Wega di Plaka—Un Fasinashon Rònt Mundu

JOHN, kende a lanta na Eskosia, tabatin speransa di gana premio mayó. “Mi tabata kumpra brièchi tur siman,” e ta bisa. “E tabata kosta mi masha tiki plaka, pero e tabata duna mi e speransa di haña tur loke mi a yega di deseá.”

Kazushige, kende ta biba na Hapon, tabata gusta kareda di kabai. “Mi tabata pasa masha dushi mes ora mi tabata huntu ku mi amigunan ta pusta riba kabai na e pista di kabai, i tin bes mi tabata gana sumanan grandi di plaka,” e ta kòrda.

Linda, kende ta biba na Oustralia, ta bisa: “Bingo tabata mi wega faborito. E bisio aki tabata kosta mi 54 florin pa siman, pero mi tabata gusta e sensashon ku bo ta sinti ora bo gana.”

John, Kazushige i Linda tabata konsiderá wega di plaka komo un dibertishon relativamente inofensivo. Sientos di miónes di hende rònt mundu tin e mesun punto di bista. Un enkuesta Gallup di 1999 a indiká ku dos tersera parti di merikano no ta konsiderá wega di plaka komo algu malu. Na 1998, merikanonan ku ta hunga plaka a gasta mas o ménos 90 mil mion florin na wega di plaka legal. Esaki ta mas plaka ku loke nan ta gasta huntu na karchi pa pelíkula, músika grabá, deporte, parkenan di dibertishon i weganan di vidio.

Segun un investigashon resien, durante un periodo di un aña, mas ku 80 porshento di e poblashon oustraliano a yega di hunga plaka por lo ménos un biaha, i 40 porshento ta hunga plaka tur siman. Adultonan na e pais ei ta gasta un promedio di mas ku 720 florin pa aña na wega di plaka. Esei ta mas o ménos dos bes e kantidat di plaka ku europeonan i merikanonan ta gasta na wega di plaka. Pues, e oustralianonan ta entre e hungadónan di plaka mas apashoná na mundu.

 Hopi hapones ta adikto na pachinko, un wega di mashin manera pinball, i nan ta gèmbel míles di miónes tur aña den e wega. Na Brazil nan ta gasta 7,2 mil mion florin pa aña na wega di plaka, i un gran kantidat di e plaka ei ta bai na brièchi. Pero brasileñonan no ta e únikonan ku ta gusta brièchi. E revista Public Gaming International resientemente a kalkulá ku tin “306 loteria den 102 pais.” Wega di plaka en bèrdat ta un atrakshon rònt mundu, i segun algun hende e ta un atrakshon ku ta trese hopi benefisio.

Sharon Sharp, un representante di Instituto Públiko Ku Ta Investigá Wega di Plaka, ta bisa ku di 1964 te 1999, loteria na Merka a produsí “225 mil mion florin di e presupuesto di gobièrnu. Gran parti di e entrada aki a kuminsá drenta desde 1993.” Nan a designá hopi di e plaka aki pa programanan edukashonal pa públiko, parkenan di estado i e desaroyo di fasilidatnan públiko pa deporte. Tambe e negoshi di wega di plaka ta un fuente prinsipal di kupo di trabou, i na Oustralia so, e ta generá trabou pa mas o ménos 100.000 hende den mas ku 7.000 negoshi.

P’esei esnan ku ta na fabor di wega di plaka ta argumentá ku ademas di ku e ta un dibertishon, wega di plaka legal ta krea empleo, entrada di belasting i ta mehorá ekonomia lokal ku a bai atras.

P’e motibu ei hopi hende lo por puntra: ‘Kiko tin di malu den wega di plaka?’ E siguiente artíkulo lo kontestá e pregunta aki. Probablemente lo e por kambia bo punto di bista tokante wega di plaka.

[Plachi na página 3]

John

[Plachi na página 3]

Kazushige

[Plachi na página 3]

Linda