Orientá via Strea

DI E KORESPONSAL DI SPIÈRTA! NA HAWAI

SIGLONAN promé ku Cristofel Columbus a krusa Oséano Atlántiko ku boto, nabegantenan polinesio tabata biaha míles di kilometer den nan kanoanan di palu den Oséano Pasífiko. Nan tabata nabegá entre e islanan den e triángulo polinesio. Kon e polinesionan di ántes por a deskubrí e kantidat grandi di grupo di isla ku tin den e region enorme aki? Nan a deskubrí e islanan aki pa kasualidat?

Si e polinesionan tabatin un destinashon spesífiko na mente, kon nan por a orientá den nan kanoanan, sin mapa, sin kompas magnétiko òf otro instrumentonan ku nabegantenan oksidental tabata usa?

E kontesta no solamente ta revelá kon efikas e método polinesio di nabegá tabata, sino tambe ta pone nos atmirá e òrdu i struktura di nos mundu i di universo.

E Promé Dos Teorianan

No ta tur sientífiko i eksperto ta kla pa aseptá e idea ku e polinesionan tabata kapas pa nabegá konsientemente di isla pa isla. Thor Heyerdahl, un eksploradó norwechi, a spekulá ku polinesionan tabata originalmente di Suramérika i ku e nabegantenan tabata yega na e islanan di Pasífiko dor di drif bai ku e koriente di laman i bientunan mas frekuente.

Pa tèst su teoria, Heyerdahl i su tripulashon di sinku skandinavo a sali for di e kosta wèst di Perú riba un flota trahá di e palu di balsa. Nan a sigui nabegá den Oséano Atlántiko te ora e koriente di awa ku ta bai den direkshon west a hiba nan flota. Ora Heyerdahl i su tripulashon tabatin 101 dia i 7.000 kilometer ta nabegá, nan a yega na Raroia den e Archipiélago di Tuamotu. Pues den un forma masha impreshonante, Heyerdahl a demostrá ku ta eksistí e posibilidat ku e polinesionan a bini di Suramérika dor di drif bai ku e koriente di oséano mas frekuente. Pero e tèst ku Heyerdahl a hasi no a konvensé tur eksperto.

Un di esnan ku tabatin su dudanan tabata Andrew Sharp, un historiadó di Nueva Zelandia. Den su buki Ancient Voyagers in Polynesia ku el a skirbi na aña 1963, el a sita vários deskubrimentu arkeológiko i lingwístiko pa apoyá e punto di bista mas tradishonal ku historiadónan i ekspertonan tin​—⁠esta, ku e polinesionan originalmente a bin di west. Sin embargo, Sharp tambe a rechasá e punto di bista ku polinesionan tabata nabegantenan ábil.

Maske Sharp ta atmití ku ta posibel ku e nabegantenan por a dirigí nan mes ora nan tabata hasi biahenan kòrtiku, el a para riba ku e polinesionan sigur no por tabatin un idea fiho na unda nan tabata bayendo si nan mester a hasi un biahe di mas ku 500 kilometer. E ta kere ku kualkier isla ku nan a topa durante nan biahe largu tabata pa puru kasualidat.

 Biahe di Eksperimentu

Dor ku dr. David Lewis, di Nueva Zelandia a pensa ku Heyerdahl i Sharp no a duna debido rekonosimentu na e eksploradónan i nabegantenan polinesio di ántes, el a disidí di demostrá ku e método di nabegá di ántes tabata efikas. Na aña 1965 el a logra hasi un biahe di 3.000 kilometer di Tahiti pa Nueva Zelandia den un katamaran moderno sin kompas. E úniko kosnan ku el a usa tabata strea, solo i e direkshon ku olanan haltu ta bai. Lewis su biahe a lanta interes di hende den e téknikanan tradishonal di nabegá orientá riba laman i den rutanan migratorio di ántes. Un persona ku a tuma nota di e logro aki ta Ben Finney.

Finney, un profesor di antropologia na e Universidat di Hawai, a studia diseño i struktura di kanoa polinesio di ántes pa hopi aña. E ku algun di su koleganan na e Sosiedat di Nabegashon di Polinesio a traha un kanoa di 60 pia largu ku bodega dòbel. Nan a yam’é Hokule‛a, un palabra hawaiano ku ta nifiká “Strea di Goso.” Maske nan a traha Hokule‛a di materialnan sintétiko en bes di materialnan tradishonal manera palu di akasia, nan kier a traha un réplika di e struktura, aparensia i prestashon di e kanoa di ántes.

E promé biahe di Hokule‛a a tuma lugá riba 1 di mei 1976, ora el a sali for di e isla di Hawai, Maui, i a bai rumbo pa Tahiti. Pa motibu ku e arte polinesio di orientá riba laman ku yudansa di strea a bai pèrdí, nan mester a buska ekspertonan di nabegashon pafó di Islanan di Hawai. Pues, nan a skohe Mau Piailug, un maestro den e kampo di nabegashon di Mikronesia, pa guia Hokule‛a durante su promé trep. A dura 31 dia pa Hokule‛a kompletá su biahe di vários míles di kilometer pa Tahiti.

