Guia Konfiabel pa Futuro

E ECHO ku numerologia i otro formanan di wak destino no ta konfiabel ta nifiká ku nos no tin un manera pa haña sa tokante nos futuro? Klaru ku nò!

Number no por bisa humanidat kiko tin den futuro. Pero “e Dios bibu,” kende ta deklará “e fin for di prinsipio,” sí a hasié. El a hasi esaki den su Palabra skirbí, Beibel. (1 Timoteo 4:⁠10; Isaías 46:⁠10) Ademas, ta e palabra di e Dios bibu “ta kapas pa husga e pensamentunan i intenshonnan di kurason,” no e palabra di ekspertonan di numerologia. Pues ta e por yuda bo komprendé kiko ta motivá bo i kiko lo duna bo berdadero éksito.​—⁠Hebreonan 4:⁠12.

Nos Kreadó, e Outor di Beibel, ta e úniko ku por pronostiká futuro ku eksaktitut. Pasobra e ta Dios Todopoderoso, i semper su palabra tabata konfiabel. Yehova Dios a bisa: “Di bèrdat mi a papia; di bèrdat lo mi kumpli kuné.” (Isaías 46:⁠11) Despues ku Hosué a hiba e israelitanan den e Tera Primintí, e por a bisa ku konfiansa: “Ni un di e bon promesanan ku SEÑOR a hasi na e kas di Israel no a faya; tur a keda kumplí.”​—⁠Hosué 21:45; 23:⁠14.

Beibel ta kontené hopi profesia ku ainda tin ku kumpli. Entre nan tin esnan ku ta profetisá di un tempu ora ku Dios lo limpia tur maldat for di riba tera i hasié un paradeis. (Salmo 37:​10, 11; Proverbionan 2:​21, 22) E futuro ei ta atraé bo? Bo ta kere ku nos Kreadó tin e sabiduria i e poder pa drecha asuntunan riba e planeta aki? Si ta asina, lo ta bon pa bo konsiderá kiko Beibel ta bisa tokante e futuro di e tera. *

P’esei, usa bo tempu bon awor. No purba wak bo destino den number, mas bien, hasi esfuerso pa gana un konosementu eksakto di Beibel i di su profesianan. Testigunan di Yehova ta kla pa yuda bo gana mas konosementu tokante e futuro ku tin revelá den e Palabra di Dios, Beibel.

[Nota]