl, kiko a sosodé na 1997 den e stat Recife na Brazil ora ku 18.000 agente polisial a kanta wèlga, lagando mas ku un mion habitante sin polis?

“Den sinku dia kaótiko na e metrópolis aki kantu di laman, e kantidat di asesinato a bira tripel,” The Washington Post a informá. “Nan a atraká ocho banko. Gèngnan a kometé un seri di aktonan violento den un sentro komersial i tabata kore dor di barionan di hende riku tirando ku skopèt. I niun hende no ta obedesé leinan di tráfiko. . . . E ola di kriminalidat a kousa un kantidat di morto ku kasi a surpasá e kapasidat di e kas mortuorio i el a inundá e hospital mas grandi di gobièrnu, kaminda víktimanan di bala i hinkamentu ta drumí abou riba flur den gang.” Segun informe e minister di hustisia a bisa: “E tipo di kibramentu di lei aki tabata algu nunka bisto akinan.”

No ta importá unda nos ta biba, maldat ta djis bou di e kapa superfisial di sivilisashon. Nos mester di protekshon polisial. Klaro ku mayoria di nos a yega di tende tambe di brutalidat, korupshon, indiferensia i abusu di poder di parti di algun agente polisial. E seriedat di e insidentenan aki ta varia di un pais pa otro. Pero kiko nos lo a hasi si no tabatin polis? No ta bèrdat ku polis hopi biaha ta rindi servisionan balioso? Spièrta! a puntra algun agente polisial den diferente parti di mundu dikon nan a skohe e karera aki.

Un Servisio na Bienestar di Komunidat

“Mi gusta yuda hende,” Ivan, un polis britániko, ta bisa. “E variedat den e trabou a atraé mi. Por lo general hende no  ta realisá ku atendé krímen ta solamente 20 pa 30 porshento di trabou di polis. E ta mas un servisio na bienestar di komunidat. Durante un dia normal riba patruya, lo mi por atendé un morto repentino, un aksidente di tráfiko, un krímen i un persona di edat tur konfundí ku mester di yudansa. Loke foral ta duna bo satisfakshon ta ora bo hiba un mucha pèrdí bèk pa su mayornan òf yuda un víktima di krímen purba superá su trouma emoshonal.”

Stephen ta un eks-polis na Merka. E ta bisa: “Komo polis, bo tin e rekursonan i e tempu pa duna e mihó yudansa ora hende akudí na bo sinseramente pa asistensia. Esei ta loke a atraé mi na e trabou. Mi kier tabata disponibel pa yuda hende i hiba nan karga pisá. Mi ta sinti ku te na sierto grado mi a yuda protehá hende di kriminalidat, pasobra mi a arestá mas ku 1.000 hende den sinku aña. Haña mucha ku a pèrdè, yuda pashèntnan di Alzheimer ku a dualu i rekuperá vehíkulonan hòrtá, tur ta kosnan ku a duna mi satisfakshon. Anto tambe tin e eksitashon di buska i gara sospechosonan.”

Roberto, un polis na Bolivia, ta bisa: “Ami kier a yuda hende den emergensia. Na mucha mi tabata atmirá polis pasobra nan tabata protehá hende di peliger. Na prinsipio di mi karera mi tabata enkargá ku patruyanan na pia den sentro di siudat, kaminda tabatin ofisinanan di gobièrnu. Kasi tur dia nos a trata ku demostrashonnan polítiko. Mi trabou tabata pa evitá ku e situashon lo a bira violento. Mi a ripará ku si mi tabata amigabel i rasonabel ku e lidernan di e demostrashon, mi por a evitá violensia públiko ku lo por a kousa daño na hopi hende. Esei tabata algu ku a duna mi hopi satisfakshon.”

Polis ta rindi un gran variedat di servisio. Nan a yega di atendé situashonnan ku ta varia for di trata na baha un pushi fo’i palu te na libra rehennan for di man di terorista i konfrontá atrakadónan di banko. No opstante, for di tempu ku nan a kuminsá ku kuerpo di polis moderno, e tabata e foko di speransa i tambe di miedu. E siguiente artíkulo ta splika dikon.

 [Plachinan na página 2, 3]

Página 2 i 3: Dirigiendo tráfiko na Chengdu; polis antidisturbio di Gresia; agentenan polisial na Sur Áfrika

[Rekonosementu]

Linda Enger/Index Stock Photography

[Plachi na página 3]

Negoshi ku hende a plùnder durante un wèlga di polis na Salvador, Brazil, yüli 2001

[Rekonosementu]

Manu Dias/Agência A Tarde

[Plachi na página 4]

Stephen, Merka

[Plachi na página 4]

Roberto, Bolivia