Kiko Tin di Malu den Wega di Plaka?

“Un 290.000 oustraliano ta adikto na wega di plaka i nan ta responsabel pa un pèrdida anual di mas ku 5,4 mil mion florin. Esaki ta un kos desastroso no solamente pa esnan bisiá na wega di plaka sino tambe pa e 1,5 mion hende ku segun kálkulo ta direktamente afektá komo resultado di baimentu fayit, divorsio, suisido i tempu pèrdí na trabou.”​—⁠J. Howard, promé minister di Oustralia, 1999.

JOHN, menshoná den e artíkulo anterior, a bira adikto na wega di plaka. * El a muda bai Oustralia kaminda el a kasa ku Linda, kende tambe ta hunga plaka. John a bira mas adikto. E ta bisa: “Promé mi tabata kumpra brièchi, anto despues mi a kuminsá hunga plaka riba kareda di kabai i hunga plaka den kasino. Finalmente mi tabata hunga plaka kasi tur dia. Tin bes mi tabata hunga i pèrdè henter mi salario sin sobra nada pa paga hipotek ni kumpra kuminda pa mi famia. Asta ora mi a gana hopi plaka, mi tabata sigui hunga. Ta e sensashon ku mi tabata sinti ora mi gana a hasi mi adikto.”

Tin hopi hende ku ta bisiá manera John. Ta parse ku tin sosiedatnan kompleto ku a wòrdu kontagiá ku e entusiasmo intenso aki pa hunga wega di plaka. E revista USA Today a bisa ku entre 1976 i 1997, tabatin un oumento asombroso di 3.200 porshento den e kantidat di plaka ku hende a gasta na wega di plaka legal na Merka.

“Ántes hende tabata konsiderá wega di plaka komo un kos sosialmente i moralmente malu. Awendia e ta un dibertishon normal den sosiedat,” e korant The Globe and Mail ta bisa. Señalando na un di e motibunan pakiko públiko a kambia di aktitut, e korant ta bisa: “E echo ku hende a kambia nan aktitut pa ku wega di plaka ta e resultado direkto di loke kisas ta e kampaña di propaganda mas karu i mas largu ku gobièrnu a yega di finansiá den historia di Kánada.” Ki impakto esfuersonan pa promové wega di plaka tabatin riba algun sosiedat?

Un Epidemia di Adikshon na Wega di Plaka

E Departamentu di Adikshon na e Fakultat di Medisina di Harvard a kalkulá ku na 1996 tabatin “7,5 mion merikano adulto adikto na wega di plaka òf ku ta hungadó deskontrolá.” Anto tambe tabatin “7,9 mion merikano adolesente ku ta bisiá na wega di plaka òf ku ta hungadó deskontrolá.” E sifranan aki a wòrdu inkluí den e rapòrt kompilá dor di e Komishon Nashonal Ku Ta Studia Impakto di Wega di Plaka (NGISC), ku a ser presentá na Kongreso Merikano. Segun e rapòrt, kisas e kantidat di hende adikto na wega di plaka na Merka en realidat ta hopi mas haltu ku e sifranan aki ta indiká.

Pa motibu di pèrdèmentu di trabou, salú ku ta bai atras, ònderstant, i e kantidat di plaka ku mester gasta na programanan di tratamentu pa adikshon, nan ta kalkulá ku adikshon na wega di plaka ta kosta sosiedat merikano míles di miónes di dòler tur aña. Pero e suma aki no ta indiká e preis ku hende ta paga pa motibu di e bisio di wega di plaka, esta, e sakrifisio i sufrimentu ku famia-,  amigu- i koleganan di trabou ta pasa aden pa motibu di ladronisia, froude, suisido, violensia na kas i maltrato di mucha. Un estudio oustraliano a deskubrí ku kada adikto na wega di plaka por afektá mas ku dies hende direktamente. Un rapòrt di e Konseho Nashonal di Investigashon na Merka ta bisa ku mas ku “50 porshento di e kasánan i 10 porshento di yu ta eksperensiá maltrato físiko di un hungadó di plaka deskontrolá.”

Un Adikshon Kontagioso

Meskos ku algun malesa, e bisio di wega di plaka ta parse di pasa over di mayor pa yu. “Yunan di esnan ku ta adikto na wega di plaka tin mas chèns di kuminsá partisipá den kondukta delinkuente manera huma, bebe i usa droga, i nan ta kore riesgo mas grandi di bira adikto na wega di plaka òf un hungadó deskontrolá,” e rapòrt di NGISC ta bisa. Tambe e rapòrt ta duna spièrtamentu ku “adolesentenan ku ta hunga wega di plaka tin mas chèns ku adulto di bira adikto na wega di plaka òf un hungadó deskontrolá.”

Dr. Howard J. Shaffer, direktor di e Departamentu di Adikshon na e Fakultat di Medisina di  Harvard, ta bisa: “Kada bes tin mas evidensia ku hóbennan ta hunga mes tantu òf kisas asta mas tantu wega di plaka ilegal ku legal.” Anto relashoná ku e posibilidat ku hungadó deskontrolá di wega di plaka tin di hasi mal uso di e teknologia di Internet, e ta bisa: “Meskos ku humamentu di kokaina purifiká a kambia loke hende ta eksperensiá ora nan usa kokaina, asina mi ta pensa ku elektrónika ta bai kambia e manera ku hende ta eksperensiá wega di plaka.”

Hopi bes nan ta presentá e negoshi di wega di plaka komo dibertishon inofensivo. Pero adolesentenan por bira mes adikto na wega di plaka ku na droga i esaki por hiba na mal kondukta. Un enkuesta ku nan a tene na Reino Uní a revelá ku di e adolesentenan ku ta hunga plaka, “46 porshento a hòrta nan famia” pa nan por sigui ku nan bisio.

