Un Tou Úniko di Baka Blanku Salbahe

DI E KORESPONSAL DI SPIÈRTA! NA GRAN BRETANIA

CHILLINGHAM PARK, den e kondado di Northumberland, na Inglatera su frontera ku Eskosia, ta kas di un tou chikí di baka Blanku Salbahe. Tur aña bishitantenan ta bini di leu pa mira nan. Dikon? Pasobra e bestianan aki ta úniko. Ami ku mi kasá tabata entre e bishitantenan djawe.

Nan ta kere ku e bakanan Blanku Salbahe aki ta biba na Chillingham for di siglo 13, tempu ku nan a traha un  muraya pa sera un parke ku a abarká 600 hèktar. Den e parke nan a reuní baka salbahe pa nan kome. E bestianan remarkabel aki, ku awor ta limitá na 140 hèktar di e parke, tin orea kòrá, pata pretu i kara yen di purunchi. Ora nan tin mas o ménos 2 aña di edat, e purunchinan ta kuminsá sali i pokopoko ta plama riba nan garganta i skouder.

Te asina leu ku nan sa, nunka e tou a produsí yu di koló òf parsialmente di koló. Supuestamente nunka a rasa nan ku ningun baka doméstiko i nan ta distinto di e mil i piku otro bakanan di Chillingham Park, ku awor bo por haña den tounan chikí rònt Gran Bretania i Norteamérika. Tèstnan a demostrá ku e grupo di sanger di e tou aki ta úniko entre e bakanan di West Europa.

E dos kachunan di e toronan ta krese bai dilanti anto di span for di otro, miéntras ku e kachunan di e hembranan ta krese bai patras. E forma di nan kráneo i manera ku e kachunan ta krese ta similar na e oeros, e bue salbahe eksterminá ku bo por mira den kuadronan antiguo pintá den kuebanan di Europa. Tin outoridat ta kere ku e bakanan na Chillingham ta desendiente direkto di e bue ei ku un tempu tabata biba rònt riba e Islanan Britániko, pero nan orígen ainda no ta masha kla.

Puesto den e Tou

Pa nos por haña un mihó bista di e bakanan aki, nos ta bai huntu ku e wardadó di e tou den su outo four-wheel-drive. Nos ta baha e seru lihé, koriendo riba sabana yen di buraku, i diripiente nos ta mira e tou, pará den sombra di un grupo chikí di palu. Tin di nan ta wak nos yen di kuriosidat, manera baka gusta hasi. Dos òf tres di nan ta keiru bini na nos outo i ta frega nan kachunan grandi kontra e outo.

E wardadó ta mustra kua ta e lider di e tou, rei toro, manera nan ta yam’é. E ta e toro mas fuerte i den mihó kondishon. Durante su “reinado,” ku ta dura alrededor di tres aña, lo e ta tata di tur e bisénan ku e bakanan haña. Parse ku di e manera ei ta solamente e mihó sanger ta pasa di un generashon pa otro. Nan no ta pèrmití niun toro dèk su mes yunan, ni niun yu no tin mag di tuma e trabou di dèk e bakanan over for di su tata.

Instintonan Salbahe

Un tempu wòlf tabata e pió enemigu di e bestianan aki, i nan tabata yag riba e miembronan mas suak di e tou, ounke ku for di siglo 16 no tin wòlf na Gran Bretania. Tin biaha, si e bakanan spanta, nan ta kuminsá kore den pániko, i ora ku finalmente nan stòp di kore, e toronan instintivamente ta forma un sírkulo di protekshon lagando e hembranan i nan yunan paden di e sírkulo, sano i salvo di kualkier posibel yagdó.

E bakanan aki di bèrdat ta salbahe, p’esei no por kuida nan ku práktikanan moderno di agrikultura. Asta den wenter ora tin tiki yerba, nan ta kome solamente yerba seku i nan ta nenga trigu i kuminda pa baka. E bisénan ta nase ku peso hopi abou, p’esei e bakanan no sa tin masha problema ora di haña nan. I asta si un baka ta den problema ora di haña yu, no por hasi nada pa yud’é ya ku no por yama un veterinario pasobra hende ta bisa ku si un persona mishi ku un di e bakanan, e sobránan di e tou lo por mat’é.

Baka ta haña nan bisénan leu di e tou i ta tene nan skondí durante e promé siman. Despues di esei, mama ku yu ta aserká e tou, i rei toro ta bai topa nan i eskoltá nan. Kaba e otro bakanan ta hole i inspekshoná e bisé promé ku nan lag’é forma parti di e tou. Una bes nan asept’é, nan no ta dun’é mas atenshon spesial.

Na 1967 un epidemia grandi di e malesa di pata ku boka (mond- en klauwzeer) a yega te na 4 kilometer di Chillingham Park. Purá nan a seya e parke, i e tou a skapa. Despues di esei nan a disidí ku komo un prekoushon mester pone un tou chikí di reserva na Eskosia, pa evitá ku ta kaba ku tur. Den e kaso aki no tabatin problema ku e bakanan lo a rechasá otro, pasobra a muda tur e bestianan selektá pa kuminsá e tou nobo aki pareu.

Nos a gosa di nos ekskurshon kòrtiku pa mira e bakanan Blanku Salbahe i siña un poko di nan historia. Podisé un dia bo mes lo por bishitá e bestianan úniko aki den nan ambiente trankil.

 [Rekonosementu pa Potrèt na página 27]

Kortesia di Chillingham Wild Cattle Association

Fiá pa kortesia di Lawrence Alderson