Bo Mester Buska Guia den Numbernan Mistiko?

NUMEROLOGIA ta parse algu válido ora eksamin’é desde e ángulo sientífiko i usando lógika? Ta via number nos por haña sa nos destino? Bo mester planea bo futuro a base di konklushonnan i pronóstikonan optené for di number?

Un argumento kontra numerologia pa kua su ekspertonan no por duna un splikashon ta e echo ku diferente kultura ta usa diferente kalènder. Por ehèmpel, kiko si un hende ta biba kaminda nan ta usa e kalènder chines? Tuma por ehèmpel, e fecha menshoná den e promé artíkulo: 11 di sèptèmber 2001. Segun e kalènder chines, esei tabata dia 24 di luna 7, di aña 18, di e siklo 78. Pa e kalènder juliano e mesun fecha ei tabata 29 di ougùstùs 2001. Segun e kalènder islámiko, tabata 22 di jumada II 1422, miéntras ku pa kalènder hebreo tabata 23 di elul 5761. Kon e numbernan di un fecha por tin un nifikashon spesial si por ekspres’é na asina tantu manera? Un otro faktor: Kada idioma tin su mes manera di spèl un nòmber. Por ehèmpel, e balor di number di e lèternan ku tin den e nòmber ingles John ta 2. Pero ora skirbi e nòmber ei na spañó⁠—⁠Juan⁠—⁠e balor di number di e lèternan ta 1.

Ta bèrdat ku por splika hopi aspekto di universo ku fórmulanan matemátiko, i por tèst i demostrá e fórmulanan aki. Ma ta kompletamente un otro kos pa bisa ku bo nòmber ta predestiná pa kuadra ku bo fecha di nasementu i ta konektá ku sierto numbernan di manera ku bo por averiguá bo destino.

E konklushon ta masha kla: No ta rasonabel pa kere ku interpretashon di numbernan místiko ta eksakto, ya ku esei ta basá riba faktornan ku ta varia masha hopi, manera kalènder i idioma.

‘Tempu i Suseso Imprevisto’

Tin hende ta kuminsá interesá den numerologia pasobra nan no kier haña nan ku sorpresa den nan bida. Sin embargo, Beibel ta mustra bon kla ku hende no por determiná detayenan di bida humano di antemano. Nos ta lesa: “E kareda no ta pa esun mas lihé, i e bataya no ta pa e guereronan, ni pan no ta pa e sabínan, ni rikesa  pa esnan ku tin disernimentu, ni fabor pa e hendenan ku abilidat; pasobra tempu i suerte [òf “suseso imprevisto,” NW] ta alkansá nan tur.” (Eklesiástes 9:⁠11) Sí, hopi suseso ta tuma lugá inesperadamente. Tal susesonan ku ta sosodé pa kasualidat ta hasi imposibel pa hende pronostiká kos basá riba e resultado di fecha di nasementu òf di e balor di number di un nòmber.

Konsiderá un otro ehèmpel: Animando generosidat Beibel ta bisa: “Tira bo pan riba superfisio di e awanan, pasobra lo bo hañ’é despues di hopi dia. Parti bo porshon den shete, sí, den ocho, pasobra bo no sa ki maldat por sosodé riba tera.” (Eklesiástes 11:​1, 2) Fuera di un par di eksepshon, maldat [òf “desaster,” Beibel na papiamentu koriente] ta algu ku hende no sa⁠—⁠en realidat no por sa⁠—⁠di antemano ki ora e ta bai pasa. P’esei Underwood Dudley, dosente di matemátika, ta skirbi enkuanto ekspertonan di numerologia: “Nan no ta duna sufisiente krédito na kasualidat. Kosnan sorprendente por sosodé sin un patronchi òf plan spesífiko.”

Ta bèrdat ku ekspertonan di numerologia por hasi algun pronóstiko ku ta resultá bèrdat. Kiko ta splika esaki? Den algun kaso, esei por ta puru koinsidensia. Ademas, tin biaha e ekspertonan di numerologia ta papia kos asina vago ku lo e por apliká na vários resultado. Pero tin algu mas serio pa tene kuenta kuné.

Un Forma di Wak Destino?

Beibel no ta menshoná numerologia spesífikamente. Pero sí e ta konta nos di Haman, un amalekita ku a traha un kòmplòt pa eksterminá  e hudiunan ku tabata biba na Pèrsia durante siglo 5 promé ku Era Komun. E relato ta bisa: “Den presensia di Haman nan a tira lòt, ku nan tabata yama Pur, pa nan haña un fecha adekuá. Nan a tira lòt riba tur dia i riba tur luna. Al fin i al kabo e lòt a bin kai riba e di diesdos luna, luna di Adar.” (Lèter kursivo ta di nos.)​—⁠Èster 3:⁠7, BPK.

