For di Nos Lektornan

Artrítis Mi a keda sumamente impreshoná ku e seri “Speransa pa Hende ku Artrítis.” (8 di desèmber 2001) Mi tin 21 aña di edat, i pa kasi 15 aña mi ta sufri di artrítis severo i su konsekuensianan. E seri aki tabata un berdadero animashon pa mi, i el a hasi mi mas determiná pa keda perseverá.

A. F., Fransia

Mi ta sirbi komo un evangelisadó di tempu kompleto, un privilegio ku mi ta apresiá mashá pero ku dia pa dia ta bira mas difísil pa mi kumpli kuné. Nan a diagnostiká ku mi tin osteoartritis. Tur dia mi tin doló, i tin bes e frustrashon ku mi ta sinti ta pone mi bira deprimí. Masha danki pa e artíkulo ei ku a bin nèt na ora, i pa e rekordatorio di ku berdadero konsuelo ta bini dor di kere firmemente den Yehova su promesa di un mundu nobo.

H.M.A., Merka

Mi ta sufri di artrítis reumátiko, i aktualmente mi ta rekuperando di un atake severo di e malesa aki. E artíkulonan aki ta deskribí eksaktamente loke un hende ku ta sufri di e malesa aki ta pasa aden. Tabata útil pa haña sa mas tokante e malesa aki i kiko por wòrdu hasí pa redusí su efektonan.

G.F.F., Portugal

Mi tin 21 aña, i mi a haña sa ku mi tin artrítis reumátiko hubenil ora mi tabatin solamente 10 aña. Mi a lesa hopi eksperensia den revistanan médiko, pero ningun di e eksperensianan ei ta meskos ku esnan ku mi a lesa tokante di mi rumannan spiritual ku ta pasa den e mesun kosnan ku mi. Meskos ku Katia, menshoná den e artíkulonan, ami tampoko no por a sigui ku mi karera komo evangelisadó di tempu kompleto. Tabata masha importante pa mi ku mi por a lesa kon otro personanan ta trata ku sintimentunan di frustrashon i kulpa pasobra nan no por hasi mas den Yehova su sirbishi.

H. M., Merka

Ta hasi un aña kaba ku nan a diagnostiká ku mi tin artrítis reumátiko króniko. E tempu ei mi tabatin 24. Mi mester a stòp di traha komo evangelisadó di tempu kompleto. Mi a bira masha deprimí. Pa motibu di e inmenso doló i kansansio, awor mi ta hasi solamente mitar di loke mi tabata hasi. E artíkulo aki a konsolá mi, ya ku mi a mira ku otro rumannan tambe ta sinti e mesun doló físiko i emoshonal ku mi. I tambe mi a gusta e informashon práktiko tokante loke mi por hasi. Mi ta warda riba e dia ora “e kohonan lo bula manera biná.”​—⁠Isaías 35:⁠6.

T. U., Hapon

Un aña pasá mi a kuminsá sinti doló fuerte den algun di mi djòintnan di wesu. Dor ku mi tabatin kuarent’i piku aña, mi no por a imaginá ku ta artrítis. Boso artíkulonan a yuda mi mira ku mi mester ta balansá i rasonabel den loke mi ta spera di mi mes.

B. P., Merka

Mi tin 19 aña, i mi tin artrítis den mi pòls, ènkel i rudia. Loke spesialmente mi a disfrutá di dje ta e suptema “Respetá Bo Limitashonnan.” Mi a muda di Merka bai Ekuador ku e intenshon di sirbi einan komo evangelisadó di tempu kompleto. Pero pa motibu di mi limitashonnan, kansansio i doló, mi por sali prediká un ratu so. Mi a disidí ku mi ta bai Merka bèk pa mi haña tratamentu, i mi ta spera di por bolbe Ekuador ora mi bira bon.

J. S., Ekuador

Afsprak na Yòn Lo mi kier gradisí boso masha hopi mes pa e artíkulo Hóbennan Sa Puntra . . . “Kiko Tin di Malu den Traha Afsprak pa Sali na Edat Yòn?” (8 di yanüari 2002) Resientemente, mi a hasi mi mama e mesun pregunta ei: ‘Pero bon, kiko tin di malu den traha afsprak pa sali?’ Mi tabata sa e kontesta, pero djis mi tabatin mester di algu mas pa konvensé mi. Ora mi a lesa e artíkulo, mi a sinti komo si fuera Yehova a lesa mi pensamentu. E artíkulo aki a hasi mi mas determiná pa no traha afsprak pa sali ku un hende sino te ora mi ta kla pa kasa. Semper mi a disfrutá di e echo ku boso artíkulonan ta sali nèt na ora! Un biaha mas, masha danki.

L. F., Merka