Den henter Polinesia e biahe eksitoso aki a lanta un interes kultural, i un interes den nabegashon i trahamentu di kanoa di ántes. Den e añanan ku a sigui, biahenan similar a wòrdu hasí entre e islanan di e triángulo polinesio, manera Hawai, Nueva Zelandia (konosí tambe komo Aotearoa), Rarotonga (den Islanan Cook), i Isla di Pasku (konosí tambe komo Rapa Nui). Hopi di e biahenan aki tabata dirigí dor di Nainoa Thompson, un nabegante ku a nase na Hawai i ku a studia bou di direkshon di Piailug.

Métodonan di Orientá di Ántes

Pero ta kon e polinesionan a logra nabegá distansianan di míles di kilometer sin ningun aparato? Segun Dennis Kawaharada di e Sosiedat di Nabegashon Polinesio, solo tabata nan guia prinsipal. Durante dia nan tabata usa e lugá kaminda solo ta sali i baha komo marka eksakto pa dirigí nan. Anochi, e nabegantenan tabata usa e lugánan kaminda streanan ta sali i baha komo marka pa nan sa unda nan tin ku bai ku nan kanoa.

Asta ora strea no ta sali ni baha den un sierto direkshon ku e kanoa ta bai, nan por usa otro strea den shelu komo guia. Fuera di e streanan, tambe nabegantenan ta usa luna i e sinku planetanan visibel komo yudansa adishonal pa mantené nan kurso.

Diesdos or di mèrdia òf riba anochinan nublá ora ku nan no por mira strea, e nabegante por usa komo su guia bientu i olanan haltu (huntu ku e lugá kaminda solo ta sali i baha), p’e por mantené e kanoa riba kurso. Segun Kawaharada, “e olanan haltu aki ta e olanan di laman ku a wòrdu okashoná dor di bientu òf tormenta, pero ku despues ta sigui independiente di loke a kousa nan, òf e olanan di laman ku ta persistí ora e tormenta a pasa kaba.”

P’esei, komportashon di olanan haltu ta un marka mas konfiabel pa wak riba dje, kompará ku olanan ku ta wòrdu produsí dor di bientunan lokal ku ta kambia. Dor ku e olanan haltu aki ta move den un direkshon fiho, e nabegante por orientá su mes i dirigí e kanoa den e direkshon ku e kier. E direkshon den kua e kanoa ta move segun ku e ta bai ku òf kontra olanan haltu di oséano, ta duna indikashon na e nabegante si e boto ta bayendo den e direkshon korekto.

Evidensia ta indiká ku posiblemente e polinesionan di ántes tabata kapas pa usa kuerponan selestial i forsa di naturalesa konsientemente pa bai míles di kilometer ku nan kanoanan den e direkshon ku nan a planea. Pero pa sabí ku e nabegantenan tabata, ningun di nan métodonan lo no a funshoná si no a eksistí un órden den naturalesa ku ta goberná e markanan ku nan ta usa komo guia, manera e lugánan kaminda strea ta sali i baha.

 Mas ku 2.700 aña pasá, profeta Isaías a duna elogio na e Magnífiko Kreadó, Yehova Dios, pa e órden ku bo por mira den shelu, ora el a skirbi: “Hisa bo wowo wak ariba i mira ta ken a krea e streanan aki; Esun ku ta guia nan ehérsito segun nan kantidat, ta e ta yama nan tur na nan nòmber; pa motibu di e grandesa di su forsa i su poder ningun di nan no ta falta.”​—⁠Isaías 40:26; Salmo 19:⁠1.

Tambe e salmista a skirbi bou di inspirashon ku Dios “ta determiná e kantidat di e streanan; e ta yama nan tur na nan nòmber.” (Salmo 147:⁠4) E polinesionan a rekonosé e órden ku ta eksistí entre e streanan den shelu riba nan kabes i a usa esakinan pa dirigí nan durante nan eksplorashon inmenso di e Oséano Pasífiko. Esaki no ta duna nos mas konfiansa ku nos universo ta produkto di un Kreadó ku ta sumamente inteligente i organisá?

[Mapa/Plachinan na página 23]

(Pa e teksto den su formato kompleto, wak e publikashon)

Fidji

TRIÁNGULO POLINESIO

Hawai

Samoa

Tonga

Nueva Zelandia

Islanan Cook

Tahiti

Islanan Markesas

Archipiélago di Tuamotu

Islanan Tubuaï

Isla di Pasku

[Plachi na página 23]

Na aña 1993 nan a traha e kanoa ku bodega dòbel “Hawai‘iloa” ku materialnan mas tradishonal ku su ruman muhé “Hokule‘a”

[Rekonosementu]

Hawai‘iloa na página 21 i 23: © Monte Costa