Den tempu antiguo, tiramentu di lòt tabata un manera legítimo pa resolvé un kontroversia. * (Proverbionan 18:18) Pero Haman a tira lòt pa wak destino, algu ku Beibel ta kondená. Deuteronomio 18:​10-12 (BPK ) ta deklará ku Dios ta odia ‘hende ku ta mira destino, ku ta pronostiká for di forma di nubia òf for di otro kos, ku ta splika señalnan di algu ku ta bai pasa, òf hende ku ta hasi brua, hende ku ta usa kontra. SEÑOR, boso Dios tin asko profundo di esnan ku ta okupá nan mes ku práktikanan asina.’

Beibel ta konektá wakmentu di destino i poder mágiko ku spiritismo. Mal spiritu por manipulá susesonan pa kuadra ku nan propósito. Sin importá ku esei por ta asina den sierto kasonan, un kos ta sigur: Dios ta kondená spiritismo, i spiritismo por pone hende bou di kòntròl di mal spiritu.​—⁠1 Samuel 15:23; Efesionan 6:⁠12.

E práktika di buska nifikashon den number no tin ningun base sientífiko, i ta resultá un frakaso ora eksamin’é usando pensamentu lógiko i rasonabel. Mas importante, debí ku buskamentu di nifikashon spesial den number ta un forma di wak destino, e ta na konflikto ku siñansa bíbliko. En bista di esei, e no ta un medio benefisioso pa dirigí bo bida ni pa planea bo futuro.

[Nota]

[Kuadro na página 6]

TIN UN VARIEDAT DI KALÈNDER I ESEI TA UN OPSTÁKULO SERIO PA NUMEROLOGIA

GREGORIANO 11 di sèptèmber 2001

CHINES Dia 24, di luna 7, di aña 18, di e siklo 78

JULIANO 29 di ougùstùs 2001

ISLÁMIKO 22 jumada II 1422

HEBREO 23 di elul 5761

[Kuadro/Plachinan na página 7]

HOROSKOP TA KONFIABEL?

“Tin biaha bo ta un persona spontáneo, pero na otro okashonnan bo ta reservá. Bo no ta haña ku ta sabí pa konta hende straño muchu kos tokante bo mes. Bo ta un hende ku ta pensa pa bo mes, i bo mester di prueba di algu promé ku bo asept’é sin mas. Bo ta gusta variedat den bida i bo ta sinti bo infelis ora reglanan ta restringí bo. Bo tin gran potensial ku bo no a hasi pleno uso di dje. Bo tin e inklinashon di ta krítiko di loke bo ta hasi i di bo abilidatnan.”

E deskripshon ei ta parse di ta deskribí bo persona? Si ta asina, bo ta dunando mas nifikashon na dje ku loke e meresé. Al fin i al kabo, mayoria di e deklarashonnan menshoná ariba ta sierto pa mayoria hende. Pues, lektornan tin e inklinashon di aseptá e deklarashonnan ku ta parse eksakto i ignorá esnan ku no ta. Segun e buki Why Do Buses Come in Threes​—⁠The Hidden Mathematics of Everyday Life, “investigadónan a deskubrí ku si kita e signo riba un horoskop, hende no por bisa ta kua paragraf ta pertenesé na su signo, pero si inkluí e signo, nan lo kere ku nan horoskop ta esun mas eksakto.”

[Kuadro na página 8]

NUMBERNAN SIMBÓLIKO DEN BEIBEL

Tin sierto number usá den Beibel ku tin un nifikashon simbóliko, pero solamente den e konteksto di e Skritura den kua nan ta ser usá. Por ehèmpel, Beibel ta usa number kuater pa indiká totalidat òf algu ku ta inkluí tur kos sin eksepshon. E idea aki ta ser transmití den e ekspreshonnan manera “e kuater skinanan di tera” i “e kuater bientunan di shelu.” (Isaías 11:12; Daniel 8:⁠8) Tin biaha, number seis ta representá imperfekshon. Ta interesante ku e number ku e buki di Revelashon ta duna Satanas su organisashon polítiko riba tera ta “number di un hende,” esta, 666. (Revelashon 13:⁠18) Aki tres biaha seis ta enfatisá e imperfekshon di e organisashon ei manera bestia. Ora Beibel usa number shete den sentido simbóliko, e ta representá algu kompleto. (Levítiko 4:6; Hebreonan 9:​24-26) E numbernan aki i otronan ku e Skritura ta usa ta haña nan nifikashon for di nan konteksto profétiko.

Ounke e Skritura ta duna un sierto importansia na algun number, Beibel no ta animá nos pa konektá e lèternan di sierto palabra ku sierto number pa deskubrí bèrdatnan místiko.

[Plachi na página 8]

Haman a wak destino p’e skohe un fecha pa kumpli ku su kòmplòt pa mata e pueblo hudiu