Dushi Bestia di Kas òf Asesino Feros?

DI E KORESPONSAL DI SPIÈRTA! NA POLONIA

UN PERSONA ku tabata djòg ta ser ataká dor di un kachó agresivo i despues di esei e ta sangra muri. Un mucha muhé ta ser matá dor di su mes Rottweiler. E mayornan di un mucha hòmber di nuebe aña ta para mira kon un Duitse herder di kaya ta heridá nan yu mortalmente. Esakinan ta djis un par di e tragedianan ku kachó di rasa puru a kousa na Polonia.

Pa evitá e tipo di tragedianan ei, outoridatnan den algun lugá ta laga hende kria sierto rasa di kachó solamente si nan buska un pèrmit pa nan tin e kachó. Barbara Zaleska, miembro di e Asosiashon di Kennel Polako, ta argumentá ku ora di duna pèrmit mester wak e doño no e kachó, “pasobra ta e doño ta disidí si kachó di rasa mastif, rottweiler i bullterrier lo bira bestianan agresivo òf lo keda amigu di hende.”

Den algun kaso hende deliberadamente ta train e kachónan pa ta asesino. Supuestamente e métodonan di e trainernan ta enserá bati e kachónan, laga nan pasa hamber i asta tene “training kon pa mata.” E training ei ta inkluí ataká i sker pòpchi. Kaba nan ta pone e kachó ataká kachónan mas suak ku lo e mata sigur. Ora e training finalisá, e kachó ta kla pa partisipá den peleanan real di kachó, pa e delisia di hungadónan di plaka i fanátikonan ku gusta dramamentu di sanger.

Beibel ta bisa bon kla kon Dios ta mira krueldat kontra bestia: “Un hende hustu ta kuida bida di su bestia, ma kompashon di e malbadonan ta kruel.” (Proverbionan 12:⁠10) Hende ku kier agradá Dios no ta someté bestia na maltrato sadista. Nos por ta kontentu ku den Dios su mundu nobo lo bin un fin na e práktika di train bestia pa bira asesino, sea ta pa spòrt òf pa kualkier otro motibu.​—⁠Salmo 37:9-11.