Mèksiko Su Festividatnan di Vía Crucis

DI E KORESPONSAL DI SPIÈRTA! NA MÈKSIKO

PA KONMEMORÁ e morto di Hesus, tin alrededor di 300 festival religioso tur aña na Mèksiko. Un di esnan mas grandi ta e Vía Crucis, ku su proseshonnan i rekonstrukshon di e último dianan di Hesus su bida riba tera. Vía Crucis ta un ekspreshon na latin i ta nifiká “Kaminda di Krus.” Den e distrito di Iztapalapa di Suidat di Mèksiko, e direktor di e Kas di Kultura lokal a splika kiko ta su orígen: ‘Na 1833, tabatin un epidemia di kólera na Iztapalapa. Pa plakia e daño, e miembronan di e komunidat a kuminsá hunga drama di e relato di Hesus su sufrimentu kuminsando ku e Último Sena te ora el a muri.’

Esaki ta e manera ku un Vía Crucis típiko tabata tuma lugá: Un gran kantidat di hende ta reuní pa wak e personahenan di e drama: lidernan hudiu, ofisialnan di ehérsito romano, Hesus su apòstelnan i e hende muhénan ku tabata siguié, entre otro Maria. Un hòmber yòn ta hunga e papel di Hesus. E ta siña pasashinan di Beibel for di kabes pa e por sita nan segun ku susesonan ta desaroyá. E aktornan ta usa peluka, barba i mustashi anto ta bisti mantelnan diki. “Nazarenonan” tambe ta sigui “Hesus,” pia abou òf bistí ku sandalia di kueru, ku korona di sumpiña riba nan kabes pa imitá e sufrimentu ku Hesus a pasa aden. Tin biaha tin mas ku 2.500 nazareno. Durante dia nan ta karga krus miéntras nan ta subi Cerro de la Estrella, e lugá selektá pa supuestamente krusifiká Hesus.

Bendedónan den kaya ta ofresé produktonan manera sombré, bebida, figuranan religioso pa stèmpel na kara òf brasa, blas, mangel pa mucha i hopi otro kos. Pa e okashon ei nan ta asta organisá parkenan di rekreo ku tin weganan manera kabaitu.

Den e stat di Querétaro, hende ku a repentí di nan pikánan ta purba kana ku pia mará na kadena. Na Taxco, hòmbernan ta karga bultonan di sumpiña ku ta pisa 40 pa 50 kilo riba nan lomba pa kasi sinku ora. Otro personanan den e proseshon ta suta nan mes. Hopi bes vários partisipante ta haña nan ta bai hospital.

E tipo di adorashon aki podisé ta hasi nos kòrda riba e palabranan di apòstel Pablo ora el a papia kontra ‘religion ku hende mes a traha, i humildat falsu i trato severo di kurpa.’ (Kolosensenan 2:23) Ta sierto ku kristiannan berdadero ta rekordá Kristu su morto, pero nan no ta partisipá den tradishon ku tin orígen falsu i ku ta na konflikto ku prinsipionan bíbliko.