Apesar di e echonan ya menshoná, un asosashon di wega di plaka ku tin hopi influensia ta hustifiká e echo ku nan ta promové wega di plaka bisando: “E gran mayoria di merikano ku ta gusta hunga wega di plaka no ta haya ningun problema ètòl.” Asta si bo ta sinti ku wega di plaka no ta afektá bo finansieramente ni físikamente, ki impakto wega di plaka tin riba bo salú spiritual? Tin bon motibu pakiko bo no mester hunga wega di plaka? E siguiente artíkulo lo kontestá e preguntanan aki.

[Nota]

 [Kuadro/Plachinan na página 4, 5]

Mi Ta Adikto na Wega di Plaka?

Segun e Asosiashon Merikano di Sikiatra, e siguiente kriterionan na página 5 por yuda diagnostiká adikshon deskontrolá na wega di plaka. Mayoria di outoridat ta di akuerdo ku si bo ta manifestá algun di e karakterístikanan menshoná riba e siguiente página, bo ta un adikto na wega di plaka, i asta si ta un di nan so, bo ta kore riesgo di bira un adikto na wega di plaka.

 Preokupashon Bo ta preokupá ku wega di plaka, es desir bo kier bolbe pasa den eksperensianan ku bo tabatin ku wega di plaka, bo ta planea kon lo bo hunga e siguiente wega, òf bo ta pensa riba maneranan pa haña plaka pa bo gèmbel kuné.

Toleransia Bo ta sinti ku bo mester oumentá e suma di plaka ku bo ta gèmbel pa bo por logra e emoshon deseá.

Síntoma di apstinensia Bo ta haña mal beis òf ta bira iritá ora bo ta purba baha man òf stòp di hunga plaka.

Komo medio di eskape Bo ta gèmbel pa bo hui for di problema òf haña alivio ora bo ta sinti bo sin salida, kulpabel, anshá òf deprimí.

Kore tras di pèrdida Despues di kaba di pèrdè plaka, bo ta bin bèk un otro dia pa purba haña bèk loke bo a pèrdè. E komportashon aki ta loke nan ta yama korementu tras di pèrdida.

Gañamentu Bo ta gaña bo famia, terapeuta òf otro hende pa nan no haña sa kon profundo bo a bai den wega di plaka.

Pèrdèmentu di dominio Bo a purba vários bes pa stòp, kontrolá òf baha man na hungamentu di plaka, pero sin resultado.

Aktonan ilegal Bo a kometé aktonan ilegal, manera froude òf ladronisia pa bo por sigui hunga plaka.

Bo a pone relashonnan importante na peliger Bo a sea pone na peliger òf pèrdè un relashon importante, un oportunidat pa edukashon òf karera, òf trabou pa motibu di wega di plaka.

Otro hende a saka bo fo’i pèrta Bo a dependé riba otro hende pa duna bo plaka pa aliviá un situashon finansiero desesperante kousá pa wega di plaka.

[Rekonosementu]

Fuente: National Opinion Research Center na Universidat di Chicago, Gemini Research, i The Lewin Group.

[Kuadro/Plachi na página 7]

E Berdadero Mensahe di Propaganda di Loteria

Den un rapòrt presentá na e Komishon Nashonal Ku Ta Studia Impakto di Wega di Plaka, investigadónan na e Universidat di Duke, Merka, ta bisa: “Kisas hende ta konsiderá . . . propaganda pa loteria komo edukashon den balornan moral. Nan ta siña hende ku hunga wega di plaka ta un aktividat ku no ta hasi daño i ku e ta asta bon.” Ki efekto propaganda di loteria realmente tin riba komunidat? E rapòrt ta bisa: “Probablemente no ta un eksaherashon pa bisa ku e mensahe di propaganda di loteria ta engañoso ya ku nan ta siña ku éksito ta dependé di skohe e number korekto. E tipo di strategia astuto aki ku agensianan di loteria ta usa por kousa un efekto indeseá dor ku e ta baha kresementu di ekonomia, ku a lo largu ta baha entrada di gobièrnu. Pa ta mas spesífiko, si propaganda di loteria kita hende su gana di traha, spar, i invertí plaka den nan mes edukashon i entrenamentu, ku tempu esaki lo pone ku kresementu i produktividat lo baha. En todo kaso, generalmente nos lo no siña nos yunan di ningun manera ku spera riba un milager ta e manera pa logra éksito.”

[Kuadro/Plachi na página 8]

Tur Kas Tin un Kasino

Awendia en bes di konstruí establesimentunan nobo di wega di plaka, organisashonnan di wega di plaka ta krea Web site, loke ta kosta masha poko plaka na komparashon. E Web sitenan aki por kombertí kualkier kas ku ta konektá riba Internet práktikamente den un kasino. Meimei di añanan ’90 di siglo 20 tabatin aproksimadamente 25 site di wega di plaka riba Internet. Na 2001 tabatin mas ku 1.200 site, i e entrada di wega di plaka riba Internet ta bira dòbel kada aña. Na 1997, sitenan di wega di plaka a generá 540 mion florin. Na 1998 nan a generá 1.170 mion florin mas. Na aña 2000, sitenan di wega di plaka riba Internet a gana mas o ménos 4 mil mion florin, i pa 2003 nan ta “spera ku e sifra lo oumentá te na 11,5 mil mion florin,” korant Reuters ta informá.

[Plachi na página 6]

E preis pa adikshon na wega di plaka ta enserá ku famianan no tin plaka pa kuminda

[Plachi na página 7]

E kantidat di hóben ku ta hunga plaka ta oumentá di un manera alarmante

[Plachi na página 8]

Yunan di esnan bisiá na wega di plaka ta kore riesgo mas grandi di bira adikto na wega di plaka